ಮತದಾನ ಮಾಡಲು ಹೊರಟ ವಾರ್ಡ್ ನಂ 4ರ ಸದಸ್ಯೆ ಚಾಂದಿನಿ ನಾಯ್ಕ ಅವರನ್ನುಪುರಸಭೆ ಕಚೇರಿ ಎದುರು ನೆರೆದಿದ್ದ ಬಿಜೆಪಿ ಬೆಂಬಲಿಗರು ತಡೆಯಲು ಮುಂದಾಗಿದ್ದಾರೆ. ಚಾಂದಿನಿ ಅವರನ್ನು ಅಡ್ಡಗಟ್ಟಿ ವಾಪಸ್ ಹೋಗುವಂತೆ ತಳ್ಳಾಡಿದ್ದಾರೆ. ಗುಂಪಿನ ನಡುವೆ ಸಿಲುಕಿ ಒದ್ದಾಡುವ ಆಕೆ ರಕ್ಷಣೆಗಾಗಿ ಕೂಗಿಕೊಳ್ಳುತ್ತಾರೆ. ಈ ವೇಳೆ ಪೊಲೀಸರು ಮಧ್ಯಪ್ರವೇಶಿಸಿ ಸದಸ್ಯೆಯನ್ನು ಒಳಗೆ ಕರೆದೊಯ್ಯಲು ಮುಂದಾಗಿದ್ದು, ಬಾಗಿಲಿನಲ್ಲಿ ಎದುರಾಗುವ ಶಾಸಕ ಸಿದ್ದು ಸವದಿ ಸದಸ್ಯೆಯ ತಡೆಯುತ್ತಾರೆ. ಆಗ ತಳ್ಳಾಟ ನಡೆದು ಚಾಂದಿನಿ ಮೆಟ್ಟಿಲಿನಿಂದ ಉರುಳಿ ಬೀಳುತ್ತಾರೆ. ಆಕೆಯನ್ನು ಎತ್ತಿದ ಪೊಲೀಸರು ರಕ್ಷಣೆಯಲ್ಲಿ ಒಳಗೆ ಕರೆದೊಯ್ಯುತ್ತಾರೆ. ಆಗಲೂ ನೂಕಾಟ–ತಳ್ಳಾಟ ನಡೆಯುವ ದೃಶ್ಯ ವಿಡಿಯೊದಲ್ಲಿ ದಾಖಲಾಗಿದೆ.