ಮಂಗಳವಾರ, ಅಕ್ಟೋಬರ್ 27, 2020
20 °C
ಮೊಬೈಲ್‌ ಇಲ್ಲದ, ವಾಟ್ಸ್‌ಆ್ಯಪ್‌ ಬಳಸದ ಮಕ್ಕಳಿಗೆ ಅನುಕೂಲ

ಶನಿವಾರಸಂತೆ: ವಿದ್ಯಾಗಮ ತರಗತಿಗೆ ವಿನೂತನ ಕಲಿಕಾ ಕಾರ್ಡ್‌..!

ಪ್ರಜಾವಾಣಿ ವಾರ್ತೆ Updated:

ಅಕ್ಷರ ಗಾತ್ರ : | |

Prajavani

ಶನಿವಾರಸಂತೆ: ಸಮೀಪದ ಮುಳ್ಳೂರು ಗ್ರಾಮದ ಸರ್ಕಾರಿ ಕಿರಿಯ ಪ್ರಾಥಮಿಕ ಶಾಲೆಯ ವಿದ್ಯಾರ್ಥಿಗಳಿಗೆ ಗ್ರಾಮದ ಅಯ್ಯಪ್ಪ ದೇಗುಲದ ಆವರಣದಲ್ಲಿ ಶಿಕ್ಷಕ ಸಿ.ಎಸ್.ಸತೀಶ್ ’ವಿದ್ಯಾಗಮ‘ ತರಗತಿ ನಡೆಸುತ್ತಿದ್ದಾರೆ.

ವಿದ್ಯಾಗಮ ತರಗತಿಗಾಗಿ ಸತೀಶ್‌ ಅವರು ವಿನೂತನ ಕಲಿಕಾ ಕಾರ್ಡ್‌ ಸಿದ್ಧಪಡಿಸಿದ್ದಾರೆ. ವಾಯಿಸ್‌ ರೆಕಾರ್ಡಿಂಗ್‌ ಸೇರಿದಂತೆ ತಂತ್ರಜ್ಞಾನದ ನೆರವು ಪಡೆದುಕೊಂಡಿದ್ದಾರೆ. ಇದರಿಂದ ಕಲಿಸುವಿಕೆ ಮತ್ತು ಕಲಿಕೆ ಪರಿಣಾಮಕಾರಿಯಾಗಿದೆ.  ವಿದ್ಯಾರ್ಥಿಗಳ ಮನೆಮನೆಗೆ ತೆರಳಿ ತಾವು ಸಿದ್ಧಪಡಿಸಿದ ಕಲಿಕಾ ಕಾರ್ಡ್‌ಗಳನ್ನು ಸತೀಶ್‌ ಅವರು ಕೊಟ್ಟು ಬಂದಿದ್ದಾರೆ.

ಮೊಬೈಲ್, ಇಂಟರ್‌ನೆಟ್‌ ಸೌಲಭ್ಯ ಹೊಂದಿರುವ ವಿದ್ಯಾರ್ಥಿಗಳಿಗೆ ವಾಟ್ಸ್‌ಆ್ಯಪ್‌ ಮೂಲಕ ಹಾಗೂ ಇಂಟರ್‌ನೆಟ್‌ ಇಲ್ಲದ ಮಕ್ಕಳಿಗೆ ಮೊಬೈಲ್‌  ಕಾನ್ಫರೆನ್ಸ್ ಕಾಲ್ ಮೂಲಕ ಬೋಧನೆ  ನಡೆಯುತ್ತಿದೆ. ಮೊಬೈಲ್ ಇಲ್ಲದ ಮಕ್ಕಳಿಗೆ ಕಲಿಕಾ ಕಾರ್ಡ್‌ಗಳನ್ನು ನೀಡಿ ಕಲಿಸಲಾಗುತ್ತಿದೆ.

