ಹರಕೆ ಸೀರೆಗೆ ಭಾರಿ ಬೇಡಿಕೆ

ಮಂಗಳವಾರ, ಜೂನ್ 25, 2019
29 °C
₹ 1.49 ಕೋಟಿ ಆದಾಯ

ಹರಕೆ ಸೀರೆಗೆ ಭಾರಿ ಬೇಡಿಕೆ

Published:
Updated:
ಹರಕೆ ಸೀರೆಗೆ ಭಾರಿ ಬೇಡಿಕೆ

ಮೈಸೂರು: ಭಕ್ತಾದಿಗಳು ಹರಕೆ ಹಾಗೂ ಕಾಣಿಕೆಯಾಗಿ ಅರ್ಪಿಸುವ ಸೀರೆ ಮತ್ತು ಕುಪ್ಪಸದಿಂದಲೇ ಚಾಮುಂಡಿಬೆಟ್ಟದ ಚಾಮುಂಡೇಶ್ವರಿ ದೇಗುಲಕ್ಕೆ ಪ್ರತಿವರ್ಷ ಕೋಟ್ಯಂತರ ರೂಪಾಯಿ ಆದಾಯ ಸಂಗ್ರಹವಾಗುತ್ತಿದೆ.

2016–17ನೇ ಸಾಲಿನಲ್ಲಿ ಹರಕೆಯಾಗಿ ಬಂದ ಸೀರೆಗಳ ಮಾರಾಟದಿಂದ ₹ 1.49 ಕೋಟಿ ಆದಾಯ ಬಂದಿದೆ. ಹಿಂದಿನ ಸಾಲಿನ ಆದಾಯಕ್ಕೆ ಹೋಲಿಸಿದರೆ ಈ ಬಾರಿ ₹ 49 ಲಕ್ಷ ಹೆಚ್ಚಳವಾಗಿದೆ.

‘ಹರಕೆಯಾಗಿ ಬರುವ ಸೀರೆಗಳಿಗೆ ಭಕ್ತರಿಂದ ಭಾರಿ ಬೇಡಿಕೆ ಬರುತ್ತಿದೆ. ಹಿಂದೆ ಸೀರೆಗಳನ್ನು ಹರಾಜು ಹಾಕುತ್ತಿದ್ದೆವು. ಎರಡು ವರ್ಷಗಳಿಂದ ದೇಗುಲದ ಆವರಣದಲ್ಲೇ ನಿತ್ಯ ಮಾರಾಟಕ್ಕೆ ಇಡುತ್ತಿದ್ದೇವೆ’ ಎಂದು ದೇಗುಲದ ಕಾರ್ಯನಿರ್ವಹಣಾಧಿಕಾರಿ ಪ್ರಸಾದ್‌ ‘ಪ್ರಜಾವಾಣಿ’ಗೆ ತಿಳಿಸಿದರು.

‘ಹಿಂದೆ ಸೀರೆಗಳಿಂದ ವರ್ಷಕ್ಕೆ ಕೇವಲ ₹ 40ರಿಂದ 50 ಲಕ್ಷ ಆದಾಯ ಬರುತ್ತಿತ್ತು. ಈಗ ಅದು ಕೋಟಿ ದಾಟಿದೆ. ಹರಕೆಯಾಗಿ ಬಂದ ಸೀರೆಗಳಿಗೆ ನಾವೇ ಬೆಲೆ ನಿಗದಿ ಮಾಡುತ್ತೇವೆ’ ಎಂದರು.

ಆದಾಯ ಹೆಚ್ಚಳ: ವಿವಿಧ ಮೂಲಗಳಿಂದ ದೇಗುಲಕ್ಕೆ ಬರುವ ಒಟ್ಟಾರೆ ಆದಾಯವೂ ಹೆಚ್ಚಿದೆ. 2016-17ನೇ ಸಾಲಿನಲ್ಲಿ ₹ 24.09 ಕೋಟಿ ಆದಾಯ ಬಂದಿದೆ. ಕಳೆದ ಬಾರಿಗಿಂತ ₹ 2 ಕೋಟಿ ಹೆಚ್ಚಳವಾಗಿದೆ.

ಪ್ರವೇಶ ಶುಲ್ಕ, ವಿದೇಶಗಳಿಂದ ಬರುವ ಕಾಣಿಕೆ, ಡಿಡಿ, ಮನಿ ಆರ್ಡರ್‌, ದೇಗುಲದ ವಿವಿಧ ಗುತ್ತಿಗೆ ಹಣ, ಲಡ್ಡುಪ್ರಸಾದ ಮಾರಾಟ, ಸೇವಾರ್ಥ, ವಿಶೇಷ ಪೂಜೆ, ದೇವತೆಗಳ ಮೆರವಣಿಗೆ ಸೇವೆ, ಅತಿಥಿಗೃಹ ಬಾಡಿಗೆ, ದಾಸೋಹ ಭವನ, ಇ–ಸೇವೆಗಳಿಂದ ಆದಾಯ ಸಂಗ್ರಹವಾಗುತ್ತಿದೆ.

