ಭತ್ತ ಬಿಟ್ಟು ಮೆಕ್ಕೆಜೋಳ ಬೆಳೆದರು..!

ಎಸ್‌ಎಸ್‌ಎಲ್‌ಸಿ ಓದಿರುವ ಅವರು ಜೀವನ ನಿರ್ವಹಣೆಗೆ ಪಟ್ಟಣಕ್ಕೆ ವಲಸೆ ಬಂದು ಕುಡಿಯುವ ನೀರಿನ ಯಂತ್ರಗಳ ದುರಸ್ತಿ ಮಾಡುವ ವೃತ್ತಿಯಲ್ಲಿ ತೊಡಗಿಸಿಕೊಂಡಿದ್ದರು, ಆದರೆ ಲಾಭ ಮತ್ತು ತೃಪ್ತಿ ಕಾಣದೇ ಕೃಷಿಯತ್ತ ಒಲವು ತೋರಿ ತಮಗಿರುವ 4.80 ಎಕರೆಯಲ್ಲಿ ಬೆಳೆಸಿರುವ ಅಂಜೂರ ತೋಟವನ್ನು ನೋಡಿಕೊಳ್ಳಲೆಂದು ವಾಪಸು ಬಂದರು.

‘ಅಂಜೂರದ ಗಿಡಗಳು 11 ವರ್ಷ ಹಳೆಯದಾದ ಕಾರಣ ಇಳುವರಿ ಗಣನೀಯವಾಗಿ ಕುಸಿದಿತ್ತು. ಜೊತೆಗೆ ಖರ್ಚು ಹೆಚ್ಚಾಗುತ್ತಿರುವುದನ್ನು ಮನಗಂಡು, ಯಾವ ಬೆಳೆ ಬೆಳೆದರೆ ಸೂಕ್ತ ಎಂದು ಸಿರುಗುಪ್ಪ ಕೃಷಿ ಸಂಶೋಧನಾ ಕೇಂದ್ರದ ಮುಖ್ಯಸ್ಥ ಡಾ. ಬಸವಣ್ಣೆಪ್ಪ ಅವರನ್ನು ಸಂಪರ್ಕಿಸಿದೆ. ಅವರು ಮೆಕ್ಕೆ ಜೋಳ ಬೆಳೆಯುವಂತೆ ಸಲಹೆ ನೀಡಿದರು’ ಎಂದು ಬಸವರಾಜ ‘ಪ್ರಜಾವಾಣಿ’ಗೆ ತಿಳಿಸಿದರು.

‘ಎನ್.ಕೆ -6240 ಮತ್ತು ಹೈಟೆಕ್‌ 5101 ಅನ್ನು ಅಗಸ್ಟ್ ತಿಂಗಳಲ್ಲಿ ಬಿತ್ತನೆ ಮಾಡಿದೆ. ನಂತರ ಕಳೆ ನಾಶಕವನ್ನು ಬಳಸಿದೆ. ಯೂರಿಯಾ, ಡಿ.ಎ.ಪಿ ಮತ್ತು ಕಾಂಪ್ಲೆಕ್ಸ್‌ ರಸಗೊಬ್ಬರವನ್ನು ಮೂರು ಸಲ ಪೂರೈಸಿದೆ. ಉತ್ತಮ ಇಳುವರಿ ದೊರಕುವ ನಿರೀಕ್ಷೆ ಇದೆ’ ಎಂದರು. ಅವರ ಜಮೀನಿಗೆ ಸುತ್ತಮುತ್ತಲಿನ ರೈತರು ಭೇಟಿ ನೀಡಿ ಮಾಹಿತಿ ಪಡೆಯುತ್ತಿದ್ದಾರೆ.

ಪರ್ಯಾಯ ಬೆಳೆ: ‘ಭತ್ತಕ್ಕೆ ಪರ್ಯಾಯವಾದ ಬೆಳೆಗಳತ್ತ ರೈತರು ಗಮನ ಹರಿಸಲೇಬೇಕಾದ ಕಾಲ ಘಟ್ಟ ಇದು.ಮಳೆಯ ಅನಿಶ್ಚಿತತೆ ಮತ್ತು ಕಾಲುವೆ ನೀರು ಸಕಾಲಕ್ಕೆ ದೊರಕದ ಸನ್ನಿವೇಶದಲ್ಲಿ ರೈತರು ಹೆಚ್ಚಿ ಜಾಣರಾಗಬೇಕು. ಪ್ರಾಯೋಗಿಕ ನೆಲೆಯಲ್ಲಿ ಚಿಂತಿಸಿ ಮುಂದುವರಿಯಬೇಕು’ ಎಂಬುದು ಡಾ. ಬಸವಣ್ಣೆಪ್ಪ ಅವರ ಸಲಹೆ.