ಸದ್ಯ ವಿದ್ಯಾಗಮ ತರಗತಿಗಳು ಸಮುದಾಯ ಭವನ, ದೇವಾಲಯ, ಬಯಲು, ವಠಾರಗಳಲ್ಲಿ ನಡೆಯುತ್ತಿವೆ. ಇಲ್ಲಿ ಅಗತ್ಯ ಕಲಿಕಾ ಸಾಮಾಗ್ರಿಗಳಾದ ಕಪ್ಪುಹಲಗೆ, ಸೀಮೆಸುಣ್ಣ, ಡಸ್ಟರ್, ಚಾರ್ಟ್ ಬಳಸಿ ಕಲಿಸಲು ಕಷ್ಟವಾಗುತ್ತಿದೆ. ಸಾಮಾನ್ಯವಾಗಿ ಶಿಕ್ಷಕರು ಕನಿಷ್ಠ ಎರಡು ಕಲಿಕಾ ಸಾಮಾಗ್ರಿಗಳನ್ನಾದರೂ ಬಳಸಿ ಪಾಠ ಮಾಡಬೇಕು. ವಿದ್ಯಾಗಮ ತರಗತಿಯಲ್ಲಿ ಮೊಬೈಲ್‌ ಇಲ್ಲದ ಮಕ್ಕಳಿಗೆ ಈ ಕಲಿಕಾ ಕಾರ್ಡ್‌ಗಳೇ ಮುಖ್ಯ ಕಲಿಕಾ ಸಾಮಗ್ರಿ ಆಗಿದೆ.

ಮುಳ್ಳೂರು ಗ್ರಾಮದ ಅಯ್ಯಪ್ಪ ದೇವಾಲಯದ ವಿಶಾಲ ಆವರಣವನ್ನೇ ಶಿಕ್ಷಕ ಸತೀಶ್‌ ವರು ಶಾಲೆಯಾಗಿ ಪರಿವರ್ತಿಸಿದ್ದಾರೆ. ಹಳೆಯ ತಗಡಿನ ಶೀಟ್‌ಗೆ ಕಪ್ಪು ಬಣ್ಣ ಬಳಿದು,  ಅದನ್ನೇ ಕಪ್ಪು ಹಲಗೆಯಾಗಿ ಬಳಸುತ್ತಿದ್ದಾರೆ. ಮಕ್ಕಳು ಮಾಸ್ಕ್ ಧರಿಸಿ, ಸ್ಯಾನಿಟೈಸರ್ ಬಳಸಿ, ಅಂತರ ಕಾಯ್ದುಕೊಂಡು ಅಭ್ಯಾಸ ಮಾಡಲು ಸೂಕ್ತ ವ್ಯವಸ್ಥೆ ಕಲ್ಪಿಸಲಾಗಿದೆ. ನೆರಳಿಗಾಗಿ ಶೆಡ್ ನೆಟ್ ಅಳವಡಿಸಲಾಗಿದೆ. ಕೂರಲು ಚಾಪೆಗಳನ್ನು ಬಳಸಿದ್ದಾರೆ. ಇದರಿಂದ ಇದು ಗುರುಕುಲ ಮಾದರಿ ಶಿಕ್ಷಣದಂತೆ ಕಾಣುತ್ತದೆ.

 

ಪ್ರಜಾವಾಣಿ ಫೇಸ್‌ಬುಕ್ ಪುಟವನ್ನು ಲೈಕ್ ಮಾಡಿ, ಪ್ರಮುಖ ಸುದ್ದಿಗಳ ಅಪ್‌ಡೇಟ್ಸ್ ಪಡೆಯಿರಿ.

ಪ್ರಜಾವಾಣಿಯನ್ನು ಟ್ವಿಟರ್‌ನಲ್ಲಿ ಇಲ್ಲಿ ಫಾಲೋ ಮಾಡಿ.

ಟೆಲಿಗ್ರಾಂ ಮೂಲಕ ನಮ್ಮ ಸುದ್ದಿಗಳ ಅಪ್‌ಡೇಟ್ಸ್ ಪಡೆಯಲು ಇಲ್ಲಿ ಕ್ಲಿಕ್ ಮಾಡಿ.

ಈ ವಿಭಾಗದಿಂದ ಇನ್ನಷ್ಟು