ಮಳೆಗೆ ಮುದುಡಿದ ಹತ್ತಿ; ನೆಲಕಚ್ಚಿದ ಭತ್ತ

ಗುರುವಾರ , ಜೂನ್ 20, 2019
30 °C

ಮಳೆಗೆ ಮುದುಡಿದ ಹತ್ತಿ; ನೆಲಕಚ್ಚಿದ ಭತ್ತ

Published:
Updated:
ಮಳೆಗೆ ಮುದುಡಿದ ಹತ್ತಿ; ನೆಲಕಚ್ಚಿದ ಭತ್ತ

ಯಾದಗಿರಿ: ನಿರಂತರ ಮಳೆಯಿಂದಾಗಿ ಜಿಲ್ಲೆಯ ವಿವಿಧೆಡೆ ಕೆರೆಕಟ್ಟೆಗಳು ತುಂಬಿದ್ದು, ಶಹಾಪುರ ತಾಲ್ಲೂಕಿನ ಖಾನಾಪುರ ಕೆರೆ ಕೋಡಿ ಬಿದ್ದಿದೆ. ಶುಕ್ರವಾರ ರಾತ್ರಿ ಬೀಸಿದ ಬಿರುಗಾಳಿ ಮಳೆಗೆ ಯಾದಗಿರಿ ತಾಲ್ಲೂಕಿನ ಗುರಸಣಗಿ, ನಾಯ್ಕಲ್, ಚಟ್ನಳ್ಳಿ, ಮಗನಾಲ ಸೇರಿದಂತೆ ಭೀಮಾ ನದಿ ಪಾತ್ರದಲ್ಲಿ ರೈತರು ಬೆಳೆದಿರುವ 300 ಎಕರೆಗೂ ಹೆಚ್ಚು ಪ್ರದೇಶದಲ್ಲಿ ಕೊಯ್ಲು ಹಂತ ತಲುಪಿದ್ದ ಭತ್ತದ ಬೆಳೆ ನೆಲಕಚ್ಚಿದೆ.

ನಿರಂತರ ಮಳೆ ಕಾರಣ ಜಿಲ್ಲೆಯಲ್ಲಿ ಬಹುತೇಕ ಹತ್ತಿ ಹೊಲಗಳಲ್ಲಿ ಮೊಳಕಾಲುಮಟ್ಟ ನೀರು ಸಂಗ್ರಹಗೊಂಡಿದೆ. ಅರಳಿದ್ದ ಹತ್ತಿ ಮಳೆಗೆ ಮುದುಡಿಕೊಂಡಿದ್ದು, ಹತ್ತಿ ಬೆಳೆಗಾರರು ಸಂಕಷ್ಟ ಎದುರಿಸುವಂತಾಗಿದೆ.

‘ಒಂದು ವಾರ ಮಳೆ ಬರದಿದ್ದರೆ ಹತ್ತಿ ಬಿಡಿಸಿಟ್ಟುಕೊಳ್ಳುತ್ತಿದ್ದೆವು. ಕೈಗೆ ಬಂದ ತುತ್ತು ಬಾಯಿಗೆ ಇಲ್ಲದಂತಾಗಿದೆ’ ಎಂದು ಗುರಸಣಗಿ ಗ್ರಾಮದ ರೈತರು ಅಸಹಾಯಕತೆ ವ್ಯಕ್ತಪಡಿಸಿದರು.

ಜಿ.ರಮೇಶ್ 20 ಎಕರೆ, ಎ.ಎನ್.ನಾಗೇಶ್ವರರಾವ್ 25 ಎಕರೆ, ಎ.ವೆಂಕಟೇಶ್ವರರಾವ್ 20 ಎಕರೆ, ಶ್ರೀನಿವಾಸ್ 50 ಎಕರೆ, ವಿ.ನಾಗೇಶ್ವರರಾವ್ 25 ಎಕರೆ, ಗೋಪಿ 30 ಎಕರೆ, ವೆಂಕಟರಾಜು 60 ಎಕರೆ, ರಾಜಾಸಾಬ್ 3 ಎಕರೆ, ನರಸಪ್ಪ 6 ಎಕರೆ ಹಾಗೂ ಯಾದಗಿರಿ ಕಸಬದ ಶ್ರೀನಿವಾಸ 40 ಎಕರೆ, ರೆಡ್ಡಿಸೀನ 40 ಎಕರೆ, ಬಿ. ಪರಮೇಶ್ವರರಾವ್ 50 ಎಕರೆಯಷ್ಟು ಭತ್ತದ ಬೆಳೆ ಮಳೆಗಾಳಿಗೆ ನೆಲಕಚ್ಚಿದ್ದು, ಲಕ್ಷಾಂತರ ಬೆಳೆಹಾನಿ ಸಂಭವಿಸಿದೆ.

