ಕಂಡಿರಾ, ಈ ಸಿದ್ಧರ ಕೈಚಳಕ?

ಉತ್ತರ ಕರ್ನಾಟಕದ ಹಳ್ಳಿಹಳ್ಳಿಗಳಲ್ಲಿ ಇದ್ದಕ್ಕಿದ್ದಂತೆ ಬರುವ ಈ ಸುಡುಗಾಡು ಸಿದ್ಧರನ್ನು ನೋಡುವುದೇ ಖುಷಿ. ಕ್ಷಣಮಾತ್ರದಲ್ಲಿ ತಮ್ಮ ಕೈಚಳಕದಿಂದ ಯಾವುದನ್ನೋ ಮಾಯಮಾಡಿ, ಇನ್ನೇನನ್ನೋ ಸೃಷ್ಟಿಸಿ ವಿಸ್ಮಯ ಮೂಡಿಸಿ, ಜನರಿಗೆ ರಂಜನೆ ಒದಗಿಸುತ್ತಾರೆ. ಊರಿಂದ ಊರಿಗೆ ಸಾಗಿ, ಅಲ್ಲಿ ಮುಂದೆ ಆಗುವ ಶುಭ ಅಶುಭ, ಮಳೆ-ಬೆಳೆಗಳ ಬಗ್ಗೆ ಭವಿಷ್ಯ ಹೇಳುವುದು ಕೂಡ ಇವರ ಮೇಲಿರುವ ಹೊಣೆ. ಬಳ್ಳಾರಿ ಜಿಲ್ಲೆಯ ಹೂವಿನ ಹಡಗಲಿಯಲ್ಲಿ ಈ ಕಲೆಯನ್ನು ಬೆಳೆಸಿಕೊಂಡು ಬಂದ ಕುಟುಂಬಗಳಿವೆ.

‘ಸುಡುಗಾಡಿನಲ್ಲಿ ಇದ್ದು ಈ ವಿದ್ಯೆಯನ್ನು ಕರಗತ ಮಾಡಿಕೊಳ್ಳುವುದರಿಂದ ನಮಗೆ ಸುಡುಗಾಡು ಸಿದ್ಧರೆಂಬ ಹೆಸರು ಬಂದಿದೆ’ ಎನ್ನುತ್ತಾರೆ ಈ ಕುಟುಂಬಗಳ ಯಜಮಾನ ವಿರೂಪಾಕ್ಷ.

ಪಣಕಟ್ಟುವ ವಿಧಾನ: ಈ ಸುಡುಗಾಡು ಸಿದ್ಧರು ಊರಿಂದ ಊರಿಗೆ ಹೋಗಿ ಪಣಕಟ್ಟುವ ಪದ್ಧತಿಯಿದೆ. ಅವರು ಯಾವ ಊರಿನಲ್ಲಿ ಪಣ ಕಟ್ಟುತ್ತಾರೋ ಆ ಊರಿನಲ್ಲಿ ರಾತ್ರಿ 12 ಹಾಗೂ ಬೆಳಗಿನ 4 ಗಂಟೆಗೆ ಶಂಖ ಊದುತ್ತಾ ಬೀದಿಬೀದಿಯಲ್ಲಿ ಅಲೆದಾಡುತ್ತಿರುತ್ತಾರೆ. ಸುಡುಗಾಡ ಸಿದ್ಧರು ತೋರಿಸುವ ಕೈಚಳಕ ರಾಜಮೋಡಿಯ ಗುಂಪಿಗೆ ಸೇರಿದ್ದು.

ಹಬ್ಬ, ಜಾತ್ರೆ, ಸಂತೆ ಸಂದರ್ಭಗಳಲ್ಲಿ ಮಲ್ಲಿಕಾರ್ಜುನ ದೇವರನ್ನು ನೆನೆದು ಈ ಜಾದೂ ವಿದ್ಯೆ ಪ್ರದರ್ಶಿಸುತ್ತಾರೆ. ಒಂದು ರೂಪಾಯಿ ನಾಣ್ಯದಲ್ಲಿ ಬಸವಣ್ಣನ ಮೂರ್ತಿ ಮಾಡುವುದು, ನೋಡುನೋಡುತ್ತಿದ್ದಂತೆ ಶಿವಲಿಂಗ ಮಾಯ ಮಾಡುವುದು, ಮೂರು ಕಲ್ಲುಗಳನ್ನು ನುಂಗಿ ಅದಕ್ಕಿಂತಲೂ ದೊಡ್ಡ ಕಲ್ಲನ್ನು ಹೊರತೆಗೆಯುವುದು... ಹೀಗೆ ಮೋಡಿ ಮಾಡುವ ಜಾದೂ ಅವರದು.

ಈ ಸುಡುಗಾಡು ಸಿದ್ಧರು ಮೂರು ಜನರ ತಂಡ ಕಟ್ಟಿಕೊಂಡು ಸುತ್ತುತ್ತಾರೆ. ಕನ್ನಡ ಮತ್ತು ತೆಲುಗು ಭಾಷೆಗಳಲ್ಲಿ ಮಾತನಾಡಬಲ್ಲ ಇವರು ರಾಜ್ಯ ಮಾತ್ರವಲ್ಲದೆ ಆಂಧ್ರದಲ್ಲೂ ತಮ್ಮ ಮೋಡಿ ಪ್ರದರ್ಶಿಸುತ್ತಾರೆ. ವಿರೂಪಾಕ್ಷ ಅವರಂತಹ ಹಿರಿಯರು ಹೊಸ ಪೀಳಿಗೆಗೆ ಈ ಕಲೆಯನ್ನು ದಾಟಿಸುತ್ತಿದ್ದಾರೆ.

‘ನಮ್ಮಿಂದಾದಷ್ಟು ಈ ವಿದ್ಯೆಯನ್ನು ಉಳಿಸುವ ಪ್ರಯತ್ನವನ್ನು ಮಾಡುತ್ತಿದ್ದೇವೆ. ನಮ್ಮ ಮುಂದಿನ ಪೀಳಿಗೆಯವರು ಕೂಡ ಇದನ್ನು ಮುಂದುವರಿಸಬೇಕೆಂಬ ಆಸೆಯಿದೆ. ಆದರೆ ಬದಲಾಗುತ್ತಿರುವ ಸಾಮಾಜಿಕ ಜೀವನದಲ್ಲಿ ಅದು ಅಸಾಧ್ಯವಾಗಿದೆ’ ಎಂದು ನಿಟ್ಟುಸಿರು ಬಿಡುತ್ತಾರೆ ವಿರೂಪಾಕ್ಷ.