ಲಾಸ್ಯ ನೃತ್ಯ ಸ೦ಭ್ರಮ

ಲಾಸ್ಯ ಅಕಾಡೆಮಿ ಆಫ್ ಡ್ಯಾನ್ಸ್ ಸ೦ಸ್ಥೆಯ 8ನೇ ವಾರ್ಷಿಕೋತ್ಸವ ಪ್ರಯುಕ್ತ ಶಾಸ್ತ್ರೀಯ ನೃತ್ಯ ಪ್ರಕಾರಗಳ ಉತ್ಸವ ಸೇವಾಸದನ ಸಭಾ೦ಗಣದಲ್ಲಿ ನಡೆಯಿತು. ಮೋಹಿನಿ ಆಟ್ಟ೦, ಭರತನಾಟ್ಯ ಮತ್ತು ಕಥಕ್‌ ನೃತ್ಯಗಳ ಪ್ರದರ್ಶನ ಪ್ರೇಕ್ಷಕರ ಮನಸೂರೆಗೊಂಡಿತು.

ಕಲಾವಿದೆ ಡಾ.ಶಾಲಿನಿ ಕೃಷ್ಣನ್ ಅವರು ಶಿವ ಪಂಚಾಕ್ಷರಿ ಮಂತ್ರ ‘ಓ೦ ನಮಃ ಶಿವಾಯ’ (ರಾಗ ಮಾಲಿಕಾ, ಆದಿ  ತಾಳ) ಮೋಹಿನಿ ಆಟ್ಟ೦ ಪ್ರಸ್ತುತಪಡಿಸಿದರು. ನೃತ್ಯವು ನೈಜವಾಗಿತ್ತು ಮಾತ್ರವಲ್ಲದೆ ಚೈತನ್ಯಭರಿತವಾಗಿತ್ತು.

‘ವರ್ಣ’ (ರಾಗ– ರೇವತಿ ಆದಿ ತಾಳ) ಭಾಗದಲ್ಲಿ ರಾಮನ ಬರುವಿಕೆಗಾಗಿ ಕಾಯುತ್ತಿರುವ ಸೀತೆಯನ್ನು ಬಿಂಬಿಸಲಾಯಿತು. ಸೀತೆಯಂತೆಯೇ ನಾನೂ ಸಹ ನನ್ನ ನಾಯಕನ ಬರುವಿಕೆಗಾಗಿ ಕಾಯುತ್ತಿರುವೆ ಎಂದು ನಾಯಕಿಯು ತನ್ನ ಸಖಿಯ ಬಳಿ ಹೇಳಿಕೊಳ್ಳುವ ಪರಿ ಸುಂದರವಾಗ ಮೂಡಿ ಬಂತು. ಕೊನೆಯ ಪ್ರಸ್ತುತಿಯಾಗಿ ಕುರಚಿರಾಗ ಆದಿತಾಳದಲ್ಲಿ ಸಂಯೋಜಿಸಿದ್ದ ನೃತ್ಯವನ್ನು ಕಲಾವಿದೆ ಪ್ರಸ್ತುತಪಡಿಸಿದರು.

ಡಾ.ಲಕ್ಷ್ಮೀ ರೇಖಾ ಅರುಣ್ ಅವರು ಭರತನಾಟ್ಯ ಪ್ರಕಾರದಲ್ಲಿ ‘ಪ್ರಣಮಾಮ್ಯ೦ ಶ್ರೀ ಗೌರಿಸುತಂ’ ಕೃತಿ ಪ್ರಸ್ತುತಪಡಿಸಿದರು. ಗೌರಿಪುತ್ರನಾದ ವಿನಾಯಕನಿಗೆ ವ೦ದನೆ (ಮೈಸೂರು ವಾಸುದೇವಚಾರ್ಯರ ರಚನೆ, ರಾಗ ಗೌಳ, ಆದಿತಾಳ) ಸಲ್ಲಿಸುವ ಮೂಲಕ ನೃತ್ಯ  ಪ್ರದರ್ಶಿಸಿದರು.

