ಸಾಕು ಪ್ರಾಣಿಗಳಿಗೆ ಕೊರೊನಾ: ಸ್ವಚ್ಛತೆಯೇ ಮದ್ದು

ಈ ಮಧ್ಯೆ ನ್ಯೂಯಾರ್ಕ್‌ ಮೃಗಾಲಯದ ಹುಲಿಯೊಂದಕ್ಕೆ ಮಾನವ ಕೊರೊನಾ ಸೋಂಕು ತಗುಲಿರುವುದು ಬಹಿರಂಗವಾಗುತ್ತಿದ್ದಂತೆ ಆತಂಕ ಇನ್ನಷ್ಟು ಹೆಚ್ಚಿದೆ. ಕೆಮ್ಮು, ಉಸಿರಾಟದ ಸಮಸ್ಯೆ, ಮಂದ ಹಸಿವಿನಿಂದ ಬಳಲುತ್ತಿದ್ದ ಈ ಹುಲಿಯನ್ನು ಪರೀಕ್ಷೆಗೊಳಪಡಿಸಿದಾಗ ವೈರಾಣುಗಳು ಪತ್ತೆಯಾಗಿವೆ. ಮೃಗಾಲಯದ ಸೋಂಕಿತ ಸಿಬ್ಬಂದಿಯಿಂದ ಈ ವನ್ಯಜೀವಿಗೆ ಹರಡಿರಬಹುದೆಂದು ಶಂಕಿಸಲಾಗಿದೆ. ಇಂತಹ ಸುದ್ದಿಗಳ ನಡುವೆಯೆ ಸಾಕು ಪ್ರಾಣಿಗಳಿಂದ ಕೊರೊನಾ ಸೋಂಕು ಹರಡುತ್ತದೆಯೇ ಎಂಬ ಆತಂಕದ ಪ್ರಶ್ನೆ ಕೇಳಿ ಬರುತ್ತಿದೆ. ಬೆದರಿದ ಕೆಲವರು ತಾವು ಸಾಕಿದ ಮುದ್ದು ಪ್ರಾಣಿಗಳನ್ನು ದೂರ ಅಟ್ಟುತ್ತಿದ್ದಾರೆಂಬ ವರದಿಗಳಿವೆ.

ಕೊರೊನಾ ಎಂಬುದು ತುಂಬಾ ಹಿಂದೆಯೆ ಗುರುತಿಸಲಾದ ವೈರಾಣುಗಳ ಒಂದು ದೊಡ್ಡ ಗುಂಪು. ಕೆಲವು ವಿಧಗಳು ಮನುಷ್ಯರಲ್ಲಿ ಮತ್ತೆ ಕೆಲವು ಪಶು– ಪಕ್ಷಿಗಳಲ್ಲಿ ಸೋಂಕು ತರುತ್ತವೆ. ಮೂಲತಃ ಸೌಮ್ಯ ಸ್ವರೂಪದ ವ್ಯಾಧಿ ತರುವ ಈ ರೋಗಾಣುಗಳು ವಂಶವಾಹಿಯಲ್ಲಿ ಪರಿವರ್ತನೆಗೊಂಡು(ಮ್ಯುಟೇಶನ್) ತೀವ್ರ ಸೋಂಕು ಉಂಟು ಮಾಡುವ ರೂಪಕ್ಕೆ ಬದಲಾಗಿರುವುದೇ ಈಗಿನ ಪರಿಸ್ಥಿತಿಗೆ ಕಾರಣ.

*ಕೊರೊನಾ –2 ವೈರಾಣುಗಳು ಕಾಡು ಬಾವಲಿಗಳು, ಪೆಂಗೋಲಿನ್(ಇರುವೆಬಾಕ)ಗಳಿಂದ ಮಾನವನಿಗೆ ಹರಡಿರುವುದು ಇತ್ತೀಚಿನ ಅಧ್ಯಯನಗಳಿಂದ ಸಾಬೀತಾಗಿದೆ. ಆದರೆ ಈ ಪ್ರಾಣಿಜನ್ಯ ರೋಗ ಸಾಕುಪ್ರಾಣಿಗಳು, ಮುದ್ದು ಪ್ರಾಣಿಗಳಿಂದ ಬರಬಹುದು ಎಂಬುದಕ್ಕೆ ಯಾವುದೇ ಆಧಾರವಿಲ್ಲ.

