ಜಿಲ್ಲೆಯಾದ್ಯಂತ ‘ದೀಪಾವಳಿ’ ಸಂಭ್ರಮ

ಬುಧವಾರ, ಜೂನ್ 19, 2019
23 °C

ಜಿಲ್ಲೆಯಾದ್ಯಂತ ‘ದೀಪಾವಳಿ’ ಸಂಭ್ರಮ

Published:
Updated:

ಹಾವೇರಿ: ಮೊದಲ ಮೂರು ತಿಂಗಳು ಮಳೆಯ ಕೊರತೆ, ಬಳಿಕ ಬಂದ ಭಾರಿ ಮಳೆಯಿಂದ ‘ಮುಂಗಾರು’ ಬೆಳೆ ನಷ್ಟವಾಗಿದೆ. ಆದರೆ, ಮೂರು ವರ್ಷದ ಬರದ ಬಳಿಕ ನದಿಯಲ್ಲಿ ನೀರಿನ ಹರಿವು ಹಾಗೂ ಪ್ರಮುಖ ಕೆರೆ ಕಟ್ಟೆಗಳಲ್ಲಿ ಕೋಡಿ ಬಿದ್ದಿದೆ. ಬೆಳೆ ನಷ್ಟದ ನಡುವೆಯೂ ಭರವಸೆ ಮೂಡಿಸಿದೆ.

ಹೀಗಾಗಿ ಆರ್ಥಿಕ ಸಂಕಷ್ಟದಲ್ಲೂ ಜಿಲ್ಲೆಯಾದ್ಯಂತ ದಿೀಪಾವಳಿ ಬೆಳಗಿದೆ. ‘ಸಾಂಪ್ರದಾಯಿಕ ನಂಬಿಕೆ ಮತ್ತು ಹಿಂಗಾರು ಕೈ ಹಿಡಿಯಲಿದೆ’ ಎಂಬ ಆಶಯವೇ ಈ ಬಾರಿಯ ‘ದೀಪ’ದ ಹಬ್ಬದ ಸಂಭ್ರಮಕ್ಕೆ ಕಾರಣವಾಗಿದೆ.

ಅಮವಾಸ್ಯೆಯ ದಿನ ವರ್ತಕರು, ವ್ಯಾಪಾರಿಗಳು , ಉದ್ಯಮಿಗಳು ಲಕ್ಷ್ಮೀಯನ್ನು ಆರಾಧಿಸಿದರು. ಮನೆಗಳಲ್ಲಿ ಗೃಹಿಣಿಯರು, ಮಕ್ಕಳು ಸಮೀಪದ ದೇಗುಲಗಳಿಗೆ ತೆರಳಿ ವಿಶೇಷ ಪೂಜೆ ಸಲ್ಲಿಸಿದರು. ಹಬ್ಬದ ಕಾರಣ ಆತ್ಮೀಯರಿಗೆ ಉಡುಗೊರೆನೀಡಿ, ಸಿಹಿ ಹಂಚಿ, ಪಟಾಕಿ ಸಿಡಿಸಿ ಸಂಭ್ರಮಿಸಿದರು. ಈ ಭಾಗದಲ್ಲಿ ದೀಪಾವಳಿಯನ್ನು ನಾಲ್ಕು ದಿನ ಆಚರಿಸುವ ವಾಡಿಕೆಯೂ ಇದೆ. ಇದರಿಂದಾಗಿ ಹಲವೆಡೆ ದೀಪಾವಳಿಯು ಮಂಗಳವಾರದಿಂದಲೇ ಪ್ರಾರಂಭವಾಗಿದೆ.

ಗಂಗಾ ಪೂಜೆ: ನೀರು ತುಂಬುವ ಹಬ್ಬಕ್ಕಾಗಿ ಸೋಮವಾರವೇ ಬಚ್ಚಲಮನೆಯ ನೀರು ಕಾಯಿಸುವ ಹಂಡೆಯನ್ನು ಸ್ವಚ್ಛಗೊಳಿಸಿ, ಸಿಂಗರಿಸಿ ನೀರು ತುಂಬಿ ಗಂಗಾ ಪೂಜೆ ನೆರವೇರಿಸುವ ಮೂಲಕ ಬೆಳಕಿನ ಹಬ್ಬಕ್ಕೆ ಮುನ್ನುಡಿ ಬರೆದರು. ಗಂಗಾ ಪೂಜೆಯಲ್ಲಿ ಪಾತ್ರೆಗಳನ್ನು ಹಿಂಡೆಲೆಕ್ಕಿ ಬಳ್ಳಿ, ಮಾಹಾಲಿಂಗನ ಬಳ್ಳಿ ಹಾಗೂ ಪುಂಡಿ ನಾರಿನಿಂದ ಅಲಂಕರಿಸಿದ್ದರು. ಬುಧವಾರ ಬೆಳಿಗ್ಗೆ ಎಣ್ಣೆ ಸ್ನಾನ ಮಾಡಿ, ಹೊಸ ಬಟ್ಟೆ ಧರಿಸಿ ದೇವರಿಗೆ ವಿಶೇಷ ಪೂಜೆ ಸಲ್ಲಿಸಿದರು.

