ಡ್ರಗ್ಸ್ ಜಾಲ; ಮತ್ತೊಬ್ಬ ಪೆಡ್ಲರ್ ಬಂಧನ

‘ನೈಜೀರಿಯಾದ ಒಸ್ಸೆ, ನಗರದಲ್ಲಿ ವಾಸವಿದ್ದುಕೊಂಡು ಕೆಲ ಪಾರ್ಟಿಗಳಿಗೆ ಹಾಗೂ ಗ್ರಾಹಕರಿಗೆ ಡ್ರಗ್ಸ್ ಪೂರೈಕೆ ಮಾಡುತ್ತಿದ್ದ. ಪ್ರಕರಣದಡಿ ಬಂಧಿಸಲಾಗಿರುವ ಆರೋಪಿಗಳು ನೀಡಿದ್ದ ಹೇಳಿಕೆ ಆಧರಿಸಿ ಆತನನ್ನು ಬಂಧಿಸಲಾಗಿದೆ’ ಎಂದು ಸಿಸಿಬಿಯ ಅಧಿಕಾರಿಯೊಬ್ಬರು ಹೇಳಿದರು.

‘ಅಂತರರಾಷ್ಟ್ರೀಯ ಡ್ರಗ್ಸ್ ಜಾಲದ ಬಗ್ಗೆ ಕಾಟನ್‌ಪೇಟೆ ಠಾಣೆಯಲ್ಲಿ ಪ್ರಕರಣ ದಾಖಲಾಗಿತ್ತು. ಡ್ರಗ್ಸ್ ಪೆಡ್ಲರ್‌ಗಳಾದ ಲೋಮ್ ಪೆಪ್ಪರ್ ಹಾಗೂ ಸಿಮೋನ್ ಎಂಬುವರನ್ನು ಬಂಧಿಸಿ, ಡ್ರಗ್ಸ್ ಜಪ್ತಿ ಮಾಡಲಾಗಿತ್ತು. ಅವರಿಬ್ಬರ ಜೊತೆಯಲ್ಲೂ ಒಸ್ಸೆ ಸಂಪರ್ಕವಿಟ್ಟುಕೊಂಡು ಡ್ರಗ್ಸ್ ದಂಧೆ ನಡೆಸುತ್ತಿದ್ದ.’

‘ಗೋವಾ ಹಾಗೂ ಮುಂಬೈನಿಂದ ಕಳ್ಳ ಸಾಗಣೆ ಮೂಲಕ ಡ್ರಗ್ಸ್ ನಗರಕ್ಕೆ ಬರುತ್ತಿತ್ತು. ಅದನ್ನೇ ಆರೋಪಿ ಒಸ್ಸೆ, ಪರಿಚಯಸ್ಥ ಗ್ರಾಹಕರಿಗೆ ಹಾಗೂ ಉಪ ಪೆಡ್ಲರ್‌ಗಳಿಗೆ ಕೊಡುತ್ತಿದ್ದ. ಡ್ರಗ್ಸ್ ಜಾಲ ಪ್ರಕರಣದ ಬಹುತೇಕ ಆರೋಪಿಗಳಿಗೂ ಒಸ್ಸೆ ಡ್ರಗ್ಸ್ ಸರಬರಾಜು ಮಾಡಿದ್ದು ತನಿಖೆಯಿಂದ ಗೊತ್ತಾಗಿದೆ. ಈ ಬಗ್ಗೆ ಆತನೇ ತಪ್ಪೊಪ್ಪಿಕೊಂಡಿದ್ದಾನೆ’ ಎಂದು ಹೇಳಿದರು.

ಮಾಹಿತಿ ಸಂಗ್ರಹ; ‘ಒಸ್ಸೆ ಕಡೆಯಿಂದ ಡ್ರಗ್ಸ್ ಖರೀದಿಸಿದ್ದ ಗ್ರಾಹಕರ ಮಾಹಿತಿ ಸಂಗ್ರಹಿಸಲಾಗುತ್ತಿದೆ. ಅವರ ವಿರುದ್ಧವೂ ಕಾನೂನು ಕ್ರಮ ಕೈಗೊಳ್ಳಲಾಗುವುದು’ ಎಂದೂ ಅಧಿಕಾರಿ ತಿಳಿಸಿದರು.