ನವದೆಹಲಿ: ದೇಶದ ಟೆಲಿಕಾಂ ನೆಟ್ವರ್ಕ್ ಕ್ಷೇತ್ರದಲ್ಲಿ ಬೆಲೆ ಸಮರದಿಂದ ಹೊಸ ಗ್ರಾಹಕರನ್ನು ತನ್ನತ್ತ ಸೆಳೆದುಕೊಂಡಿರುವ ರಿಲಯನ್ಸ್ ಜಿಯೊ ದೀಪಾವಳಿಗೆ ಹೊಸ ಕೊಡುಗೆಯನ್ನು ಮುಂದಿಟ್ಟಿದೆ.
ಅನಿಯಮಿತ ಕರೆ ಹಾಗೂ ಡಾಟಾ ಬಳಕೆಗಾಗಿ ಮೂರು ತಿಂಗಳಿಗೆ ₹399 ರೀಚಾರ್ಜ್ ಆಫರ್ ನೀಡಿದ್ದ ಜಿಯೋ, ಇದೀಗ ರೀಚಾರ್ಜ್ ಹಣವನ್ನು ಗ್ರಾಹಕರಿಗೆ ವಾಪಾಸ್ ಮರಳಿಸಲು ನಿರ್ಧರಿಸಿದೆ. ಜಿಯೋ ಧನ್ ಧನಾ ಧನ್ ಫೋಸ್ಟರ್ಗಳ ಮೂಲಕ ಕೊಡುಗೆ ಬಗ್ಗೆ ಗ್ರಾಹಕರಿಗೆ ಮಾಹಿತಿ ನೀಡಿದೆ.
ರೀಚಾರ್ಜ್ ಮಾಡುವಾಗ ಗ್ರಾಹಕರು ನೀಡಿದ್ದ ₹399 ಹಣ ₹50ರ 8 ವೋಚರ್ಗಳ ಮೂಲಕ ಮರಳಿ ಪಡೆಯಬಹುದಾಗಿದೆ. ಗ್ರಾಹಕರು ಆ ವೋಚರ್ಗಳನ್ನು ಮುಂದಿನ ದಿನಗಳಲ್ಲಿ ಅವಶ್ಯಕತೆ ಇದ್ದಾಗ ಬಳಸಿಕೊಂಡು ಪುನಃ ರೀಚಾರ್ಜ್ ಮಾಡಿಕೊಳ್ಳಬಹುದು. ವೋಚರ್ಗಳನ್ನು ನವೆಂಬರ್ 15ರ ನಂತರ ಮಾತ್ರ ಬಳಸಿಕೊಳ್ಳಬಹುದು.
ಈ ಕೊಡುಗೆ ಅಕ್ಟೋಬರ್ 12ರಿಂದ 19ರವರೆಗೆ ಮಾತ್ರ ಅನ್ವಯವಾಗಲಿದೆ. ಈ ದಿನಾಂಕದೊಳಗೆ ರೀಚಾರ್ಜ್ ಮಾಡಿಸಿದವರು ಜಿಯೋ ನೀಡುವ ವೋಚರ್ಗಳ ಲಾಭ ಪಡೆದುಕೊಳ್ಳಬಹುದು.