‘ನವ ವಿವಾಹಿತ ಅಳಿಯನಿಗೆ ಮಾವನ ಮನೆಯಲ್ಲಿ ದೀಪಾವಳಿಯು ವಿಶೇಷವಾಗಿದೆ. ಎಣ್ಣೆ ಸ್ನಾನ ಮಾಡಿ ಬರುವ ಪುರುಷರಿಗೆ ಮಹಿಳೆಯರು ತಿಲಕ ಇಟ್ಟು ಆರತಿ ಬೆಳಗುವುದು ವಾಡಿಕೆ. ಬಳಿಕ ಶಾವಿಗೆ, ಬೆಲ್ಲ ಹಾಗೂ ಹಾಲನ್ನು ಸವಿಯುತ್ತಾರೆ’ ಎಂದು ನಗರದ ನಿವೃತ್ತ ಶಿಕ್ಷಕ ಆರ್‌.ಎನ್‌.ಕರ್ಜಗಿ ತಿಳಿಸಿದರು. ಮನೆಗಳ ಮುಂಭಾಗದಲ್ಲಿ ಆಕಾಶ ಬುಟ್ಟಿಗಳನ್ನು ಕಟ್ಟಿ, ಮುಸ್ಸಂಜೆಗೆ ಮಣ್ಣಿನ ಹಣತೆಗಳನ್ನು ಹಚ್ಚಿಟ್ಟರು. ಇಡೀ ನಗರವೇ ದೀಪದ ಬೆಳಕಲ್ಲಿ ಕಂಗೊಳಿಸಿತು.

ಇಂದು ಬಲಿಪಾಡ್ಯ: ‘ದೀಪಾವಳಿಯಲ್ಲಿ ಇಂದು ಪ್ರಮುಖ ದಿನ. ನಗರದ ಪ್ರತಿ ಮನೆಗಳಲ್ಲಿ ದನದ ಕೊಟ್ಟಿಗೆ ಅಥವಾ ಮನೆಯ ಆವರಣ ಗೋಡೆಯ ಒಳಗೆ ಸೆಗಣಿಯಿಂದ ಪ್ರತಿಷ್ಠಾಪಿಸಿದ ಹಟ್ಟಿಲಕ್ಕವ್ವನವಿಗೆ ವಿಶೇಷ ಪೂಜೆ ಮಾಡಲಾಗುತ್ತದೆ. ಬಳಿಕ ಆರತಿ ಬೆಳಗಿ ಹಬ್ಬದೂಟ ಸವಿಯುವುದು ವಾಡಿಕೆ’ ಎಂದು ನಗರದ ದಾಕ್ಷಾಯಿಣಿ ಗಾಣಿಗೇರ ತಿಳಿಸಿದರು. ಬಲಿಪಾಡ್ಯದಂದು ಮಧ್ಯಾಹ್ನ ನಗರದ ವೀರಭದ್ರೇಶ್ವರ ದೇವಸ್ಥಾನದ ಮುಂಭಾಗದಲ್ಲಿ ಕೊಬ್ಬರಿ ಹೋರಿ ನಡೆಯುತ್ತದೆ.

ವಿರಾಟ್ ಕೊಹ್ಲಿ ನಾಯಕತ್ವದ ಭಾರತ ಕ್ರಿಕೆಟ್‌ ತಂಡ ಕಪ್ ಗೆಲ್ಲುತ್ತಾ? ಐಸಿಸಿ ವಿಶ್ವಕಪ್ 2019 ಯಾರು ಗೆಲ್ಲುತ್ತಾರೆ? ಕೋಟ್ಯಂತರ ಕ್ರಿಕೆಟ್ ಪ್ರೇಮಿಗಳ ನಿರೀಕ್ಷೆಗೆ ಉತ್ತರ ಸಿಗುವ ಕಾಲ ಬಂದಿದೆ. ವಿಶ್ವಕಪ್ ಕ್ರಿಕೆಟ್‌ನ ಸ್ಕೋರ್ ಅಪ್‌ಡೇಟ್ಸ್‌, ಮ್ಯಾಚ್‌ಗಳ ವರದಿ, ವಿಶ್ವಕಪ್ ಕ್ರಿಕೆಟ್ ಹೆಜ್ಜೆ ಗುರುತು, ಆಟಗಾರರ ಸಂದರ್ಶನ, ವೇಳಾಪಟ್ಟಿ ತಿಳಿದುಕೊಳ್ಳಲು www.prajavani.net ಜಾಲತಾಣಕ್ಕೆ ಭೇಟಿ ನೀಡಿ. ಕ್ರೀಡಾಪ್ರೇಮಿಗಳ ನೆಚ್ಚಿನ ಆಯ್ಕೆ ‘ಪ್ರಜಾವಾಣಿ’. ಇದು ಅತ್ಯಂತ ವಿಶ್ವಾಸಾರ್ಹ ಸುದ್ದಿ ಮಾಧ್ಯಮ.

ಬರಹ ಇಷ್ಟವಾಯಿತೆ?

  • 0

    Happy
  • 0

    Amused
  • 0

    Sad
  • 0

    Frustrated
  • 0

    Angry