ಮೆಟ್ರೊ ಸ್ಮಾರ್ಟ್‌ ಕಾರ್ಡ್‌ ರಿಚಾರ್ಜ್‌: ನಾನಾ ಸಮಸ್ಯೆ

7
ತಾಂತ್ರಿಕ ದೋಷದ ಕಾರಣ ಕಾರ್ಯನಿರ್ವಹಿಸದ ಕಾರ್ಡ್‌ ಸ್ವೈಪ್‌ ಯಂತ್ರ

ಮೆಟ್ರೊ ಸ್ಮಾರ್ಟ್‌ ಕಾರ್ಡ್‌ ರಿಚಾರ್ಜ್‌: ನಾನಾ ಸಮಸ್ಯೆ

Published:
Updated:
Deccan Herald

ಬೆಂಗಳೂರು: ‘ನಮ್ಮ ಮೆಟ್ರೊ’ ಸ್ಮಾರ್ಟ್‌ ಕಾರ್ಡ್‌ಗಳಿಗೆ ರಿಚಾರ್ಜ್‌ ಮಾಡಲು ಪ್ರಯಾಣಿಕರು ನಾನಾ ಸಮಸ್ಯೆ ಎದುರಿಸುತ್ತಿದ್ದಾರೆ. ಮೆಟ್ರೊ ನಿಲ್ದಾಣಗಳಲ್ಲಿನ ಕಾರ್ಡ್‌ ಸ್ವೈಪಿಂಗ್‌ ಯಂತ್ರಗಳಲ್ಲಿ ಪದೇ ಪದೇ ತಾಂತ್ರಿಕ ದೋಷ ಕಾಣಿಸಿಕೊಳ್ಳುತ್ತಿದೆ.

‘ಈ ಯಂತ್ರಗಳು ಡೆಬಿಟ್‌ ಕಾರ್ಡ್‌ ಸ್ವೀಕರಿಸುತ್ತಿಲ್ಲ. ಹಾಗಾಗಿ ನಮಗೂ ಸಮಸ್ಯೆಯಾಗುತ್ತಿದೆ’ ಎಂದು ನಿಲ್ದಾಣಗಳ ಗ್ರಾಹಕ ಸೇವಾ ವಿಭಾಗದ ಸಿಬ್ಬಂದಿ ಅಸಹಾಯಕತೆ
ವ್ಯಕ್ತಪಡಿಸಿದರು. 

‘ಮೆಜೆಸ್ಟಿಕ್‌ನ ನಾಡಪ್ರಭು ಕೆಂಪೇಗೌಡ ನಿಲ್ದಾಣದಲ್ಲಿ ಒಂದು ಗ್ರಾಹಕ ಸೇವಾ ಕೇಂದ್ರದಲ್ಲಿ ಮಾತ್ರ ಡೆಬಿಟ್‌ ಕಾರ್ಡ್‌ ಸ್ವೀಕರಿಸಲಾಗುತ್ತದೆ. ಬಹುತೇಕ ನಿಲ್ದಾಣಗಳ ಕೇಂದ್ರದಲ್ಲಿ ಈ ಸೇವೆ ಬಹಳ ಕಾಲದಿಂದ ಸ್ಥಗಿತಗೊಂಡಿದೆ’ ಎಂದು ಪ್ರಯಾಣಿಕರೊಬ್ಬರು ದೂರಿದರು. 

‘ಬೆಂಗಳೂರು ಮೆಟ್ರೊ ರೈಲು ನಿಗಮ (ಬಿಎಂಆರ್‌ಸಿಎಲ್‌) ಟೊಕನ್‌ ಬದಲು ಸ್ಮಾರ್ಟ್‌ ಕಾರ್ಡ್‌ ಬಳಸಿ ಎಂದು ಉತ್ತೇಜಿಸುತ್ತಿದೆ. ಆದರೆ, ಡೆಬಿಟ್‌ ಕಾರ್ಡ್‌ ಬಳಕೆ ಸಂಬಂಧ ಎದುರಾಗಿರುವ ಸಮಸ್ಯೆ ನಿವಾರಿಸುವಲ್ಲಿ ಮಾತ್ರ ಇನ್ನೂ  ‘ಸ್ಮಾರ್ಟ್‌’ ಆಗಿಲ್ಲ’ ಎಂದು ಪ್ರಯಾಣಿಕ ರವೀಂದ್ರ ದೂರಿದರು. ಎಂ.ಜಿ.ರಸ್ತೆ ನಿಲ್ದಾಣದಲ್ಲಿ ತಮ್ಮ ಕಾರ್ಡ್‌ಗೆ ರಿಚಾರ್ಜ್‌ ಮಾಡಿಸಿಕೊಳ್ಳಲು ಅವರು ಸುಮಾರು ಹೊತ್ತು ಕಾದು ನಿಂತಿದ್ದರು.  

