ಮತ್ತೊಮ್ಮೆ ಅವಳಿ ಮಕ್ಕಳ ತಾಯಿಯಾದ ಸೆಲೀನಾ ಜೇಟ್ಲಿ
ದುಬೈ: ಬಾಲಿವುಡ್‌ ನಟಿ ಸೆಲೀನಾ ಜೇಟ್ಲಿ ಮತ್ತೊಮ್ಮೆ ಅವಳಿ ಮಕ್ಕಳಿಗೆ ತಾಯಿಯಾಗಿರುವ ಕುರಿತು ಫೇಸ್ಬುಕ್ ಖಾತೆಯಲ್ಲಿ ಸಿಹಿ ಸಂದೇಶವನ್ನು ಹಂಚಿಕೊಂಡಿದ್ದಾರೆ. ಆದರೆ, ದುರದೃಷ್ಟವಶಾತ್ ಅವಳಿಗಳ ಪೈಕಿ ಒಂದು ಮಗು ಅಸುನೀಗಿದೆ.
ಸದ್ಯ ಸೆಲೀನಾ ಪತಿ ಪೀಟರ್‌ ಹಾಗ್‌ ಅವರೊಂದಿಗೆ ದುಬೈನಲ್ಲಿ ನೆಲೆಸಿದ್ದಾರೆ. ಸೆಲೀನಾ ಅವರಿಗೆ ಈಗಾಗಲೇ ಅವಳಿ ಮಕ್ಕಳಿದ್ದಾರೆ. ಅವರಿಗೆ ವಿನ್ಸ್‌ಟನ್‌ ಮತ್ತು ವೀರಾಜ್‌ ಎಂಬ ಅವಳಿ ಗಂಡು ಮಕ್ಕಳಿದ್ದು, ಅವರಿಗೆ ಐದು ವರ್ಷ ವಯಸ್ಸು. ಸೆಪ್ಟೆಂಬರ್ 10ರಂದು ಎರಡನೇ ಬಾರಿ ಅವಳಿ ಗಂಡು ಮಕ್ಕಳಿಗೆ ಜನ್ಮ ನೀಡಿದ್ದಾರೆ.
ನವಜಾತ ಅವಳಿಗಳಿಗೆ ‘ಅರ್ಥರ್‌ ಜೇಟ್ಲಿ ಹಾಗ್‌’ ಮತ್ತು ‘ಶಂಷೇರ್‌ ಜೇಟ್ಲಿ ಹಾಗ್‌’ ಎಂದು ನಾಮಕರಣ ಮಾಡಲಾಗಿತ್ತು. ಆದರೆ ‘ಶಂಷೇರ್‌ ಜೇಟ್ಲಿ ಹಾಗ್‌’ ಹೃದಯ ಸಮಸ್ಯೆಯಿಂದ ಮೃತಪಟ್ಟಿರುವುದಾಗಿ ಸೆಲೀನಾ ನೋವಿನ ಸಂಗತಿಯನ್ನೂ ವಿವರಿಸಿದ್ದಾರೆ.
‘ಎರಡು ತಿಂಗಳ ಹಿಂದಷ್ಟೆ ನನ್ನ ತಂದೆಯನ್ನು ಕಳೆದುಕೊಂಡಿದ್ದೆ. ಇದೀಗ ತಾಯಿಯಾದ ಸಂತಸದಲ್ಲಿದ್ದ ನನಗೆ ಮಗುವಿನ ಸಾವಿನಿಂದ ಬಹಳ ದುಖಃವಾಗಿದೆ’ ಎಂದು ಸಲೇನಾ ಹೇಳಿದ್ದಾರೆ. ಇವರು 2001ರಲ್ಲಿ ‘ಮಿಸ್ ಇಂಡಿಯಾ’ ಆಗಿ ಆಯ್ಕೆಯಾಗಿದ್ದರು. ಅದೇ ವರ್ಷ ‘ಮಿಸ್ ಯುನಿವರ್ಸ್‌’ನಲ್ಲಿ ರನ್ನರ್ ಅಪ್ ಆಗಿದ್ದರು. 2011ರಲ್ಲಿ ದುಬೈ ಮೂಲದ ಪೀಟರ್‌ ಹಾಗ್‌ ಅವರೊಂದಿಗೆ ಮದುವೆಯಾಗಿದ್ದರು.
ತಾಜಾ ಸುದ್ದಿಗಾಗಿ ಪ್ರಜಾವಾಣಿ ಟೆಲಿಗ್ರಾಂ ಚಾನೆಲ್ ಸೇರಿಕೊಳ್ಳಿ | ಪ್ರಜಾವಾಣಿ ಆ್ಯಪ್ ಇಲ್ಲಿದೆ: ಆಂಡ್ರಾಯ್ಡ್ | ಐಒಎಸ್ | ನಮ್ಮ ಫೇಸ್ಬುಕ್ ಪುಟ ಫಾಲೋ ಮಾಡಿ.