ಸೋಮವಾರ, ಆಗಸ್ಟ್ 19, 2019
22 °C
ಶುಭಾಶಯ ವಿನಿಮಯ ಮಾಡಿದ ಅನಿವಾಸಿ ಭಾರತೀಯರು, ನೇಪಾಳಕ್ಕೆ 30 ಆಂಬ್ಯುಲೆನ್ಸ್ ಕೊಡುಗೆ

ವಿಶ್ವದಾದ್ಯಂತ ಸಂಭ್ರಮದ ಸ್ವಾತಂತ್ರ್ಯೋತ್ಸವ

Published:
Updated:

ಬೀಜಿಂಗ್‌/ಮೆಲ್ಬರ್ನ್‌/ಇಸ್ಲಾಮಾಬಾದ್‌ : ವಿವಿಧ ದೇಶಗಳಲ್ಲಿ ನೆಲೆಸಿರುವ ಅನಿವಾಸಿ ಭಾರತೀಯರು ಗುರುವಾರ ಭಾರತದ 73ನೇ ಸ್ವಾತಂತ್ರ್ಯ ದಿನ ಆಚರಿಸಿ ಸಂಭ್ರಮಿಸಿದರು. 

ಆಸ್ಟ್ರೇಲಿಯಾ, ಚೀನಾ, ಪಾಕಿಸ್ತಾನ, ಇಂಡೊನೇಷ್ಯಾ,  ಸಿಂಗಪುರ, ಇಸ್ರೇಲ್‌ ಸೇರಿದಂತೆ ಹಲವು ದೇಶಗಳ ರಾಯಭಾರ ಕಚೇರಿಗಳಲ್ಲಿ ಸಂಭ್ರಮ ಮನೆ ಮಾಡಿತ್ತು. 

ಬೀಜಿಂಗ್‌ನ ಭಾರತದ ರಾಯಭಾರ ಕಚೇರಿಯಲ್ಲಿ ಧ್ವಜಾರೋಹಣ ನೆರವೇರಿಸಿದ ರಾಯಭಾರಿ ವಿಕ್ರಂ ಮಿಸ್ರಿ, ಚೀನಾ ಮತ್ತು ಭಾರತ ದ್ವಿಪಕ್ಷೀಯ ಸಹಕಾರ ಸಂಬಂಧದ 70ನೇ ವರ್ಷಾಚರಣೆಯ ಸಂಭ್ರಮವನ್ನೂ ಹಂಚಿಕೊಂಡರು. 

ಆಸ್ಟ್ರೇಲಿಯಾ ಪ್ರಧಾನಿ ಸ್ಕಾಟ್‌ ಮಾರಿಸನ್‌  ಭಾರತೀಯ ಸಮುದಾಯ ಉದ್ದೇಶಿಸಿ ಮಾತನಾಡಿದರು. ಮೆಲ್ಬರ್ನ್, ಕ್ಯಾನ್‌ಬೆರಾ, ಸಿಡ್ನಿ ಮತ್ತು ಪರ್ತ್‌ ನಗರಗಳಲ್ಲಿ ಹೆಚ್ಚಿನ ಸಂಖ್ಯೆಯಲ್ಲಿ ಭಾರತೀಯರು ಸೇರಿ ಸಂಭ್ರಮಪಟ್ಟರು. 

ನೇಪಾಳದಲ್ಲಿನ ಭಾರತದ ರಾಯಭಾರ ಕಚೇರಿಯು ಆಸ್ಪತ್ರೆಗಳಿಗೆ 30 ಆಂಬ್ಯುಲೆನ್ಸ್ ಮತ್ತು 4 ಬಸ್‌ಗಳನ್ನು ಕೊಡುಗೆಯಾಗಿ ನೀಡಿತು. ಇದಲ್ಲದೆ 40 ಗ್ರಂಥಾಲಯಗಳು ಮತ್ತು ಶಿಕ್ಷಣ ಸಂಸ್ಥೆಗಳಿಗೆ ಪುಸ್ತಕಗಳನ್ನು ಕೊಡುಗೆ ನೀಡಿರುವುದಾಗಿ ರಾಯಭಾರಿ ಮನ್‌ಜೀವ್‌ ಸಿಂಗ್‌ ಪುರಿ ತಿಳಿಸಿದರು. 

ಸಿಂಗಪುರದಲ್ಲಿ ಸಾವಿರಕ್ಕೂ ಹೆಚ್ಚು ಭಾರತೀಯರು  ಭಾರತದ ಐಎನ್‌ಎಸ್‌ ಸಾಗರ್‌ಧ್ವನಿ ನೌಕಾಪಡೆ ಅಧಿಕಾರಿಗಳೊಂದಿಗೆ ಸ್ವಾತಂತ್ರ್ಯೋತ್ಸವ   ಆಚರಿಸಿದರು. 

ಇಸ್ರೇಲ್‌ನಲ್ಲಿರುವ ಭಾರತದ ರಾಯಭಾರಿ ಪವನ್‌ ಕಪೂರ್‌ ಧ್ವಜರೋಹಣ ನೆರವೇರಿಸಿ ರಾಷ್ಟ್ರಪತಿ ರಾಮನಾಥ ಕೋವಿಂದ್‌ ಅವರ ಸಂದೇಶ ಓದಿದರು. 

ಇಂಡೊನೇಷ್ಯಾ ಸ್ವಾತಂತ್ರ್ಯ ದಿನದ ಜೊತೆಗೆ ಭಾರತದ ಸ್ವಾತಂತ್ರ್ಯೋತ್ಸವವನ್ನು ಅಲ್ಲಿನ ಭಾರತೀಯರು ಆಚರಿಸಿದರು. ಯುಎಇ, ಶ್ರೀಲಂಕಾ, ಬಾಂಗ್ಲಾದೇಶ, ರಷ್ಯಾ, ಒಮನ್‌ ಮತ್ತು ಥಾಯ್ಲೆಂಡ್‌ಗಳಲ್ಲೂ ಸಂಭ್ರಮ ನೆಲೆಸಿತ್ತು. 

ನೆದರ್ಲೆಂಡ್‌ನಲ್ಲೂ ಆಚರಣೆ

ದಿ ಹೇಗ್‌ನಲ್ಲಿರುವ ‘ಇಂಡಿಯಾ ಹೌಸ್‌’ನಲ್ಲಿ ದಾಖಲೆ ಸಂಖ್ಯೆಯಲ್ಲಿ ಅನಿವಾಸಿ ಭಾರತೀಯರು ಸೇರಿ, ಸ್ವಾತಂತ್ರ್ಯ ದಿನ ಆಚರಿಸಿದರು. ವಾಸೆನಾರ್‌ನ ಮೇಯರ್‌ ಕ್ಯಾರೊಲಿನ್‌ ಹಾಜರಿದ್ದರು. ನೆದರ್ಲೆಂಡ್‌ ಮತ್ತು ಭಾರತದ 400 ವರ್ಷಗಳ ಸಂಬಂಧದ ಮಹತ್ವವನ್ನು ಹಂಚಿಕೊಂಡರು.

Post Comments (+)