ನವದೆಹಲಿ: ಪಾಕಿಸ್ತಾನ ಮತ್ತು ಬಾಂಗ್ಲಾದೇಶದೊಂದಿಗೆ ಹಂಚಿಕೊಂಡಿರುವ ಗಡಿಯಲ್ಲಿ ಪ್ರಖರ ದೀಪಗಳನ್ನು (ಫ್ಲಡ್ಲೈಟ್) ಅಳವಡಿಸಿರುವುದನ್ನು ಬಿಂಬಿಸಲು ತನ್ನ ವಾರ್ಷಿಕ ವರದಿಯಲ್ಲಿ ಸ್ಪೇನ್–ಮೊರಕ್ಕೊ ಗಡಿಯ ಚಿತ್ರ ಬಳಕೆಯಾದ ಬಗ್ಗೆ ಸಮಗ್ರ ತನಿಖೆಗೆ ಗೃಹ ಸಚಿವಾಲಯ ಆದೇಶಿಸಿದೆ.
ಗೃಹ ಸಚಿವಾಲಯದ 2016–17ರ ವಾರ್ಷಿಕ ವರದಿಯಲ್ಲಿ ಸ್ಪೇನ್–ಮೊರಕ್ಕೊ ಗಡಿಯ ಚಿತ್ರವನ್ನು ಮುದ್ರಿಸಲಾಗಿದೆ. ಆಲ್ಟ್ ನ್ಯೂಸ್ (Alt News) ಸುದ್ದಿತಾಣ ಬುಧವಾರ (ಜೂನ್ 14) ಈ ವಿಷಯವನ್ನು ಬಹಿರಂಗಗೊಳಿಸಿತ್ತು. ಇದರಿಂದ ಗೃಹ ಸಚಿವಾಲಯ ತೀವ್ರ ಮುಜುಗರಕ್ಕೆ ಒಳಗಾಗಿತ್ತು.
ಸ್ಪ್ಯಾನಿಷ್ ಛಾಯಾಗ್ರಾಹಕ ಜಾವೇರ್ ಮೊಯನೊ 2006ರಲ್ಲಿ ತೆಗದ ಸ್ಪೇನ್–ಮೊರಕ್ಕೊ ಗಡಿಯ ಚಿತ್ರ ಇದು ಎಂದು ಆಲ್ಟ್ ನ್ಯೂಸ್ ವರದಿಯಲ್ಲಿ ಹೇಳಿದೆ.
ಸಾಮಾಜಿಕ ಜಾಲತಾಣಗಳಲ್ಲಿ ಹಲವರು ಈ ಚಿತ್ರವನ್ನು ಪೋಸ್ಟ್ ಮಾಡಿ ಗೃಹ ಸಚಿವಾಲಯದ ‘ಅಸಲಿತನ’ವನ್ನು ಪ್ರಶ್ನಿಸಿದ್ದಾರೆ.
Brilliant, sharp-eyed fact-checking @altnews_in Why call your own BSF for a picture when you can steal from Internet https://t.co/KAGkJFCzEt