ಬೆಂಗಳೂರು: ಈ ಬಾರಿಯ ಮುಂಗಾರು ಮಳೆ ಹನಿಗಳೊಂದಿಗೆ ದಾಖಲೆಗಳ ಬುಟ್ಟಿಯನ್ನೇ ಹೊತ್ತು ತಂದಿದೆ. ನಗರ ದಶಕದಲ್ಲೇ ಕಾಣದ ವರ್ಷಧಾರೆಗೆ ಸಾಕ್ಷಿಯಾಗಿದೆ. ಅಕ್ಟೋಬರ್ನಲ್ಲಿ ಇದುವರೆಗೆ ಸುರಿದ ಮಳೆಯೂ ಹತ್ತು ವರ್ಷಗಳ ದಾಖಲೆಯನ್ನು ಮುರಿದಿದೆ.
ಆಗಸ್ಟ್ನಿಂದ ಚುರುಕುಗೊಂಡಿರುವ ಮುಂಗಾರು, ಮಳೆ ಹನಿಗಳ ರಾಶಿಯನ್ನೇ ಸುರಿಸುತ್ತಿದೆ. ಕಳೆದ 3 ತಿಂಗಳಿನಿಂದಲೂ ವಾಡಿಕೆಗಿಂತ ದುಪ್ಪಟ್ಟು ಮಳೆಯಾಗುತ್ತಿದ್ದು, ಈ ತಿಂಗಳಿನಲ್ಲಿಯೂ ಅದು ಮುಂದುವರಿದಿದೆ.
ಅಕ್ಟೋಬರ್ 1ರಿಂದ 15ರವರೆಗೆ ನಗರದಲ್ಲಿ 386.5 ಮಿ.ಮೀ ಮಳೆಯಾಗಿದೆ. ಇದು 2007ರಿಂದ ಇಲ್ಲಿಯವರೆಗೆ ಈ ತಿಂಗಳಿನಲ್ಲಿ ಸುರಿದ ಅತಿ ಹೆಚ್ಚು ಪ್ರಮಾಣದ ಮಳೆಯಾಗಿದೆ.
2014ರಲ್ಲಿ ಸುರಿದ 343.8 ಮಿ.ಮೀ ಮಳೆ ಈ ದಶಕದ ಇದುವರೆಗಿನ ದಾಖಲೆಯಾಗಿತ್ತು. 2005ರ ಅಕ್ಟೋಬರ್ನಲ್ಲಿ ಸುರಿದ 605.6 ಮಿ.ಮೀ ಮಳೆ ಸಾರ್ವತ್ರಿಕ ದಾಖಲೆಯಾಗಿದ್ದು, ಈ ತಿಂಗಳ ಅಂತ್ಯದವರೆಗೂ ಇದೇ ಪ್ರಮಾಣದ ಮಳೆ ಮುಂದುವರಿದರೆ ಆ ದಾಖಲೆಯೂ ಅಳಿಸಿ ಹೋಗಲಿದೆ.
ಒಂದು ದಿನದ ಮಳೆಯಲ್ಲೂ ದಾಖಲೆ: ಅ.6ರಂದು ಸುರಿದ 76 ಮಿ.ಮೀ ಮಳೆಯು ಹತ್ತು ವರ್ಷಗಳಲ್ಲಿ ಈ ತಿಂಗಳಲ್ಲಿ ಒಂದೇ ದಿನ ಸುರಿದ ದಾಖಲೆ ಮಳೆ.
2014ರ ಅಕ್ಟೋಬರ್ 9ರಂದು ಸುರಿದಿದ್ದ 63.1 ಮಿ.ಮೀ ಮಳೆ ಈ ಹಿಂದಿನ ದಾಖಲೆಯಾಗಿತ್ತು. ಇದಲ್ಲದೆ 1997ರಲ್ಲಿ ಅಕ್ಟೋಬರ್ 1ರಂದು 178.9 ಮಿ.ಮೀ ಮಳೆಯಾಗಿತ್ತು. ಇದು ಸಾರ್ವತ್ರಿಕ ದಾಖಲೆಯಾಗಿದೆ.
ದಾಖಲೆಗೆ ಮುನ್ನುಡಿ : ಜನವರಿಯಿಂದ ಅಕ್ಟೋಬರ್ 15ರವರೆಗೆ ನಗರದಲ್ಲಿ 1,655.7 ಮಿ.ಮೀ ಮಳೆ ಸುರಿದಿದೆ. ಇದು ವಾಡಿಕೆಗಿಂತ ಶೇ 62ರಷ್ಟು (719 ಮಿ.ಮೀ) ಅಧಿಕ ಮಳೆಯಾಗಿದೆ.
‘2005ರಲ್ಲಿ ಬೆಂಗಳೂರು ನಗರ 1606.8 ಮಿ.ಮೀ ಮಳೆಗೆ ಸಾಕ್ಷಿಯಾಗಿತ್ತು. ಆ ನಂತರ ಈ ಪ್ರಮಾಣದಲ್ಲಿ ಮಳೆಯಾಗುತ್ತಿರುವುದು ಪ್ರಸಕ್ತ ವರ್ಷದಲ್ಲಿಯೇ’ ಎನ್ನುತ್ತಾರೆ ಹವಾಮಾನ ಇಲಾಖೆ ಅಧಿಕಾರಿಗಳು.
‘ಇದೇ 18ರವರೆಗೆ ಮಳೆ ಪ್ರಬಲವಾಗಿರುತ್ತದೆ. ಅಲ್ಲದೆ, ಹಿಂಗಾರು ಮಳೆಯೂ ವಾಡಿಕೆಯಷ್ಟು ಆಗುವುದರಿಂದ ಈ ಬಾರಿ ಹೊಸ ದಾಖಲೆ ಸೃಷ್ಟಿಸುವ ಸಾಧ್ಯತೆ ಇದೆ’ ಎಂದು ಭಾರತೀಯ ಹವಾಮಾನ ಇಲಾಖೆಯ ಬೆಂಗಳೂರ ವಿಭಾಗದ ಹಂಗಾಮಿ ನಿರ್ದೇಶಕ ಸುಂದರ ಮೇತ್ರಿ ತಿಳಿಸಿದರು.