ಬಾದಾಮಿ: ಸಂಭ್ರಮದ ದಸರಾ ಮತ್ತು ಮೊಹರಂ ಆಚರಣೆ

ಭಾನುವಾರ, ಜೂನ್ 16, 2019
28 °C

ಬಾದಾಮಿ: ಸಂಭ್ರಮದ ದಸರಾ ಮತ್ತು ಮೊಹರಂ ಆಚರಣೆ

Published:
Updated:
ಬಾದಾಮಿ: ಸಂಭ್ರಮದ ದಸರಾ ಮತ್ತು ಮೊಹರಂ ಆಚರಣೆ

ಬಾದಾಮಿ: ಈ ಬಾರಿ ವಿಜಯದಶಮಿ ಮತ್ತು ಮೊಹರಂ ಆಚರಣೆಯಲ್ಲಿ ದೇವರಿಗೆ ಸಕ್ಕರೆ ಹಂಚುವುದು ಶನಿವಾರ ದಿನವೇ ಬಂದಿದ್ದರಿಂದ ಹಿಂದೂ–ಮುಸ್ಲಿಂ ಬಾಂಧವರು ಸಂಭ್ರಮದಿಂದ ದಸರಾ ಮತ್ತು ಮೊಹರಂ ಆಚರಿಸಿದರು. ಅಕ್ಕಮಹಾದೇವಿ ಗುಡಿಯಲ್ಲಿ, ಕೋಣಮ್ಮ ದೇವಾಲಯದಲ್ಲಿ ಮತ್ತು ವೆಂಕಟೇಶ್ವರ ದೇವಾಲಯದಲ್ಲಿ ಬನ್ನಿಯನ್ನು ಮುಡಿಯಲಾಯಿತು.

ಮಹಿಳೆಯರು ಒಂಭತ್ತು ದಿನ ಬನ್ನಿ ಗಿಡಕ್ಕೆ ಪೂಜೆ ಮಾಡಿದ ನಂತರ ದಶಮಿಯ ದಿನ ಮನೆಯಲ್ಲಿ ಸಿಹಿ ಹೋಳಿಗೆ, ಕರಿಕಡಬು, ಗೋಧಿ ಹುಗ್ಗಿ, ಸಜ್ಜಕದ ಹೋಳಿಗೆ ಅಡಿಗೆ ಮಾಡಿ ಸವಿಯುವರು.

ದೇವಾಲಯಗಳಲ್ಲಿ ಬನ್ನಿ ಮುಡಿದ ನಂತರ ಕುಟಂಬ ಸಮೇತರಾಗಿ ಬನ್ನಿ ಬಂಗಾರವನ್ನು ಕೊಡಲು ತೆರಳಿದರು. ಹಬ್ಬದ ನಿಮಿತ್ತ ಹೊಸ ಬಟ್ಟೆಯನ್ನು ಧರಿಸಿಕೊಂಡು ತಮ್ಮ ಹಿರಿಯರಿಗೆ, ಸ್ನೇಹಿತರಿಗೆ ಮತ್ತು ಬಂಧು ಬಾಂಧವರ ಮನೆ ಮನೆಗೆ ತೆರಳಿ ‘ನಾವು ನೀವು ಬನ್ನಿ ಕೊಟ್ಟು ಬಂಗಾರದಂಗ ಇರೂಣು’ ಎಂದು ಆರಿಯ ಮತ್ತು ಬನ್ನಿಯ ಸೊಪ್ಪನ್ನು ಪರಸ್ಪರ ವಿನಿಮಯ ಮಾಡಿಕೊಂಡರು.

ಹಿಂದೂ–ಮುಸ್ಲಿಂ ಮಹಿಳೆಯರು, ಮಕ್ಕಳು ಮತ್ತು ಪುರುಷರು ಮಸೀದೆಗೆ ತೆರಳಿ ದೇವರಿಗೆ ಸಕ್ಕರೆ, ಉದೂಬತ್ತಿ, ಲೋಬಾನ ಮತ್ತು ಮಕನಾ ಭಕ್ತಿ ಶ್ರದ್ಧೆಯಿಂದ ಅರ್ಪಿಸಿದರು. ಮಕ್ಕಳಾಗಲಿ ಎಂದು ದೇವರಿಗೆ ಬೇಡಿಕೊಂಡವರು ಹರಕೆಯನ್ನು ಪೂರೈಸಲು ಮಗುವಿನ ತೂಕದ ಸಕ್ಕರೆಯನ್ನು ವಿತರಿಸುವರು.

