ಅಲೆಮಾರಿಗಳ ವಸತಿ ಪ್ರದೇಶದಲ್ಲಿ ಡೆಂಗಿ ಭೀತಿ

‘ಪುರಸಭೆ ನೀರಿನ ಮೇಲ್ತೊಟ್ಟಿ ಬಳಿ ಅಲೆಮಾರಿ ಜನರ ಅನೇಕ ಕುಟುಂಬಗಳು ಹಲವು ವರ್ಷಗಳಿಂದ ಗುಡಿಸಲುಗಳಲ್ಲಿ ವಾಸವಾಗಿವೆ. ಪ್ರತಿ ಕುಟುಂಬದಲ್ಲಿ ಇಬ್ಬರು ಮಕ್ಕಳು ಅಥವಾ ಹಿರಿಯರು ಜ್ವರಬಾಧೆಯಿಂದ ಬಳಲುತ್ತಿದ್ದಾರೆ. ಕೆಲವರಲ್ಲಿ ಜ್ವರ ಕಡಿಮೆಯಾಗದಿರುವುದರಿಂದ ಕೊಪ್ಪಳ ಜಿಲ್ಲಾ ಆಸ್ಪತ್ರೆಯಲ್ಲಿ ಚಿಕಿತ್ಸೆ ಪಡೆಯುತ್ತಿದ್ದಾರೆ’ ಎಂದು ಆರೋಗ್ಯ ಇಲಾಖೆ ಮೂಲಗಳು ತಿಳಿಸಿವೆ.

ಹಲವು ಜನರಲ್ಲಿ ವಿಷಮಶೀತಜ್ವರ, ಗಂಟಲು ಬೇನೆ ಇದೆ. ಜನ ಅನಾರೋಗ್ಯ ಪೀಡಿತರಾಗಿರುವುದು ಮತ್ತು ಪರಿಸರದಲ್ಲಿ ಮಾಲಿನ್ಯ ಉಂಟಾಗಿದ್ದನ್ನು ಗಮನಿಸಿದ ಕಾಲೊನಿಯ ನಿವಾಸಿಗಳು ಗುರುವಾರ ಸಮಸ್ಯೆಯನ್ನು ಪುರಸಭೆ ಮತ್ತು ಆರೋಗ್ಯ ಇಲಾಖೆ ಗಮನಕ್ಕೆ ತಂದರು. ತಕ್ಷಣ ಸ್ಥಳಕ್ಕೆ ಭೇಟಿ ನೀಡಿದ ಪುರಸಭೆ ಅಧ್ಯಕ್ಷ ಖಾಜಾ ಮೈನುದ್ದೀನ್‍ಮುಲ್ಲಾ, ಅಗತ್ಯ ಸ್ಥಳದಲ್ಲಿ ಬ್ಲೀಚಿಂಗ್, ಫಾಗಿಂಗ್‌ ಮೂಲಕ ನೈರ್ಮಲ್ಯ ಸಂಬಂಧಿ ಕೆಲಸಗಳನ್ನು ಕೈಗೊಳ್ಳಲು ಸಿಬ್ಬಂದಿಗೆ ಸೂಚಿಸಿದರು.

ನಂತರ ಸ್ಥಳಕ್ಕೆ ಬಂದ ಸಾರ್ವಜನಿಕ ಆಸ್ಪತ್ರೆ  ವೈದ್ಯಾಧಿಕಾರಿ ಡಾ.ಚಂದ್ರಕಾಂತ ಮಂತ್ರಿ, ಆ ಪ್ರದೇಶದಲ್ಲಿ ಸಂಗ್ರವಾಗಿರುವ ನೀರಿನಲ್ಲಿ ಲಾರ್ವಾಗಳ ಸಮೀಕ್ಷೆ ನಡೆಸಿದರು. ನೀರು ನಿಂತ ಸ್ಥಳದಲ್ಲಿ ಲಾರ್ವಾ ನಿಯಂತ್ರಿಸುವ ನಾಶಕ ಸಿಂಪಡಿಸಿದರು. ಖಾಲಿ ಬ್ಯಾರಲ್, ಟ್ಯಾಂಕ್‍ಗಳಲ್ಲಿ ಸಂಗ್ರಹವಾಗಿದ್ದ ನೀರಿನಲ್ಲಿ ಬಹಳಷ್ಟು ಪ್ರಮಾಣದ ಲಾರ್ವಾಗಳು ಪತ್ತೆಯಾಗಿದ್ದು, ಅಂಥ ನೀರನ್ನು ವಿಲೇವಾರಿ ಮಾಡಲಾಯಿತು. ವಾರಗಟ್ಟಲೆ ನೀರು ಸಂಗ್ರಹಿಸುವುದರಿಂದ ಸೊಳ್ಳೆಗಳ ಉತ್ಪತ್ತಿ ಹೆಚ್ಚಾಗುತ್ತದೆ ಎಂಬ ಬಗ್ಗೆ ಜನರಲ್ಲಿ ಅರಿವು ಮೂಡಿಸಿದರು.

ಖಾಲಿಕೊಡಗಳ ರಾಶಿ: ಈ ಪ್ರದೇಶದ ಸಮೀಪದಲ್ಲಿ ಪ್ಲಾಸ್ಟಿಕ್ ಕೊಡಗಳನ್ನು ತಯಾರಿಸುವ ಕಾರ್ಖಾನೆ ಇದ್ದು, ಅಲ್ಲಿ ಹಳೆಯ ನೂರಾರು ಕೊಡ, ಪ್ಲಾಸ್ಟಿಕ್ ಡಬ್ಬ, ಬ್ಯಾರಲ್‍ಗಳ ರಾಶಿಯೇ ಇದೆ. ಅವುಗಳಲ್ಲಿ ಮಳೆ ನೀರು ಸಂಗ್ರಹವಾಗಿದ್ದು, ಸೊಳ್ಳೆಗಳ ಲಾರ್ವಾಗಳು ಹೆಚ್ಚಾಗಲು ಕಾರಣವಾಗಿದೆ ಎಂಬುದನ್ನು ಆರೋಗ್ಯ ಇಲಾಖೆ ಸಿಬ್ಬಂದಿ ಹೇಳಿದರು. ಕೊಡಗಳನ್ನು ಬಯಲಿನಲ್ಲಿ ಸಂಗ್ರಹಿಸಿರುವುದರಿಂದ ನೀರು ನಿಲ್ಲುತ್ತದೆ. ಕಾರ್ಖಾನೆಯವರು ಸುರಕ್ಷತೆಗೆ ಗಮನಹರಿಸದ ಕಾರಣ ಸುತ್ತಲಿನ ಜನ ತೊಂದರೆ ಅನುಭವಿಸುವಂತಾಗಿದೆ ಎಂದು ಕಾಲೊನಿ ನಿವಾಸಿಗಳು ದೂರಿದರು.