‘ಪೂರ್ಣಾವಧಿ ತರಗತಿ ನಡೆಸದೆ ಶೇ 70 ಹಾಜರಾತಿ ನಿರೀಕ್ಷಿಸಬೇಡಿ’

‘ಕೋರ್ಸ್‌ ಅವಧಿಯ ಶೇ 40 ರಷ್ಟು ತರಗತಿಗಳನ್ನು ನಡೆಸಿ, ವಿದ್ಯಾರ್ಥಿಗಳಿಗೆ ಶೇ 70ರಷ್ಟು ಹಾಜರಾತಿ ಕಡ್ಡಾಯವಾಗಿ ಇರಬೇಕು ಎಂದು ಹೇಳುವುದು ಸೂಕ್ತವಲ್ಲ’ ಎಂದು ಮುಖ್ಯ ನ್ಯಾಯಮೂರ್ತಿ ಡಿ.ಎನ್‌. ಪಟೇಲ್‌ ಹಾಗೂ ನ್ಯಾಯಮೂರ್ತಿ ಪ್ರತೀಕ್‌ ಜಲನ್‌ ಅವರಿದ್ದ ಪೀಠವು ಸೂಚಿಸಿದೆ. ಕಾನೂನು ವಿದ್ಯಾರ್ಥಿಯೊಬ್ಬ ಸಲ್ಲಿಸಿದ್ದ ಅರ್ಜಿ ವಿಚಾರಣೆ ನಡೆಸಿದ ಪೀಠವು, ಈ ಕುರಿತು ಕೇಂದ್ರ ಸರ್ಕಾರ ಹಾಗೂ ವಿಶ್ವವಿದ್ಯಾಲಯಕ್ಕೆ ನೋಟಿಸ್ ನೀಡಿದೆ.

‘ಅನಾರೋಗ್ಯದ ಕಾರಣದಿಂದ ಮಾರ್ಚ್‌ 2017ರಿಂದ ಅರ್ಜಿದಾರರು ತರಗತಿಗಳಿಗೆ ಹಾಜರಾಗಲು ಸಾಧ್ಯವಾಗಲಿಲ್ಲ. ಈ ರೀತಿ ಪ್ರಕರಣಗಳಲ್ಲಿ ಇಂಥ ವಿದ್ಯಾರ್ಥಿಗಳ ಅನುಕೂಲಕ್ಕಾಗಿ ಪರ್ಯಾಯ ವ್ಯವಸ್ಥೆ ಇರಬೇಕು’ ಎಂದು ಪೀಠವು ವಿಶ್ವವಿದ್ಯಾಲಯಕ್ಕೆ ಸೂಚಿಸಿತು. ಜೊತೆಗೆ ಕಳೆದ ವರ್ಷ ಮೊದಲ ಸೆಮಿಸ್ಟರ್ ಆರಂಭವಾದ ದಿನ ಹಾಗೂ ಪರೀಕ್ಷೆ ನಡೆದ ದಿನದ ಮಾಹಿತಿಯನ್ನು ನೀಡಲು ಸೂಚಿಸಿತು.