*ನಾಯಿ, ಬೆಕ್ಕುಗಳಲ್ಲಿ ಸೌಮ್ಯ ಲಕ್ಷಣಗಳ ಕೊರೊನಾ ವೈರಾಣುಗಳು ಸ್ವಾಭಾವಿಕವಾಗಿ ಕಂಡು ಬಂದರೂ ಅವು ರಚನೆಯಲ್ಲಿ ಕೊರೊನಾ–2 ರೋಗಾಣುಗಳಿಗಿಂತ ವಿಭಿನ್ನವಾಗಿರುವುದರಿಂದ ಮಾನವರಿಗೆ ಸೋಂಕು ತರಲಾರವು.

*ಮಾನವ ಮತ್ತು ಪ್ರಾಣಿಗಳ ಜೀವಕೋಶಗಳ ರಚನೆಯಲ್ಲಿ ವ್ಯತ್ಯಾಸಗಳಿರುವುದರಿಂದ ನೋವೆಲ್ ಕೊರೊನಾ ವೈರಾಣುಗಳು ಮಾನವನ ದೇಹದಲ್ಲಿ ವೇಗವಾಗಿ ಬೆಳವಣಿಗೆಯಾಗುವಂತೆ ಪ್ರಾಣಿಗಳಲ್ಲಿ ವೃದ್ಧಿಯಾಗುವ ಸಾಧ್ಯತೆಗಳು ಕಡಿಮೆ. ಹಾಗಾಗಿ ಇವು ಸೋಂಕು ಹರಡುವ ಅಪಾಯವೂ ಕಮ್ಮಿ.

*ಸೋಂಕಿತ ವ್ಯಕ್ತಿಗಳ ಸಂಪರ್ಕದಲ್ಲಿರುವ ಬೆಕ್ಕು, ನಾಯಿಗಳ ಶರೀರದಲ್ಲಿ ಈ ರೋಗಾಣುಗಳು ಕಂಡು ಬಂದಿರುವ ವರದಿಗಳಿದ್ದರೂ ವೈರಾಣುಗಳ ಹೊರಮೈ ಪ್ರೊಟೀನ್ ರಚನೆ ಪ್ರಾಣಿ ಜೀವಕೋಶಕ್ಕೆ ಬೆಸೆದುಕೊಳ್ಳುವಂತೆ ಮಾರ್ಪಾಡಾಗದ ಹೊರತು ಸೋಂಕು ಹಬ್ಬಿಸುವ ಸಾಧ್ಯತೆಗಳಿಲ್ಲ. ಹಾಗಾಗಿ ಕೋವಿಡ್-19ಗೆ ಕಾರಣವಾಗುವ ವೈರಾಣುಗಳು ಮುದ್ದು ಪ್ರಾಣಿಗಳಿಂದ ಮಾನವನಿಗೆ ಹರಡುವ ಸಂಭವನೀಯತೆ ತುಂಬಾ ಕಡಿಮೆ. ಆದರೂ ಪ್ರಾಣಿಜನ್ಯ ರೋಗಗಳಿಂದ ದೂರವಿರಲು ಶುಚಿತ್ವದ ನಿಯಮಗಳನ್ನು ಕಡ್ಡಾಯವಾಗಿ ಪಾಲಿಸುವುದು ಒಳಿತು.

ಕೋವಿಡ್-19 ಇತ್ತೀಚೆಗಷ್ಟೇ ಮಾನವರಲ್ಲಿ ಕಾಣಿಸಿಕೊಂಡ ಕಾಯಿಲೆ. ಹೀಗಾಗಿ ಈ ವೈರಾಣುಗಳು ಪ್ರಾಣಿಗಳಲ್ಲಿ ತಂದೊಡ್ಡಬಹುದಾದ ಸಮಸ್ಯೆಗಳ ಬಗ್ಗೆ ಇನ್ನಷ್ಟೇ ವ್ಯಾಪಕ ಅಧ್ಯಯನಗಳು ಆಗಬೇಕಿವೆ. ಸ್ವಚ್ಛತೆಯ ನಿಯಮಗಳನ್ನು ಕಟ್ಟುನಿಟ್ಟಾಗಿ ಪಾಲಿಸುವುದು ಸಂಭವನೀಯ ಅಪಾಯಗಳಿಂದ ದೂರವಿರುವ ಉತ್ತಮ ಮಾರ್ಗ.

(ಲೇಖಕರು, ಮುಖ್ಯ ಪಶುವೈದ್ಯಾಧಿಕಾರಿ, ತೀರ್ಥಹಳ್ಳಿ)