ಅನುಚಿತ ವರ್ತನೆ: ಮೂವರು ರಾಜ್ಯಸಭೆ ಸದಸ್ಯರ ಅಮಾನತು

ಸಂಸತ್‌ನ ಎರಡೂ ಸದನಗಳಲ್ಲಿ ಬೆಲೆ ಏರಿಕೆ ಕುರಿತು ಚರ್ಚೆ ನಡೆಸಬೇಕು ಎಂದು ಪ್ರತಿಪಕ್ಷಗಳು ಒತ್ತಾಯಿಸಿವೆ.

ಸಭಾಪತಿ ಪೀಠದ ಎದುರು ಧಾವಿಸಿ ಘೋಷಣಾ ಫಲಕ ಪ್ರದರ್ಶಿಸಿ ಪ್ರತಿಭಟನೆ ನಡೆಸಿದ ಕಾರಣಕ್ಕೆಎಎಪಿಯ ಸುಶಿಲ್‌ ಕುಮಾರ್‌ ಗುಪ್ತಾ, ಸಂದೀಪ್‌ ಕುಮಾರ್‌ ಪಾಠಕ್‌ ಹಾಗೂ ಅಜಿತ್‌ ಕುಮಾರ್‌ ಭುಯನ್‌ ಅವರನ್ನು ಅಮಾನತುಗೊಳಿಸಲಾಗಿದೆ.

ಸಂಸದೀಯ ವ್ಯವಹಾರಗಳ ಸಚಿವ ವಿ.ಮುರಳೀಧರನ್‌ ಅವರು ಈ ವಾರದ ಉಳಿದ ಅವಧಿಯ ಕಲಾಪದಿಂದ ಮೂವರು ಸದಸ್ಯರನ್ನು ಅಮಾನತುಗೊಳಿಸುವ ನಿಲುವಳಿ ಸೂಚನೆ ಮಂಡಿಸಿದರು. ಇದನ್ನು ಧ್ವನಿಮತದಿಂದ ಅಂಗೀಕರಿಸಲಾಯಿತು. ಉಪಸಭಾಪತಿ ಹರಿವಂಶ್‌ ಅವರು ಅಮಾನತುಗೊಳಿಸಲಾದ ಸದಸ್ಯರ ಹೆಸರು ಪ್ರಕಟಿಸಿದರು.

ವಿರೋಧ ಪಕ್ಷಗಳ ಕೆಲವು ಸದಸ್ಯರು ಮತ ವಿಭಜನೆಗಾಗಿ ಒತ್ತಾಯಿಸಿದಾಗ, ಉಪಸಭಾಪತಿ ಅವರು ಮತ ವಿಭಜನೆಗೆ ಅವಕಾಶ ನೀಡುವಂತೆ ಸದಸ್ಯರಿಗೆ ಸೂಚಿಸಿದರು. ಆದರೆ, ವಿರೋಧ ಪಕ್ಷದ ಸದಸ್ಯರು ಗದ್ದಲ ಮುಂದುವರಿಸಿದರು. ಇದರಿಂದ ಸದನವನ್ನು ಮಧ್ಯಾಹ್ನ 2ರವರೆಗೆ ಮುಂದೂಡಲಾಯಿತು.

ಅನುಚಿತ ವರ್ತನೆ ತೋರಿದ ಕಾರಣಕ್ಕೆ ಈವರೆಗೆ ರಾಜ್ಯಸಭೆಯ ಕಲಾಪದಿಂದ ವಿರೋಧ ಪಕ್ಷಗಳ 23 ಸದಸ್ಯರನ್ನು ಅಮಾನತುಪಡಿಸಿದಂತಾಗಿದೆ.

ಸೊಳ್ಳೆ, ಸೆಕೆಗೆ ಅಂಜದೆ ಅಹೋರಾತ್ರಿ ಪ್ರತಿಭಟನೆ: ಸೊಳ್ಳೆಗಳ ಕಡಿತ ಮತ್ತು ಸೆಕೆಗೆ ಅಂಜದೆ ಐವರು ಅಮಾನತುಗೊಂಡ ಐವರು ಸಂಸದರು ಪ್ರತಿಭಟನಾರ್ಥವಾಗಿ ಸಂಸತ್‌ ಸಂಕೀರ್ಣದಲ್ಲಿನ ಗಾಂಧಿ ಪ್ರತಿಮೆ ಎದುರು ಇಡೀ ರಾತ್ರಿ ಕಳೆದರು.

ಸಿಎಂಐನ ಸಂತೋಷ್‌ಕುಮಾರ್‌, ಎಎಪಿಯ ಸಂಜಯ್‌ ಸಿಂಗ್‌ ಕೂಡ ಪ್ರತಿಭಟನೆಯಲ್ಲಿ ಪಾಲ್ಗೊಂಡಿದ್ದರು. ಟಿಎಂಸಿಯ ಡೋಲಾ ಸೆನ್‌, ಸಂತನು ಸೆನ್‌ ಅವರುಮಧ್ಯರಾತ್ರಿವರೆಗೂ ಸ್ಥಳದಲ್ಲಿದ್ದರು.

ಟೆಂಟ್‌ ಹಾಕಲು ಅನುಮತಿ ಸಿಗದಿದ್ದರಿಂದ ಐವರು ಸಂಸದರೂ ಆಕಾಶಕ್ಕೆ ಮುಖಮಾಡಿ ಮಲಗಿ, ರಾಜ್ಯಸಭೆಯ 20 ಮತ್ತು ಲೋಕಸಭೆಯ ನಾಲ್ವರು ಸದಸ್ಯರ ಅಮಾನತು ನಿರ್ಧಾರವನ್ನು ಹಿಂಪಡೆಯುವಂತೆ ಒತ್ತಾಯಿಸಿ ಪ್ರತಿಭಟಿಸಿದರು.

‘ವಿರೋಧ ಪಕ್ಷಗಳ ಸಂಸದರು ಕೈಗೊಂಡಿರುವ 50 ತಾಸುಗಳ ನಿರಂತರ ಧರಣಿಯಲ್ಲಿ 21 ತಾಸು ಕಳೆದಿದೆ. ಇನ್ನೂ 29 ತಾಸುಗಳ ಧರಣಿ ಇದೆ. 24 ಸಂಸದರ ಅಮಾನತು ರದ್ದುಪಡಿಸುವ ಕುರಿತು ಚರ್ಚಿಸಲಾಗಿದೆ’ ಎಂದು ಟಿಎಂಸಿ ರಾಜ್ಯಸಭಾ ಸದಸ್ಯ ಡೆರೆಕ್‌ ಒಬ್ರಿಯಾನ್‌ ಟ್ವೀಟ್‌ ಮಾಡಿದ್ದಾರೆ.

ಪ್ರತಿಭಟನಾನಿರತಸಂಸದರಿಗೆ ಚಹಾ ತಂದ ಟಿಎಂಸಿ ಸಂಸದ ಮೌಸಮ್ ನೂರ್, ‘ಪ್ರತಿಪಕ್ಷಗಳ ಸದಸ್ಯರು ಕ್ಷಮೆಯಾಚಿಸುವುದಿಲ್ಲ ಮತ್ತು ಪ್ರತಿಭಟನೆ ಮುಂದುವರಿಯಲಿದೆ’ ಎಂದು ಹೇಳಿದರು.