ಶಿಲಾಬಾಲಿಕೆಯರು

ಶಿಲ್ಪದಲಿ ಬೆತ್ತಲಾದವರು ನಾವು ಶಿಲಾಬಾಲಿಕೆಯರು

ಬಯಲಿನಲಿ ಬಯಲಾದವರು ನಾವು ಶಿಲಾಬಾಲಿಕೆಯರು

ಇಂಚಿಂಚೂ ಕಣಕಣವೂ ಬಯಲಿಗೆ ಇಟ್ಟರು

ನಮ್ಮತನದ ಗುಟ್ಟಿಲ್ಲದವರು ನಾವು ಶಿಲಾಬಾಲಿಕೆಯರು

ಘಮವಿಲ್ಲ ನಮ್ಮ ಎದೆ ಹಾಲಿಗೆ, ಬರಿ ನಿಮ್ಮ

ಸ್ಖಲನಗಳಿಗೆ ಸಾಕ್ಷಿಯಾದವರು ನಾವು ಶಿಲಾಬಾಲಿಕೆಯರು

ಮೈಯೆಲ್ಲಾ ಮೈಥುನದ ವಾಸನೆ, ಹಸಿದ ಕಂಗಳಿಗೆ ಆಹಾರವಾದವರು ನಾವು ಶಿಲಾಬಾಲಿಕೆಯರು

ಯುಗ ಯುಗಗಳಿಂದ ಸೀರೆ ಸೆಳೆಸಿಕೊಳ್ಳುತ್ತಲೇ

ಇರುವ ದ್ರೌಪದಿಯರು ನಾವು ಶಿಲಾಬಾಲಿಕೆಯರು

ನೋಟದಗ್ನಿಯಲಿ ಬೇಯುತ್ತ ಅವಮಾನಿತರಾಗುತ್ತಲೇ

ಇರುವ ಸೀತೆಯರು ನಾವು ಶಿಲಾಬಾಲಿಕೆಯರು

ನಿಮ್ಮ ವಿಕೃತಿಗೆ ಸಿಡಿದು ಭಗ್ನರಾದರೂ

ಹೇಮನಗುವ ನೀಡಿದವರು ನಾವು ಶಿಲಾಬಾಲಿಕೆಯರು