ಷರೀಫ್‌ ಮಕ್ಕಳಿಗೆ 30 ದಿನ ಸಮಯ ನೀಡಿದ ನ್ಯಾಯಾಲಯ

‘ಷರೀಫ್‌ ಮಕ್ಕಳಾದ ಹಸ್ಸನ್‌ ಹಾಗೂ ಹುಸ್ಸೇನ್‌ ಅವರು ಅನಾರೋಗ್ಯಪೀಡಿತ ತಾಯಿ ಕುಲ್ಸೂಮ್‌ ಜತೆ ಲಂಡನ್‌ನಲ್ಲಿದ್ದಾರೆ. ಅವರ ವಿರುದ್ಧ ರೆಡ್‌ ವಾರಂಟ್‌ ಜಾರಿಗೊಳಿಸುವ ಪ್ರಕ್ರಿಯೆಯಲ್ಲಿದೆ. ಭ್ರಷ್ಟಾಚಾರ ಹಾಗೂ ಅಕ್ರಮ ಗಣ ವರ್ಗಾವಣೆಗೆ ಸಂಬಂಧಿಸಿದ ಮೂರು ಪ್ರಕರಣಗಳಲ್ಲಿ ಒಂದು ತಿಂಗಳ ಒಳಗಾಗಿ ಹಾಜರಾಗದಿದ್ದರೆ, ಮುಂದಿನ ಕ್ರಮ ಕೈಗೊಳ್ಳಲಾಗುವುದು’ ಎಂದು ರಾಷ್ಟ್ರೀಯ ಉತ್ತರದಾಯಿತ್ವ ಸಂಸ್ಥೆ  (ಎನ್‌ಎಬಿ) ತಿಳಿಸಿದೆ.

‘ನಿಗದಿತ ಗಡುವಿನ ಒಳಗಾಗಿ ನ್ಯಾಯಾಲಯದ ಮುಂದೆ ಹಾಜರಾಗದಿದ್ದರೆ, ಘೋಷಿತ ಅಪರಾಧಿ ಎಂದು ಘೋಷಿಸಿ ಅವರ ಆಸ್ತಿಗಳನ್ನು ಮುಟ್ಟುಗೋಲು ಹಾಕಲಾಗುವುದು’ ಎಂದು ಎನ್‌ಎಬಿ ಸ್ಪಷ್ಟಪಡಿಸಿದೆ.

ನವೆಂಬರ್‌ 10ರ ಒಳಗಾಗಿ ಹಾಜರಾಗುವಂತೆ ಮಾಡೆಲ್‌ ಟೌನ್‌  ಹಾಗೂ ಉಮ್ರಾ ರೈವಿಂಡ್‌ ಮನೆಗಳಿಗೆ ನೋಟಿಸ್‌ ಕಳುಹಿಸಿದ್ದಾರೆ ಎಂದು ಷರೀಫ್ ಕುಟುಂಬಸ್ಥರು ತಿಳಿಸಿದ್ದಾರೆ.

ಇಂದು ದೋಷಾರೋಪ ಸಲ್ಲಿಕೆ: ಭ್ರಷ್ಟಾಚಾರ ಹಾಗೂ ಅಕ್ರಮ ಹಣ ವರ್ಗಾವಣೆಗೆ ಸಂಬಂಧಿಸಿದಂತೆ ನವಾಜ್‌ ಷರೀಫ್, ಮಗಳು ಮರಿಯಂ ಹಾಗೂ ಅಳಿಯ ಮೊಹಮ್ಮದ್‌ ಸಪ್ದರ್‌ ವಿರುದ್ಧ ದೋಷಾರೋಪಪಟ್ಟಿಯನ್ನು ಶುಕ್ರವಾರ (ಅ.13) ನ್ಯಾಯಾಲಯಕ್ಕೆ ಸಲ್ಲಿಸಲಾಗುತ್ತದೆ.

ಮಗಳು– ಅಳಿಯನಿಗೆ ಜಾಮೀನು: ಇದೇ ಪ್ರಕರಣದಲ್ಲಿ ಷರೀಫ್‌ ಮಗಳು ಮತ್ತು ಅಳಿಯನಿಗೆ ಕೋರ್ಟ್‌ ಷರತ್ತುಬದ್ಧ ಜಾಮೀನು ನೀಡಿದೆ. ನ್ಯಾಯಾಲಯದ ಅನುಮತಿ ಇಲ್ಲದೇ ದೇಶಬಿಟ್ಟು ತೆರಳಬಾರದು, 50 ಸಾವಿರ ಶ್ಯೂರಿಟಿಬಾಂಡ್‌ ಒದಗಿಸುವಂತೆ ಇಬ್ಬರಿಗೆ ಸೂಚನೆ ನೀಡಿದೆ.