‘ಈ ಬಾರಿ ಕೋವಿಡ್ ಪರಿಸ್ಥಿತಿಯಲ್ಲಿ ಸೂಕ್ತ ಮುಂಜಾಗ್ರತಾ ಕ್ರಮ ಕೈಗೊಂಡು ಚುನಾವಣೆ ನಡೆಸಬೇಕಾಗಿದೆ.
ಹೀಗಾಗಿ, ಇಷ್ಟು ದೊಡ್ಡ ಮೊತ್ತದ ಅಗತ್ಯವಿದೆ’ ಎಂದು ಪತ್ರದಲ್ಲಿ ಆಯೋಗ ವಿವರಿಸಿದೆ. ಈ ಸಾರ್ವತ್ರಿಕ ಚುನಾವಣೆಗೆ ಈಗಾಗಲೇ ಬಿಡುಗಡೆ ಮಾಡಿರುವ ₹ 100 ಕೋಟಿ ಅನುದಾನದಲ್ಲಿ, ಮತದಾರರ ಪಟ್ಟಿಯ ಮುದ್ರಣಕ್ಕೆ ತಗಲುವ ವೆಚ್ಚ ಮತ್ತು ಇತರ ಚುನಾವಣಾ ವೆಚ್ಚಗಳಿಗಾಗಿ ಜಿಲ್ಲಾಧಿಕಾರಿಗಳಿಗೆ ₹ 68. 75 ಕೋಟಿ ನೀಡಲಾಗಿದೆ. ಉಳಿದಂತೆ, ಕೋವಿಡ್ ಕಾರಣದಿಂದ ಚುನಾವಣೆ ಸಂದರ್ಭದಲ್ಲಿ ಮುನ್ನೆಚ್ಚರಿಕೆ ಕ್ರಮಗಳನ್ನು ವಹಿಸುವ ಉದ್ದೇಶದಿಂದ ಕೋವಿಡ್ ಸಾಮಗ್ರಿಗಳ ಖರೀದಿಗೆ ₹ 20 ಕೋಟಿ, ಮತಪತ್ರಗಳ ಮುದ್ರಣಕ್ಕೆ ಮ್ಯಾಪ್ಲಿಥೊ ಕಾಗದ ಖರೀದಿಗೆ ₹ 1.07 ಕೋಟಿ, ಸರ್ಕಾರಿ ಮುದ್ರಣಾಲಯಕ್ಕೆ ಅಂದಾಜು ₹ 3 ಕೋಟಿ ಸೇರಿ ಒಟ್ಟು ₹ 24.07 ಕೋಟಿಯನ್ನು ಶೀಘ್ರದಲ್ಲೇ ಬಿಡುಗಡೆಗೆ ಮಾಡಲಾಗುವುದು. ಬಾಕಿ ₹ 7.18 ಕೋಟಿ ಮಾತ್ರ ಇದೆ. ಹೀಗಾಗಿ, ಬಿಡುಗಡೆಗೆ ಬಾಕಿ ಇರುವ ಹಣವನ್ನು (₹ 105.34 ಕೋಟಿ) ತುರ್ತು ಆಗಿ ಬಿಡುಗಡೆ ಮಾಡಬೇಕು ಎಂದೂ ಪತ್ರದಲ್ಲಿ ಆಯೋಗ ಕೋರಿದೆ.