ಮೊಹರಂ ಅಂಗವಾಗಿ ಹಳೇ ಬಾದಾಮಿ ಪಟ್ಟಣದ ವಿವಿಧ ವಾರ್ಡ್‌ಗಳಲ್ಲಿ ಯುವಕರು ಹಲಗೆ ಮತ್ತು ಶಹನಾಯಿ ವಾದ್ಯ ಮೇಳಕ್ಕೆ ತಕ್ಕಂತೆ ಹೆಜ್ಜೆ ಹಾಕುತ್ತ ಕುಣಿದು ಕುಪ್ಪಳಿಸಿದರು. ಬೇಡಿಕೊಂಡವರು ಫಕೀರರಾಗಿದ್ದರು ಕೆಲವರು ಹುಲಿ ವೇಷ ಮತ್ತು ಅಳ್ಳೊಳ್ಳಿ ಬಾವ ವೇಷವನ್ನು ಧರಿಸಿದ್ದರು.

ತಟಕೋಟೆ ಗ್ರಾಮದ ಯುವಕರು ಇಲ್ಲಿನ ಮಾರುತೇಶ್ವರ ದೇವಾಲಯದ ಆವರಣದಲ್ಲಿ ಹೆಜ್ಜೆ ಹಾಕುತ್ತ ತಳಮಸೀದೆ ಲಾಲಸಾಬ್‌ ದೇವರಿಗೆ ರಥವನ್ನು ನಿರ್ಮಿಸಿದರು. ನಂತರ ಪೂಜೆ ಮಾಡಿ ತೆಂಗಿನ ಕಾಯಿ ಅರ್ಪಿಸಿ ನೈವೇದ್ಯ ಮಾಡಿದರು. ರಥ ನಿರ್ಮಾಣ ಕಲೆಯು ಸೌಹಾರ್ದತೆಗೆ ಸಾಕ್ಷಿಯಾಗಿತ್ತು. ಸಾವಿರಾರು ಮಂದಿ ರಥ ನಿರ್ಮಾಣದ ಹೆಜ್ಜೆಯ ಕುಣಿತ ವೀಕ್ಷಿಸಿದರು.

ವಿರಾಟ್ ಕೊಹ್ಲಿ ನಾಯಕತ್ವದ ಭಾರತ ಕ್ರಿಕೆಟ್‌ ತಂಡ ಕಪ್ ಗೆಲ್ಲುತ್ತಾ? ಐಸಿಸಿ ವಿಶ್ವಕಪ್ 2019 ಯಾರು ಗೆಲ್ಲುತ್ತಾರೆ? ಕೋಟ್ಯಂತರ ಕ್ರಿಕೆಟ್ ಪ್ರೇಮಿಗಳ ನಿರೀಕ್ಷೆಗೆ ಉತ್ತರ ಸಿಗುವ ಕಾಲ ಬಂದಿದೆ. ವಿಶ್ವಕಪ್ ಕ್ರಿಕೆಟ್‌ನ ಸ್ಕೋರ್ ಅಪ್‌ಡೇಟ್ಸ್‌, ಮ್ಯಾಚ್‌ಗಳ ವರದಿ, ವಿಶ್ವಕಪ್ ಕ್ರಿಕೆಟ್ ಹೆಜ್ಜೆ ಗುರುತು, ಆಟಗಾರರ ಸಂದರ್ಶನ, ವೇಳಾಪಟ್ಟಿ ತಿಳಿದುಕೊಳ್ಳಲು www.prajavani.net ಜಾಲತಾಣಕ್ಕೆ ಭೇಟಿ ನೀಡಿ. ಕ್ರೀಡಾಪ್ರೇಮಿಗಳ ನೆಚ್ಚಿನ ಆಯ್ಕೆ ‘ಪ್ರಜಾವಾಣಿ’. ಇದು ಅತ್ಯಂತ ವಿಶ್ವಾಸಾರ್ಹ ಸುದ್ದಿ ಮಾಧ್ಯಮ.

ಬರಹ ಇಷ್ಟವಾಯಿತೆ?

  • 0

    Happy
  • 0

    Amused
  • 0

    Sad
  • 0

    Frustrated
  • 0

    Angry