ವಾಷಿಂಗ್ಟನ್: ಭೂಮಿಯಿಂದ 42 ಸಾವಿರ ಕಿ. ಮೀ. ದೂರದಲ್ಲಿ ಕ್ಷುದ್ರಗ್ರಹವೊಂದು ಗುರುವಾರ ಹಾದುಹೋಗಲಿದೆ. 2012 ಟಿಸಿ4 ಹೆಸರಿನ ಕ್ಷುದ್ರಗ್ರಹವು 15ರಿಂದ 30 ಮೀಟರ್ ಸುತ್ತಳತೆ ಹೊಂದಿದೆ ಎನ್ನಲಾಗಿದೆ. ಆದರೆ ಇದರಿಂದ ಭೂಮಿಗೆ ಯಾವುದೇ ಅಪಾಯವಿಲ್ಲ ಎಂದು ವಿಜ್ಞಾನಿಗಳು ಹೇಳಿದ್ದಾರೆ.
ಅಂಟಾರ್ಕ್ಟಿಕಾದ ಸನಿಹದಲ್ಲಿ ಗುರುವಾರ (ಅಕ್ಟೊಬರ್ 12) ಬೆಳಗ್ಗೆ 11:12ಕ್ಕೆ ಇದು ಹಾದುಹೋಗಲಿದೆ. ಜಾಗತಿಕ ವೀಕ್ಷಣಾ ಜಾಲವನ್ನು ಪರೀಕ್ಷೆಗೊಳಪಡಿಸಲು ಇದು ಸೂಕ್ತ ಅವಕಾಶ ಎಂದು ವಿಜ್ಞಾನಿಗಳು ಹೇಳಿದ್ದಾರೆ.
2012ರಲ್ಲಿ ಹವಾಯಿಯಲ್ಲಿರುವ ಪನೋರಮಿಕ್ ಸರ್ವೆ ಟೆಲಿಸ್ಕೋಪ್ ಮತ್ತು ರ್ಯಾಪಿಡ್ ರೆಸ್ಪಾನ್ಸ್ ಸಿಸ್ಟಮ್ (ಪ್ಯಾನ್–ಸ್ಟಾರ್ಸ್) ಮೂಲಕ ಇದನ್ನು ಪತ್ತೆಹಚ್ಚಲಾಗಿತ್ತು. ಇದು 2017ರಲ್ಲಿ ಭೂಮಿಯ ಸನಿಹ ಬರಲಿದೆ ಎಂದು ವಿಜ್ಞಾನಿಗಳು ಅಂದಾಜು ಮಾಡಿದ್ದರು.
ಮುಂದಿನ 100 ವರ್ಷಗಳ ಕಾಲ ಭೂಮಿಯನ್ನು ಯಾವುದೇ ಕ್ಷುದ್ರಗ್ರಹಗಳು ಅಪ್ಪಳಿಸುವ ಸಾಧ್ಯತೆಯಿಲ್ಲ ಎಂದು ವಿಜ್ಞಾನಿಗಳು ಹೇಳಿದ್ದಾರೆ.