ಯಡಿಯೂರಪ್ಪ ಕುಳಿತಿದ್ದ ಹೆಲಿಕಾಪ್ಟರ್ ಲ್ಯಾಂಡಿಂಗ್ ವೇಳೆ ತಪ್ಪಿದ ಅನಾಹುತ

ಜೇವರ್ಗಿಯಲ್ಲಿ ಆಯೋಜಿಸಲಾಗಿದ್ದ ಬಿಜೆಪಿ ವಿಜಯ ಸಂಕಲ್ಪ ಯಾತ್ರೆಗೆ ಯಡಿಯೂರಪ್ಪ ಅವರನ್ನು ಕರೆ ತರುತ್ತಿದ್ದ ಹೆಲಿಕಾಪ್ಟರ್ ವಿಜಯಪುರ-ಕಲಬುರಗಿ ರಸ್ತೆ ಬದಿಯ ಜಮೀನಿನಲ್ಲಿ ಇಳಿಯಬೇಕಿತ್ತು. ಹೆಲಿಕಾಪ್ಟರ್ ಬರುತ್ತಿದ್ದಂತೆಯೇ ಸಮೀಪದ ಜಮೀನಿನಲ್ಲಿನ ಮೆಣಸಿನಕಾಯಿ ಮತ್ತು ಚಪ್ಪರದ ಮೇಲೆ ಹೊದಿಸಿದ್ದ ತಾಡಪತ್ರಿಗಳು ಹಾರಿದವು. ಜೊತೆಗೆ ಪ್ಲಾಸ್ಟಿಕ್‌ ಬ್ಯಾರೆಲ್, ಹೆಲ್ಮೆಟ್ ಮತ್ತು ಪ್ಲಾಸ್ಟಿಕ್ ಚೀಲಗಳು ಗಾಳಿಯಲ್ಲಿ ತೇಲಾಡಿದವು.

ಇದೆಲ್ಲವನ್ನೂ ಗಮನಿಸಿದ ಪೈಲಟ್‌ ತಕ್ಷಣವೇ ಹೆಲಿಕಾಪ್ಟರ್‌ ಇಳಿಸದೇ ಮೇಲ್ಮುಖವಾಗಿ ಹಾರಿಸಿದರು. ಒಂದು ಸುತ್ತು ಹಾಕಿದ ಬಳಿಕ ಹೆಲಿಪ್ಯಾಡ್‌ನ ಮತ್ತೊಂದು ಭಾಗದಲ್ಲಿ, ನಿಧಾನವಾಗಿ ಇಳಿಸಿದರು. ಯಡಿಯೂರಪ್ಪ ಅವರು ಸುರಕ್ಷಿತವಾಗಿ ಹೊರಬಂದರು.

ಘಟನೆಯಿಂದ ಅಧಿಕಾರಿಗಳು, ಪೊಲೀಸರು ಗೊಂದಲಕ್ಕೆ ಒಳಗಾದರು. ಕೆಲ ಹೊತ್ತು ಆತಂಕದ ವಾತಾವರಣ ನಿರ್ಮಾಣ ಆಗಿತ್ತು. ‘ಸೂಕ್ತ ಸುರಕ್ಷತಾ ಕ್ರಮ ಕೈಗೊಳ್ಳಲಾಗಿಲ್ಲ. ಭದ್ರತಾ ಲೋಪ ಆಗಿದೆ’ ಎಂದು ಸ್ಥಳೀಯರು ಆರೋಪಿಸಿದರು.

‘ಮಾಜಿ ಮುಖ್ಯಮಂತ್ರಿಗಳಿಗೂ ಶಿಷ್ಟಾಚಾರ ಅನ್ವಯಿಸುತ್ತದೆ. ಲೋಕೋಪಯೋಗಿ ಇಲಾಖೆಯವರು ಹೆಲಿಪ್ಯಾಡ್‌ ಸುತ್ತಲಿನ ಜಾಗ ಶುಚಿಗೊಳಿಸಿ ನಿರ್ವಹಣೆ ಮಾಡಬೇಕು. ಇದರ ಬಗ್ಗೆ ಇಲಾಖೆಯಿಂದ ವಿವರಣೆ ಪಡೆದು, ಮುಂದಿನ ಕ್ರಮ ತೆಗೆದುಕೊಳ್ಳುತ್ತೇವೆ’ ಎಂದು ಜಿಲ್ಲಾಧಿಕಾರಿ ಯಶವಂತ‌ ವಿ. ಗುರುಕರ್ ‘ಪ್ರಜಾವಾಣಿ’ಗೆ ತಿಳಿಸಿದರು.