ಆನ್‌ಲೈನ್‌ನಲ್ಲೇ ಟಿಕೆಟ್‌ ಪಡೆದು ದೇವಿ ದರ್ಶನ ಮಾಡಲೂ ವ್ಯವಸ್ಥೆ ಮಾಡಲಾಗಿದೆ. ಅಲ್ಲದೆ, ಚಂಡಿಕಾ ಹೋಮಕ್ಕೆ ಸೇವಾ ದರ ಪಾವತಿಸಲು ಹಾಗೂ ದೇವಿಗೆ ಸೀರೆ ಅರ್ಪಿಸಲು ಆನ್‌ಲೈನ್‌ನಲ್ಲಿಯೇ ಅವಕಾಶ ಕಲ್ಪಿಸಲಾಗಿದೆ. ದೇಗುಲಕ್ಕೆ ಬರುವ ಆದಾಯದಿಂದಲೇ ಬೆಟ್ಟದಲ್ಲಿ ಅಭಿವೃದ್ಧಿ ಕಾರ್ಯ ಕೈಗೆತ್ತಿಕೊಳ್ಳಲಾಗಿದೆ.

ಅಂಕಿ ಅಂಶ...1

ಹರಕೆ ಸೀರೆ ಹರಾಜು/ಮಾರಾಟದಿಂದ ದೇಗುಲಕ್ಕೆ ಆದಾಯ

ವರ್ಷ            ಆದಾಯ (₹ ಗಳಲ್ಲಿ)

2011–12   85.69 ಲಕ್ಷ

2012–13   55.42 ಲಕ್ಷ

2013–14   51.94 ಲಕ್ಷ

2014–15   47.53 ಲಕ್ಷ

2015–16   1 ಕೋಟಿ

2016–17   1.49 ಕೋಟಿ

******

ಅಂಕಿ ಅಂಶ...2

ವಿವಿಧ ಮೂಲಗಳಿಂದ ದೇಗುಲಕ್ಕೆ ಬಂದ ಒಟ್ಟು ಆದಾಯ

ವರ್ಷ          ಆದಾಯ (₹ ಕೋಟಿಗಳಲ್ಲಿ)

2014–15   18.33

2015–16   21.74

2016–17   24.09

 

ವಿರಾಟ್ ಕೊಹ್ಲಿ ನಾಯಕತ್ವದ ಭಾರತ ಕ್ರಿಕೆಟ್‌ ತಂಡ ಕಪ್ ಗೆಲ್ಲುತ್ತಾ? ಐಸಿಸಿ ವಿಶ್ವಕಪ್ 2019 ಯಾರು ಗೆಲ್ಲುತ್ತಾರೆ? ಕೋಟ್ಯಂತರ ಕ್ರಿಕೆಟ್ ಪ್ರೇಮಿಗಳ ನಿರೀಕ್ಷೆಗೆ ಉತ್ತರ ಸಿಗುವ ಕಾಲ ಬಂದಿದೆ. ವಿಶ್ವಕಪ್ ಕ್ರಿಕೆಟ್‌ನ ಸ್ಕೋರ್ ಅಪ್‌ಡೇಟ್ಸ್‌, ಮ್ಯಾಚ್‌ಗಳ ವರದಿ, ವಿಶ್ವಕಪ್ ಕ್ರಿಕೆಟ್ ಹೆಜ್ಜೆ ಗುರುತು, ಆಟಗಾರರ ಸಂದರ್ಶನ, ವೇಳಾಪಟ್ಟಿ ತಿಳಿದುಕೊಳ್ಳಲು www.prajavani.net ಜಾಲತಾಣಕ್ಕೆ ಭೇಟಿ ನೀಡಿ. ಕ್ರೀಡಾಪ್ರೇಮಿಗಳ ನೆಚ್ಚಿನ ಆಯ್ಕೆ ‘ಪ್ರಜಾವಾಣಿ’. ಇದು ಅತ್ಯಂತ ವಿಶ್ವಾಸಾರ್ಹ ಸುದ್ದಿ ಮಾಧ್ಯಮ.

ಬರಹ ಇಷ್ಟವಾಯಿತೆ?

  • 0

    Happy
  • 0

    Amused
  • 0

    Sad
  • 0

    Frustrated
  • 0

    Angry