3ನೇ ಹಂತದ ಕೋವಿಡ್-19 ಲಸಿಕೆ ಪ್ರಯೋಗ: ಜೈಡಸ್‌ ಕ್ಯಾಡಿಲಾಗೆ ಅನುಮತಿ
ಅಕ್ಷರ ಗಾತ್ರ :ಆ |ಆ |ಆ
ನವದೆಹಲಿ: ‘ತಾನು ಅಭಿವೃದ್ಧಿಪಡಿಸಿರುವ ‘ಪೆಜಿಹೆಪ್‌’ ಲಸಿಕೆಯು ಕೋವಿಡ್ ಶಮನದ ಗುಣ ಹೊಂದಿದ್ದು, ಇದರ ಮಾನವನ ಮೇಲಿನ ಮೂರನೇ ಹಂತದ ಪ್ರಯೋಗಕ್ಕೆ ಭಾರತೀಯ ಪ್ರಧಾನ ಔಷಧ ನಿಯಂತ್ರಕ (ಡಿಸಿಜಿಐ) ಇಲಾಖೆ ಅನುಮತಿ ನೀಡಿದೆ’ ಎಂದು ಜೈಡಸ್‌ ಕ್ಯಾಡಿಲಾ ಸಂಸ್ಥೆಯು ಶುಕ್ರವಾರ ತಿಳಿಸಿದೆ.
ಈ ಸಂಸ್ಥೆಯು ಲಸಿಕೆಯ ಎರಡನೇ ಹಂತದ ಪ್ರಯೋಗವನ್ನು ಕಳೆದ ತಿಂಗಳು ಪೂರ್ಣಗೊಳಿಸಿತ್ತು.
‘ಮಾನವನ ಮೇಲಿನ ಮೂರನೇ ಹಂತದ ಲಸಿಕೆ ಪ್ರಯೋಗಕ್ಕೆ ಡಿಸಿಜಿಐ ಅನುಮತಿ ನೀಡಿದೆ. ದೇಶದ 20ರಿಂದ 25 ಕೇಂದ್ರಗಳಲ್ಲಿ ಆಯ್ದ 250 ಕೋವಿಡ್ ರೋಗಿಗಳ ಮೇಲೆ ಪ್ರಯೋಗ ನಡೆಸಲಾಗುತ್ತದೆ’ ಎಂದು ಜೈಡಸ್‌ ಕ್ಯಾಡಿಲಾ ಹೇಳಿದೆ.
‘ಪೆಜಿಹೆಪ್‌’ನ ಎರಡನೇ ಹಂತದ ಪ್ರಯೋಗ ಯಶಸ್ವಿಯಾಗಿದೆ. ಈ ಲಸಿಕೆಯು ಕೊರೊನಾ ವೈರಾಣುವನ್ನು ಹತ್ತಿಕ್ಕುವ ಸಾಮರ್ಥ್ಯ ಹೊಂದಿದೆ. ಇದರಿಂದ ನಾವು ಉತ್ತೇಜಿತರಾಗಿದ್ದೇವೆ. ಲಸಿಕೆಯಿಂದ ಯಾವುದೇ ಅಡ್ಡಪರಿಣಾಮ ಆಗದಂತೆ ಎಚ್ಚರ ವಹಿಸಿದ್ದೇವೆ’ ಎಂದು ಕ್ಯಾಡಿಲಾ ಹೆಲ್ತ್‌ಕೇರ್‌ ಲಿಮಿಟೆಡ್‌ನ ನಿರ್ದೇಶಕ ಶಾರ್ವಿಲ್‌ ಪಟೇಲ್‌ ನುಡಿದಿದ್ದಾರೆ.
‘ಮೆಕ್ಸಿಕೊದಲ್ಲೂ ನಾವು ಎರಡನೇ ಹಂತದ ಪ್ರಯೋಗ ಕೈಗೊಂಡಿದ್ದೇವೆ. ಅಮೆರಿಕದಲ್ಲೂ ಕ್ಲಿನಿಕಲ್‌ ಟ್ರಯಲ್‌ ನಡೆಸುವ ಗುರಿ ಹೊಂದಿದ್ದು, ಈ ಸಂಬಂಧ ಅಮೆರಿಕದ ಆಹಾರ ಮತ್ತು ಔಷಧ ಆಡಳಿತದ (ಯುಎಸ್‌ಎಫ್‌ಡಿಎ) ಜೊತೆ ಮಾತುಕತೆ ನಡೆಸುತ್ತಿದ್ದೇವೆ’ ಎಂದೂ ಜೈಡಸ್‌ ಸಂಸ್ಥೆ ತಿಳಿಸಿದೆ.
ಪ್ರಜಾವಾಣಿ ಫೇಸ್‌ಬುಕ್ ಪುಟವನ್ನು ಲೈಕ್ ಮಾಡಿ, ಪ್ರಮುಖ ಸುದ್ದಿಗಳ ಅಪ್‌ಡೇಟ್ಸ್ ಪಡೆಯಿರಿ.
ಪ್ರಜಾವಾಣಿಯನ್ನು ಟ್ವಿಟರ್‌ನಲ್ಲಿ ಇಲ್ಲಿ ಫಾಲೋ ಮಾಡಿ.
ಟೆಲಿಗ್ರಾಂ ಮೂಲಕ ನಮ್ಮ ಸುದ್ದಿಗಳ ಅಪ್‌ಡೇಟ್ಸ್ ಪಡೆಯಲು ಇಲ್ಲಿ ಕ್ಲಿಕ್ ಮಾಡಿ.
