ಆ ನೆನಪುಗಳು ಇಂದಿಗೂ ಹಸಿರು

ಬುಧವಾರ, ಜೂನ್ 19, 2019
29 °C

ಆ ನೆನಪುಗಳು ಇಂದಿಗೂ ಹಸಿರು

Published:
Updated:

ನಾನು ಸ್ನಾತಕೋತ್ತರ ಪದವಿ ಪ್ರವೇಶಿಸಿದ ಮೊದಲ ವರ್ಷ. ಎಲ್ಲ ವಿಭಾಗಗಳಂತೆ ನಮ್ಮಲ್ಲೂ ಪ್ರತ್ಯೇಕ ಸಮವಸ್ತ್ರ ಮಾಡಲಾಗಿತ್ತು. ಅದರಲ್ಲೇನು ವಿಶೇಷ ಅಂತಿರಾ? ಹೌದು. ನಮ್ಮದು ಕೊಂಚ ವಿಭಿನ್ನ ಡ್ರೆಸ್‍ಕೋಡ್. ಅದುವೇ ಖಾದಿ ಸಮವಸ್ತ್ರ.

ಆ ವರ್ಷ ಸಮವಸ್ತ್ರದಲ್ಲಿ ಕೊಂಚ ಬದಲಾವಣೆ ತರಬೇಕು ಎಂದು ನಮ್ಮ ವಿಭಾಗದ ಮುಖ್ಯಸ್ಥರ ಇರಾದೆಯಾಗಿತ್ತು. ಅದರಂತೆ ಹೊಸ ರೀತಿಯ ಖಾದಿ ಉಡುಪಿಗೆ ತಯಾರಿ ನಡೆಸಿಯೇಬಿಟ್ಟೆವು. ಎಲ್ಲರೊಳು ಭಿನ್ನ ರೀತಿ ಗುರುತಿಸಿಕೊಳ್ಳಲು ನಮಗೆ ಖಾದಿ ಉಡುಪು ಸಾಥ್ ನೀಡಿತು.

ಅಖಿಲ ಭಾರತ ಕನ್ನಡ ಸಾಹಿತ್ಯ ಸಮ್ಮೇಳನವನ್ನು ನಮ್ಮೂರಲ್ಲಿ ಹಮ್ಮಿಕೊಳ್ಳಲಾಗಿತ್ತು. ಅಂದು ನಾವೆಲ್ಲರೂ ಖಾದಿ ಬಟ್ಟೆ ಧರಿಸಿ ಮೇಳಕ್ಕೆ ಹೋದರೆ ನೆರೆದಿದ್ದ ಜನರ ಚಿತ್ತ ನಮ್ಮತ್ತಲೇ ನೆಟ್ಟಿತ್ತು. ಸಮ್ಮೇಳನದ ಜನಸಾಗರದಲ್ಲಿ ಎದ್ದು ಕಾಣುತ್ತಿದ್ದವರು ಖಾದಿ ಸಮವಸ್ತ್ರಧಾರಿಗಳಾದ ನಾವೇ. ಬಹಳ ಜನ ನಮ್ಮನ್ನು ನೋಡಿ ‘ಓ... ಮೋದಿ ಫ್ಯಾನ್ಸ್’ ಎಂದಾಗ ‘ಅಲ್ಲ, ನಾವು ಖಾದಿ ಫ್ಯಾನ್ಸ್‌’ ಎಂದು ಖಾದಿಯ ಬಗ್ಗೆ ಹೆಮ್ಮೆಯಿಂದ ಹೇಳಿದ್ದೆವು.

ಮುಂದಿನ ದಿನಗಳಲ್ಲಿ ಖಾದಿಬಟ್ಟೆಯಲ್ಲಿ ಎಲ್ಲೇ ಹೋದರೂ, ಯಾರೇ ಆಗಲಿ ಗಮನಿಸದೇ ಇರುತ್ತಿರಲಿಲ್ಲ. ಅಷ್ಟರ ಮಟ್ಟಿಗೆ ನಮ್ಮ ಸಮವಸ್ತ್ರ ಫೇಮಸ್ ಆಗಿತ್ತು. ಅಲ್ಲದೆ ಈ ಖಾದಿಯಿಂದಲೇ ಎಷ್ಟೋ ಜನ ನಮ್ಮನ್ನು ಗುರುತಿಸುವಂತಾಗಿತ್ತು.

