ಸೇತುವೆ ಹಾನಿ: ಬಸ್‌ ಸಂಚಾರ ಸ್ಥಗಿತ

ಈಚೆಗೆ ಸುರಿದ ಭಾರಿ ಮಳೆಯಿಂದ ಹಳ್ಳ ತುಂಬಿ ಹರಿದು ಸೇತುವೆ ಕೊಚ್ಚಿಕೊಂಡು ಹೋಗಿದೆ. ಸೇತುವೆಯ ಸ್ವಲ್ಪ ಉಳಿದ ಭಾಗ ಮೇಲೆ ಬೈಕ್‌, ಆಟೋ ಮತ್ತು ಕಾರುಗಳು ಮಾತ್ರ ಸಂಚರಿಸುತ್ತವೆ. ಕೋಠಾ ಗ್ರಾಮದ ಮಾರ್ಗವಾಗಿ ಐದಬಾವಿ, ಲಿಂಗಸುಗೂರು, ತಾಳಿಕೋಟ, ವಿಜಯಪುರ, ಕಲಬುರ್ಗಿ ಹೋಗುವ ಬಸ್‌ಗಳ ಸಂಚಾರ ಸ್ಥಗಿತಗೊಂಡಿದೆ.

ಇದರಿಂದ ರೈತರು ಗುರುಗುಂಟಾದಲ್ಲಿರುವ ರೈತ ಸಂಪರ್ಕ ಕೇಂದ್ರಕ್ಕೆ ಹಟ್ಟಿ, ಕೋಠಾ ಸೇರಿದಂತೆ ಗೆಜ್ಜಲಗಟ್ಟಾ, ಆನ್ವರಿ, ಹಿರೇನಗನೂರು, ವೀರಾಪುರ, ನಿಲೋಗಲ್‌,ಚುಕನಟ್ಟಿ ಗ್ರಾಮದ ರೈತರು ಹೋಗಲು ಆಗುತ್ತಿಲ್ಲ. ಕೃಷಿ ಪರಿಕರಗಳು ತರಲು ಆಗುತ್ತಿಲ್ಲ. ಗುರುಗುಂಟಾ, ಪೈದೊಡ್ಡಿ, ರಾಯದುರ್ಗ, ಐದಬಾವಿ, ಗುಂತುಕೋಳ, ಟಣಮಕಲ್‌ ಗ್ರಾಮದಿಂದ ಹಟ್ಟಿ ಚಿನ್ನದ ಗಣಿ ಕಾರ್ಮಿಕರು ಸುತ್ತುಬಳಸಿ ಕೆಲಸಕ್ಕೆ ಬಂದು ಹೋಗಬೇಕಿದೆ.

‘ಗುರುಗುಂಟಾ ಹಾಗೂ ಹಟ್ಟಿಗೆ ಹೋಗಬೇಕಾದರೆ ಖಾಸಗಿ ವಾಹನಗಳಲ್ಲಿ ದುಬಾರಿ ದರ ನೀಡ ಹೋಗಬೇಕು. ವಿದ್ಯಾರ್ಥಿಗಳು ವಿಶೇಷ ತರಗತಿಗಳಿಗೆ ಹಾಜರಾಗಲು ಆಗುತ್ತಿಲ್ಲ. ಜನರಿಗೆ ಖಾಸಗಿ ವಾಹನಗಳೇ ಗತಿ.

ಚುನಾಯಿತ ಪ್ರತಿನಿಧಿಗಳು, ಕಾಮಗಾರಿಗಳಿಗೆ ಭೂಮಿ ಪೂಜೆ ನೆರವೇರಿಸಿ ಬರೀ ಭರವಸೆಗಳನ್ನು ನೀಡುತ್ತಾರೆ’ ಎಂದು ಖಯುಂ ಹಾಜಿಮಲಂಗ, ಮೋಹಿನುದ್ದೀನ್‌ ಪಾಶಾ ಮಲ್ಲೇಶ ಮ್ಯಾಗೇರಿ, ಸದ್ದಾಂ ಹುಸೇನ್‌ ಆರೋಪಿಸುತ್ತಾರೆ.

‘ಗ್ರಾಮ ಪಂಚಾಯಿತಿಯವರು ತಾತ್ಕಾಲಿಕವಾಗಿ ಸೇತುಯನ್ನು ದುರಸ್ತಿ ಮಾಡಬೇಕು. ಗುರುಗುಂಟಾ ಹಟ್ಟಿ ರಸ್ತೆ ಮೇಲ್ದರ್ಜೆಗೇರಿಸಬೇಕು. ಸೇತುವೆಯನ್ನು ಎತ್ತರಿಸಬೇಕು. ವಾರದೊಳಗಾಗಿ ರಸ್ತೆ ಮತ್ತು ಸೇತುವೆ ಕಾಮಗಾರಿ ಆರಂಭಿಸಬೇಕು. ಇಲ್ಲದಿದ್ದರೆ ರಸ್ತೆ ತಡೆ ಕೈಗೊಂಡು ಪ್ರತಿಭಟನೆ ನಡೆಸುತ್ತೇವೆ’ ಎಂದು ಎಚ್ಚರಿಕೆ ನೀಡಿದ್ದಾರೆ.