ಬೆಂಗಳೂರು: ಮಳೆ ಹಾನಿಯಿಂದ ನಿರಂತರವಾಗಿ ಏರಿಕೆ ಕಂಡಿರುವ ಟೊಮೆಟೊ ದರ ಸೋಮವಾರ ಶತಕ ದಾಟಿದೆ. ಸಗಟು, ಚಿಲ್ಲರೆ ಹಾಗೂ ಹಾಪ್ಕಾಮ್ಸ್ನಲ್ಲೂ ಟೊಮೆಟೊ ಕೆ.ಜಿಗೆ ₹100 ಹಾಗೂ ಅದಕ್ಕಿಂತ ಹೆಚ್ಚಿನ ದರದಲ್ಲಿ ಮಾರಾಟವಾಗಿದೆ.
ಇತ್ತೀಚೆಗೆ ಸುರಿದ ಭಾರಿ ಮಳೆಯಿಂದಾಗಿ ಬಹುತೇಕ ತರಕಾರಿಗಳ ದರ 15 ದಿನಗಳಿಂದ ಏರಿಕೆ ಕಂಡಿವೆ. ಎರಡು ದಿನಗಳ ಹಿಂದೆ ಟೊಮೆಟೊ ದರ ₹70ರಷ್ಟಿತ್ತು. ಸೋಮವಾರದ ವೇಳೆಗೆ ದರ ದಿಢೀರ್ ಏರಿದ್ದು, ಚಿಲ್ಲರೆ ಮಳಿಗೆಗಳಲ್ಲಿಕೆ.ಜಿ.ಗೆ ₹150ರಂತೆ ಮಾರಾಟವಾಗಿದೆ. ಹಾಪ್ಕಾಮ್ಸ್ನಲ್ಲೂ ಟೊಮಟೊ ದರ ₹100ಕ್ಕೆ ಏರಿದೆ.
‘ಕಳೆದ ವಾರದಿಂದ ಟೊಮೆಟೊ ದರ ಏರುತ್ತಿದ್ದು, ಈ ಹೆಚ್ಚಳ ಮುಂದುವರಿದಿದೆ. ಗುಣಮಟ್ಟದ ಹಣ್ಣುಗಳ ಸಗಟು ದರವು ಸೋಮವಾರ ಪ್ರತಿ ಕೆ.ಜಿಗೆ ₹100ರವರೆಗೆ ತಲುಪಿದೆ’ ಎಂದು ಯಶವಂತಪುರ ಎಪಿಎಂಸಿ ಪ್ರಾಂಗಣದ ಕೆಂಪೇಗೌಡ ತರಕಾರಿ ಮಾರುಕಟ್ಟೆಯ ಅಧ್ಯಕ್ಷ ಗೋವಿಂದಪ್ಪ ಮಾಹಿತಿ ನೀಡಿದರು.
‘ಎಲ್ಲ ತರಕಾರಿ ದರಗಳು ಗಣನೀಯವಾಗಿ ಏರುತ್ತಿವೆ. ₹10ರಷ್ಟಿದ್ದ ಬದನೆಕಾಯಿ ದರ ₹70ಕ್ಕೇರಿದೆ. ಸೊಪ್ಪಿನ ದರಗಳೂ ಗಗನಮುಖಿಯಾಗಿವೆ. ಧಾರಾಕಾರ ಮಳೆಯಿಂದ ಮಾರುಕಟ್ಟೆಗಳಲ್ಲಿ ತರಕಾರಿಗಳ ಅಭಾವ ಸೃಷ್ಟಿಯಾಗಿದೆ. ಇದರಿಂದಲೇ ದರ ದುಪ್ಪಟ್ಟಾಗುತ್ತಿದೆ. ಸದ್ಯಕ್ಕೆ ಮಳೆ ಬಿಡುವು ಕೊಟ್ಟಿದೆ. ಮಳೆ ಮುಂದುವರಿದರೆ ತರಕಾರಿಗಳ ದರ ತಗ್ಗಲು ತಿಂಗಳಿಗೂ ಹೆಚ್ಚಿನ ಸಮಯ ಬೇಕಾಗಬಹುದು’ ಎಂದರು.