‘ಕಾರ್ಡ್‌ ಸ್ವೀಕರಿಸುವುದಿಲ್ಲ ಎಂದು ಇಲ್ಲಿಗೆ ಬಂದಾಗಲಷ್ಟೇ ಗೊತ್ತಾಗುತ್ತದೆ. ಆಗ ಸಮೀಪದಲ್ಲಿರುವ ಎಟಿಎಂನಿಂದ ನಗದು ಪಡೆದು ಹಣ ಪಾವತಿಸುತ್ತೇವೆ. ನಾವು ಖಾತೆ ಹೊಂದಿರುವ ಬ್ಯಾಂಕ್‌ನ ಎಟಿಎಂ ಇಲ್ಲಿಲ್ಲ. ಅನ್ಯ ಬ್ಯಾಂಕ್‌ಗಳ ಎಟಿಎಂನಿಂದ ಹಣ ಪಡೆದರೆ ಹೆಚ್ಚುವರಿ ಸೇವಾ ಶುಲ್ಕ ಕಟ್ಟಬೇಕಾಗುತ್ತದೆ. ಇದರಿಂದ ನಮಗೆ ಅನಗತ್ಯ ಹೊರೆ’ ಎಂದು ಅವರು ಬೇಸರ ವ್ಯಕ್ತಪಡಿಸಿದರು. 

‘ನಮ್ಮಲ್ಲೂ ಕಾರ್ಡ್‌ ಸ್ವೀಕರಿಸುತ್ತಿದ್ದೆವು. ಆದರೆ, ಕಾರ್ಡ್‌ ಸ್ವೈಪ್‌ ಮಾಡುವ ಯಂತ್ರಗಳು ಮೂರು ದಿನಗಳಿಂದ ಸರಿಯಾಗಿ ಕಾರ್ಯ ನಿರ್ವಹಿಸುತ್ತಿಲ್ಲ. ಈ ಸಮಸ್ಯೆಯನ್ನು ಹಿರಿಯ ಅಧಿಕಾರಿಗಳ ಗಮನಕ್ಕೆ ತಂದಿದ್ದೇವೆ’ ಎಂದು ಎಂ.ಜಿ.ರಸ್ತೆ ನಿಲ್ದಾಣದ ಸಿಬ್ಬಂದಿ ಹೇಳಿದರು. 

ಈ ಬಗ್ಗೆ ಪ್ರತಿಕ್ರಿಯಿಸಿದ ನಿಗಮದ ಕಾರ್ಯಾಚರಣೆ ಮತ್ತು ನಿರ್ವಹಣಾ ವಿಭಾಗದ ಕಾರ್ಯನಿರ್ವಾಹಕ ನಿರ್ದೇಶಕ ಶಂಕರ್‌, ‘ಡೆಬಿಟ್‌ ಕಾರ್ಡ್‌ ಮೂಲಕ ಹಣ ಪಾವತಿ ಸಂಬಂಧಿಸಿದಂತೆ ಕೆಲವು ನಿಲ್ದಾಣಗಳಲ್ಲಿ ಸಮಸ್ಯೆ ಇದೆ. ಪಿಒಎಸ್‌ ಯಂತ್ರ ಅಳವಡಿಸುವ ಬಗ್ಗೆ ನಿಗಮವು ಐಸಿಐಸಿಐ ಬ್ಯಾಂಕ್‌ ಮತ್ತು ಫೆಡರಲ್‌ ಬ್ಯಾಂಕ್‌ ಜತೆ ಒಪ್ಪಂದ ಮಾಡಿಕೊಂಡಿದ್ದೇವೆ. ಈ ಪೈಕಿ ಫೆಡರಲ್‌ ಬ್ಯಾಂಕ್‌ ಮೂಲಕ ಅಳವಡಿಸಲಾದ ಯಂತ್ರಗಳು ಕೈಕೊಟ್ಟಿವೆ. ಸಮಸ್ಯೆಯನ್ನು ಬ್ಯಾಂಕ್‌ ಅಧಿಕಾರಿಗಳ ಗಮನಕ್ಕೆ ತಂದಿದ್ದೇವೆ. ಇನ್ನೊಮ್ಮೆ ಮಾತನಾಡಿ ಪರಿಹರಿಸಲು ಪ್ರಯತ್ನಿಸುತ್ತೇವೆ’ ಎಂದರು.

ಬರಹ ಇಷ್ಟವಾಯಿತೆ?

  • 2

    Happy
  • 0

    Amused
  • 1

    Sad
  • 1

    Frustrated
  • 4

    Angry

Comments:

0 comments

Write the first review for this !