ಚಿಕ್ಕಮಕ್ಕಳಿಗೆ ಏಕಿಷ್ಟು ಕೆಲಸ?:ಆನ್‌ಲೈನ್ ಕ್ಲಾಸ್ ಬಗ್ಗೆ ಮೋದಿಗೆ 6ರ ಬಾಲಕಿ ದೂರು

ಪತ್ರಕರ್ತ ಔರಂಗಜೇಬ್ ನಕ್ಷ್‌ಬಂಧಿ ಎಂಬುವವರು ಜಮ್ಮು ಮತ್ತು ಕಾಶ್ಮೀರದ ಆರು ವರ್ಷದ ಬಾಲಕಿಯೊಬ್ಬಳು ದೀರ್ಘ ಸಮಯದ ಆನ್‌ಲೈನ್ ಕ್ಲಾಸ್ ಬಗ್ಗೆ ಪ್ರಶ್ನೆ ಎತ್ತಿದ್ದು, ಮೋದಿಯವರಿಗೆ ದೂರು ನೀಡಿರುವ ವಿಡಿಯೊವನ್ನು ಟ್ವಿಟರ್‌ನಲ್ಲಿ ಹಂಚಿಕೊಂಡಿದ್ದಾರೆ.

45 ಸೆಕೆಂಡುಗಳ ವಿಡಿಯೊದಲ್ಲಿ, ‘ಬೆಳಗ್ಗೆ 10 ಗಂಟೆಗೆ ಆರಂಭವಾಗುವ ಆನ್‌ಲೈನ್ ತರಗತಿಗಳು ಮಧ್ಯಾಹ್ನ 2 ಗಂಟೆವರೆಗೂ ಮುಂದುವರಿಯುತ್ತವೆ. ಇಂಗ್ಲಿಷ್, ಉರ್ದು, ಗಣಿತ, ಇವಿಎಸ್ ಬಳಿಕ ಕಂಪ್ಯೂಟರ್ ಕ್ಲಾಸ್ ಸಹ ಇರುತ್ತದೆ. ಮಕ್ಕಳಿಗೆ ತುಂಬಾ ಒತ್ತಡವಾಗುತ್ತಿದೆ’ ಎಂದು ಕೈಸನ್ನೆ ಮಾಡುವ ಮೂಲಕ ಬಾಲಕಿ ಹೇಳಿಕೊಂಡಿದ್ದಾಳೆ.

‘ಚಿಕ್ಕ ಮಕ್ಕಳಿಗೆ ಏಕಿಷ್ಟು ಕೆಲಸ ಮೋದಿ ಸಾಹೇಬ್?’ ಎಂದು ಪುಟ್ಟ ಬಾಲಕಿ ಪ್ರಶ್ನಿಸಿದ್ದಾಳೆ. ಕೆಲವು ಕ್ಷಣ ಮೌನವಾಗಿ ಬಳಿಕ ಮತ್ತೆ ಮಾತು ಆರಂಭಿಸಿದ ಬಾಲಕಿ, ‘ಏನು ಮಾಡಬಹುದು? ಅಸ್ಸಲಾಮಾಲಿಕುಮ್, ಮೋದಿ ಸಾಹೇಬ್, ಬೈ’ಎಂದು ಹೇಳಿದ್ದಾಳೆ.

ಶನಿವಾರ ಟ್ವಿಟರ್‌ನಲ್ಲಿ ಪೋಸ್ಟ್ ಮಾಡಲಾಗಿರುವ ಈ ವಿಡಿಯೊ ಕ್ಲಿಪ್‌ ಅನ್ನು 57,000 ಕ್ಕೂ ಹೆಚ್ಚು ಬಾರಿ ವೀಕ್ಷಿಸಲಾಗಿದೆ. ಸುಮಾರು 1,200ಕ್ಕೂ ಹೆಚ್ಚು ಬಳಕೆದಾರರು ವಿಡಿಯೊವನ್ನು ರಿಟ್ವೀಟ್ ಮಾಡಿದ್ದಾರೆ. ಇನ್ನೂ ಅನೇಕರು ಆಕೆಯ ದೂರಿಗೆ ಪ್ರತಿಕ್ರಿಯಿಸಿದ್ದಾರೆ.