131 ಮನೆಗಳು ಕುಸಿತ: ನಿರಂತರ ಮಳೆಗೆ ಜಿಲ್ಲೆಯಲ್ಲಿ ಇದುವರೆಗೂ ಒಟ್ಟು 131 ಮನೆಗಳು ಕುಸಿದಿವೆ. ಪ್ರಕೃತಿ ವಿಕೋಪ ಹಾನಿ ಕುರಿತು ಜಿಲ್ಲೆಯಲ್ಲಿ ಜಿಲ್ಲಾಡಳಿತ ಸರ್ವೆ ನಡೆಸಿದ್ದು, ಕುಸಿದಿರುವ ಮನೆಗಳ ಸಂಖ್ಯೆ ಮತ್ತಷ್ಟೂ ಹೆಚ್ಚುವ ಸಾಧ್ಯತೆ ಇದೆ ಎಂದು ಜಿಲ್ಲಾಧಿಕಾರಿ ಜೆ.ಮಂಜುನಾಥ್ ‘ಪ್ರಜಾವಾಣಿ’ಗೆ ತಿಳಿಸಿದರು.

ಯಾದಗಿರಿ ತಾಲ್ಲೂಕಿನಲ್ಲಿ 20, ಶಹಾಪುರ ತಾಲ್ಲೂಕಿನಲ್ಲಿ 61, ಸುರಪುರ ತಾಲ್ಲೂಕಿನಲ್ಲಿ 35, ಹುಣಸಗಿ ನೂತನ ತಾಲ್ಲೂಕಿನಲ್ಲಿ 15 ಮನೆಗಳು ಕುಸಿದಿರುವುದಾಗಿ ಕಂದಾಯ ಇಲಾಖೆ ನಡೆಸಿರುವ ಸರ್ವೆ ವರದಿ ತಿಳಿಸಿದೆ. ಬೆಳೆಹಾನಿಗೆ ಸಂಬಂಧಿಸಿದಂತೆ ಅಧಿಕಾರಿಗಳ ಸರ್ವೆ ಕಾರ್ಯ ಮುಂದುವರಿದಿದೆ. ಜಿಲ್ಲೆಯಲ್ಲಿ ಭೀಮಾ ಮತ್ತು ಕೃಷ್ಣಾ ನದಿಗೆ ಅಡ್ಡಲಾಗಿ ನಿರ್ಮಿಸಿರುವ ಗುರಸಣಗಿ ಬ್ಯಾರೇಜ್, ಗೂಗಲ್, ಸನ್ನತಿ, ಜೋಳದಡಗಿ ಬಾರೇಜುಗಳು ತುಂಬಿ ಹರಿಯುತ್ತಿವೆ.

ವಿರಾಟ್ ಕೊಹ್ಲಿ ನಾಯಕತ್ವದ ಭಾರತ ಕ್ರಿಕೆಟ್‌ ತಂಡ ಕಪ್ ಗೆಲ್ಲುತ್ತಾ? ಐಸಿಸಿ ವಿಶ್ವಕಪ್ 2019 ಯಾರು ಗೆಲ್ಲುತ್ತಾರೆ? ಕೋಟ್ಯಂತರ ಕ್ರಿಕೆಟ್ ಪ್ರೇಮಿಗಳ ನಿರೀಕ್ಷೆಗೆ ಉತ್ತರ ಸಿಗುವ ಕಾಲ ಬಂದಿದೆ. ವಿಶ್ವಕಪ್ ಕ್ರಿಕೆಟ್‌ನ ಸ್ಕೋರ್ ಅಪ್‌ಡೇಟ್ಸ್‌, ಮ್ಯಾಚ್‌ಗಳ ವರದಿ, ವಿಶ್ವಕಪ್ ಕ್ರಿಕೆಟ್ ಹೆಜ್ಜೆ ಗುರುತು, ಆಟಗಾರರ ಸಂದರ್ಶನ, ವೇಳಾಪಟ್ಟಿ ತಿಳಿದುಕೊಳ್ಳಲು www.prajavani.net ಜಾಲತಾಣಕ್ಕೆ ಭೇಟಿ ನೀಡಿ. ಕ್ರೀಡಾಪ್ರೇಮಿಗಳ ನೆಚ್ಚಿನ ಆಯ್ಕೆ ‘ಪ್ರಜಾವಾಣಿ’. ಇದು ಅತ್ಯಂತ ವಿಶ್ವಾಸಾರ್ಹ ಸುದ್ದಿ ಮಾಧ್ಯಮ.

ಬರಹ ಇಷ್ಟವಾಯಿತೆ?

  • 0

    Happy
  • 0

    Amused
  • 0

    Sad
  • 0

    Frustrated
  • 0

    Angry