‘ಸ್ವಾಮಿಯ ಕರೆತಾರೆ ನೀ’  (ರಾಗ– ಅಮೃತವರ್ಷಿಣಿ, ಆದಿ ತಾಳ)  ಕೃತಿಯ ಮೂಲಕ ಬೃ೦ದಾವನವನ್ನು ತೊರೆದು ತನ್ನ ಕಾರ್ಯಕ್ಕಾಗಿ ಹೊರಟಿರುವ ಕೃಷ್ಣನಿಗೆ ತನ್ನ ವಿರಹ ವೇದನೆ ತಿಳಿಸುವಂತೆ ಅಮೃತವರ್ಷಿಣಿ ಮಳೆಯನ್ನು ರಾಧೆ ಬೇಡುವ ಸನ್ನಿವೇಶವನ್ನು ಕಲಾವಿದೆ ಸೃಷ್ಟಿಸಿದರು.

ಕೃಷ್ಣನ ಬಣ್ಣ, ಕೊಳಲಿನ ನಿನಾದ, ಅವನ ಆಭರಣ, ಎಲ್ಲರನ್ನೂ ಸೆಳೆಯುವ ಮನ್ಮಥ ರೂಪದ ಚಿಂತನೆ ಮೂಡಿಬಂತು. ಕೃಷ್ಣನಿಲ್ಲದ ಜೀವನ ಶೂನ್ಯ ಎಂದು ರಾಧೆ ವರ್ಣಿಸುತ್ತಾಳೆ (ರಚನೆ– ದ್ವಾರಕಿ ಕೃಷ್ಣಸ್ವಾಮಿ). ನೃತ್ಯ ಸ೦ಯೋಜನೆ ಸಶಕ್ತವಾಗಿ ಮೂಡಿ ಬಂತು. ಹೊಸ ವಿನ್ಯಾಸದ ಜತಿಗಳು, ಬೆಡಗು, ಸು೦ದರವಾದ ಭ೦ಗಿಗಳು, ಅ೦ಗ ವಿನ್ಯಾಸಗಳು ಗಮನ ಸೆಳೆದವು.

‘ಪದ೦’ ಭಾಗದಲ್ಲಿ ‘ನವರಸ ನಿಲಯೆ’ ಪ್ರಸ್ತುತಪಡಿಸಿದರು. ತಾಟಕಿ ರಾಕ್ಷಸಿಯನ್ನು ಶ್ರೀರಾಮ ಕೊಲ್ಲುವ ಸ೦ದರ್ಭವನ್ನು ಹಾಸ್ಯರಸದಲ್ಲಿ ತೊರಿಸಲಾಯಿತು, ಕಲ್ಲಾಗಿದ್ದ ಅಹಲ್ಯೆಗೆ ರಾಮನ ಪಾದಸ್ವರ್ಶದಿ೦ದ ಮತ್ತೆ ಸ್ತ್ರೀರೂಪ ದೊರಕಿತು. ಇದು ಅದ್ಬುತರಸ,  ಸೀತಾ ಸ್ವಯಂವರದಲ್ಲಿ ಶೃ೦ಗಾರ ರಸ, ಮಾಯಾಜಿಂಕೆಯನ್ನು ಬೆನ್ನಟ್ಟಿ ಮಾರಿಚನನ್ನು  ಕೊಲ್ಲುವ ಸನ್ನಿವೇಶದಲ್ಲಿ ಭೀತಿ, ರಾವಣ ಸೀತೆಯನ್ನು ಅಪಹರಿಸಿದ ಸುದ್ದಿಯನ್ನು  ಕೇಳಿ ರಾಮ ಕೋಪಗೊಳ್ಳುವ ಸಂದರ್ಭದಲ್ಲಿ  ಕ್ರೋಧರಸವನ್ನು ಬಿ೦ಬಿಸಲಾಯಿತು.