ಒಂದು ಬಾರಿ ವಿಶ್ವವಿದ್ಯಾಲಯವೊಂದು ಏರ್ಪಡಿಸಿದ್ದ ಮಾಧ್ಯಮ ಹಬ್ಬದಲ್ಲಿ ಪಾಲ್ಗೊಳ್ಳಲೆಂದು ತೆರಳಿದ್ದ ನಾವೆಲ್ಲರೂ ವಿವಿಯ ಆವರಣದಲ್ಲಿ ಬಸ್‍ನಿಂದ ಇಳಿಯುತ್ತಿದ್ದಂತೆಯೇ ಅಲ್ಲಿದ್ದವರು ‘ಬಂದ್ರು ನೋಡು ವಿಜಾಪುರದವ್ರು’ ಎಂದು ಮಾತನಾಡಿದ್ದು ನಮ್ಮ ಖಾದಿ ಜನಪ್ರಿಯತೆಯನ್ನು ತಿಳಿಸಿತ್ತು. ಇಡೀ ಸಮಾರಂಭದಲ್ಲಿ ಶಿಸ್ತಿನಿಂದ ಸಮವಸ್ತ್ರ ಧರಿಸಿದ ಏಕೈಕ ವಿವಿ ನಮ್ಮದಾಗಿತ್ತು.

ಖಾದಿಯಲ್ಲಿ ತೆಗೆಸಿಕೊಂಡ ಛಾಯಾಚಿತ್ರಗಳು ಕ್ಯಾಂಪಸ್‍ನ ಗೋಡೆ ಮೇಲೆ ಇಂದಿಗೂ ನಳನಳಿಸುತ್ತಿವೆ. ಖಾದಿ ಉಡುಪು ನಮ್ಮಲ್ಲಿ ಹಲವು ನೆನಪುಗಳನ್ನು ಇಂದಿಗೂ ಹಸಿರಾಗಿಸಿದೆ.

⇒-ಕವಿತಾ ಪಾಟೀಲ ವಿಜಯಪುರ

ವಿರಾಟ್ ಕೊಹ್ಲಿ ನಾಯಕತ್ವದ ಭಾರತ ಕ್ರಿಕೆಟ್‌ ತಂಡ ಕಪ್ ಗೆಲ್ಲುತ್ತಾ? ಐಸಿಸಿ ವಿಶ್ವಕಪ್ 2019 ಯಾರು ಗೆಲ್ಲುತ್ತಾರೆ? ಕೋಟ್ಯಂತರ ಕ್ರಿಕೆಟ್ ಪ್ರೇಮಿಗಳ ನಿರೀಕ್ಷೆಗೆ ಉತ್ತರ ಸಿಗುವ ಕಾಲ ಬಂದಿದೆ. ವಿಶ್ವಕಪ್ ಕ್ರಿಕೆಟ್‌ನ ಸ್ಕೋರ್ ಅಪ್‌ಡೇಟ್ಸ್‌, ಮ್ಯಾಚ್‌ಗಳ ವರದಿ, ವಿಶ್ವಕಪ್ ಕ್ರಿಕೆಟ್ ಹೆಜ್ಜೆ ಗುರುತು, ಆಟಗಾರರ ಸಂದರ್ಶನ, ವೇಳಾಪಟ್ಟಿ ತಿಳಿದುಕೊಳ್ಳಲು www.prajavani.net ಜಾಲತಾಣಕ್ಕೆ ಭೇಟಿ ನೀಡಿ. ಕ್ರೀಡಾಪ್ರೇಮಿಗಳ ನೆಚ್ಚಿನ ಆಯ್ಕೆ ‘ಪ್ರಜಾವಾಣಿ’. ಇದು ಅತ್ಯಂತ ವಿಶ್ವಾಸಾರ್ಹ ಸುದ್ದಿ ಮಾಧ್ಯಮ.

ಬರಹ ಇಷ್ಟವಾಯಿತೆ?

  • 0

    Happy
  • 0

    Amused
  • 0

    Sad
  • 0

    Frustrated
  • 0

    Angry