ನವದೆಹಲಿ: ಸರಕು ಮತ್ತು ಸೇವಾ ತೆರಿಗೆ(ಜಿಎಸ್‌ಟಿ) ಜಾರಿ ಬಳಿಕ ಸಬ್ಸಿಡಿ ಸಹಿತ ಅಡುಗೆ ಅನಿಲ ಪ್ರತಿ ಸಿಲಿಂಡರ್‌ ಬೆಲೆ ₹32ರ ವರೆಗೆ ಹೆಚ್ಚಳವಾಗಿದ್ದು, ಇದು ಆರು ವರ್ಷದಲ್ಲಿ ಕಂಡ ಅತಿ ಹೆಚ್ಚಿನ ಏರಿಕೆಯಾಗಿದೆ.
ಜುಲೈ 1ರಂದು ಜಿಎಸ್‌ಟಿ ಜಾರಿ ಬಳಿಕ ದೆಹಲಿಯಲ್ಲಿ 14.2 ಕೆ.ಜಿ.ಯ ಸಬ್ಸಿಡಿ ಅಡುಗೆ ಅನಿಲ ಸಿಲಿಂಡರ್‌ ಬೆಲೆ ₹446.65ರಿಂದ ₹477.46ಕ್ಕೆ ಏರಿಕೆಯಾಗಿದೆ.
ರಾಜ್ಯಗಳಲ್ಲಿ ಜಾರಿ ಇರುವ ತೆರಿಗೆಗೆ ಅನುಗುಣವಾಗಿ ದರದಲ್ಲಿ ಹೆಚ್ಚಳ ಆಗಲಿದೆ. ಇದು ರಾಜ್ಯದಿಂದ ರಾಜ್ಯಕ್ಕೆ ವ್ಯತ್ಯಾಸವಾಗಲಿದೆ.
ಕೋಲ್ಕತ್ತದಲ್ಲಿ ಪ್ರತಿ ಸಿಲಿಂಡರ್‌ಗೆ ₹31.67 ಹೆಚ್ಚಳವಾಗಿದ್ದು, ₹480.32ಕ್ಕೆ ಹೆಚ್ಚಿದೆ ಮತ್ತು ಚೆನ್ನೈನಲ್ಲಿ ₹465.56ಕ್ಕೆ ಹೆಚ್ಚಳವಾಗಿದೆ ಎಂದು ತೈಲ ಕಂಪೆನಿಗಳು ಮಾಹಿತಿ ನೀಡಿವೆ.
ಮುಂಬೈನಲ್ಲಿ ಶೇಕಡಾ 3ರಷ್ಟು ವ್ಯಾಟ್‌ ಅನ್ವಯವಾಗಲಿದ್ದು, ಪ್ರತಿ ಸಿಲಿಂಡರ್‌ ಬೆಲೆ ₹14.28 ಹೆಚ್ಚಳವಾಗಿದ್ದು, ₹491.25ಕ್ಕೆ ಹೆಚ್ಚಿದೆ.
