ನವದೆಹಲಿ: ರಾಜಧಾನಿ ದೆಹಲಿಯಲ್ಲಿ ಕೋವಿಡ್ ಸೋಂಕು ಪ್ರಕರಣಗಳು ಏರುತ್ತಿರುವ ಕಾರಣದಿಂದಾಗಿ ಸಂಸತ್ತಿನ ಚಳಿಗಾಲದ ಅಧಿವೇಶನವನ್ನು ಮುಂದಿನ ವರ್ಷಾರಂಭಕ್ಕೆ ಮುಂದೂಡುವ ಸಂಭವವಿದೆ. ಅಥವಾ ಬಜೆಟ್‌ ಅಧಿವೇಶನದ ಜೊತೆಗೆ ವಿಲೀನಗೊಳಿಸುವ ಸಂಭವವೂ ಇದೆ.
‘ನಮ್ಮ ಎದುರು ಹಲವು ಆಯ್ಕೆಗಳಿವೆ. ಸಂಸದೀಯ ವ್ಯವಹಾರಗಳ ಸಂಪುಟ ಉಪ ಸಮಿತಿ ಈ ಕುರಿತು ತೀರ್ಮಾನಿಸಲು ಶೀಘ್ರವೇ ಸಭೆ ಸೇರಲಿದೆ’ ಎಂದು ಸಮಿತಿಯ ಸದಸ್ಯರೊಬ್ಬರು ತಿಳಿಸಿದರು. ರಾಜಧಾನಿಯಲ್ಲಿ ಕೋವಿಡ್ ಪ್ರಕರಣಗಳು ತೀವ್ರವಾಗಿ ಏರುತ್ತಿದ್ದು, ನವೆಂಬರ್ 1ರಿಂದ ನಿತ್ಯ ಸರಾಸರಿ 6,800 ಪ್ರಕರಣಗಳು ವರದಿ ಆಗುತ್ತಿವೆ.
