ಜಿಎಸ್‌ಟಿ ಎಂದರೆ ‘ಗಬ್ಬರ್‌ ಸಿಂಗ್‌ ಟ್ಯಾಕ್ಸ್‌’: ರಾಹುಲ್ ಗಾಂಧಿ ವ್ಯಂಗ್ಯ
ಅಹಮದಾಬಾದ್‌: ಜಿಎಸ್‌ಟಿಗೆ ಹೊಸ ವ್ಯಾಖ್ಯೆ ಕೊಟ್ಟಿರುವ ಕಾಂಗ್ರೆಸ್ ಉಪಾಧ್ಯಕ್ಷ ರಾಹುಲ್ ಗಾಂಧಿ, ಅದು ಗಬ್ಬರ್‌ ಸಿಂಗ್‌ ಟ್ಯಾಕ್ಸ್‌ ಅಲ್ಲದೆ ಬೇರೇನೂ ಅಲ್ಲ ಎಂದು ಕುಹಕವಾಡಿದ್ದಾರೆ. 1980ರ ದಶಕದಲ್ಲಿ ಬಿಡುಗಡೆಯಾದ ಜನಪ್ರಿಯ ಹಿಂದಿ ಸಿನಿಮಾ ಶೋಲೆಯ ಖಳನಾಯಕನ ಹೆಸರು ಗಬ್ಬರ್‌ ಸಿಂಗ್‌.
‘ಜಿಎಸ್‌ಟಿ ಎಂದರೆ ಗಬ್ಬರ್‌ ಸಿಂಗ್‌ ಟ್ಯಾಕ್ಸ್‌. ಇದು ಸಾವಿರಾರು ಸಣ್ಣ ವ್ಯಾಪಾರಿಗಳನ್ನು ನಿರ್ನಾಮ ಮಾಡಿದೆ. ಈ ವ್ಯವಸ್ಥೆಯನ್ನು ಬದಲಾಯಿಸಲೇಬೇಕಿದೆ. ಅದನ್ನು ಸರಳಗೊಳಿಸಬೇಕಿದೆ. ಇಲ್ಲದಿದ್ದರೆ ಇಡೀ ದೇಶ ತೊಂದರೆ ಅನುಭವಿಸಬೇಕಾಗುತ್ತದೆ’ ಎಂದು ಗಾಂಧಿನಗರದಲ್ಲಿ ನಡೆದ ಕಾಂಗ್ರೆಸ್ ಸಮಾವೇಶದಲ್ಲಿ ರಾಹುಲ್ ಹೇಳಿದರು. ಇದೇ ಸಂದರ್ಭದಲ್ಲಿ ಹಿಂದುಳಿದ ವರ್ಗಗಳ ಮುಖಂಡ ಅಲ್ಪೆಶ್‌ ಠಾಕೋರ್‌ ಅವರನ್ನು ಪಕ್ಷಕ್ಕೆ ಸೇರಿಸಿಕೊಳ್ಳಲಾಯಿತು.
ಅಲ್ಪೆಶ್‌ ಬೆಂಬಲಿಗರು ಸಮಾವೇಶದಲ್ಲಿ ಗಣನೀಯ ಸಂಖ್ಯೆಯಲ್ಲಿದ್ದರು. ಪ್ರಧಾನಿ ನರೇಂದ್ರ ಮೋದಿ ಮತ್ತು ಬಿಜೆಪಿಯನ್ನು ಟೀಕಿಸಲು ಈ ಸಂದರ್ಭವನ್ನು ರಾಹುಲ್ ಬಳಸಿಕೊಂಡರು. ‘ಗುಜರಾತ್‌ನ ಬೀದಿಗಳಲ್ಲಿ ಇಂದು ಯಾವುದೋ ಒಂದು ಸಮುದಾಯ ಅಥವಾ ಒಬ್ಬ ವ್ಯಕ್ತಿ ಪ್ರತಿಭಟನೆ ಮಾಡುತ್ತಿಲ್ಲ. ಯಾವುದೋ ಕಾರಣಗಳಿಗಾಗಿ ಇಡೀ ರಾಜ್ಯವೇ ಪ್ರತಿಭಟನೆಯಲ್ಲಿ ತೊಡಗಿದೆ. ಇದೊಂದು ವಿಚಿತ್ರ ಸನ್ನಿವೇಶ’ ಎಂದು ರಾಹುಲ್ ಹೇಳಿದರು.
‘ಮೋದಿ ಅವರು ಜನರಿಗೆ ಯಾವ ಮಟ್ಟದಲ್ಲಿ ಕಿರುಕುಳ ನೀಡಿದ್ದಾರೆಂದರೆ ಜನರು ಸುಮ್ಮನೆ ಇರುವುದಕ್ಕೆ ಸಾಧ್ಯವೇ ಇಲ್ಲ. ನಿಮ್ಮ (ಅಲ್ಪೆಶ್‌) ಹಾಗೆಯೇ ಇನ್ನೂ ಇಬ್ಬರು ಯುವಕರು (ಹಾರ್ದಿಕ್‌ ಪಟೇಲ್‌ ಮತ್ತು ಜಿಗ್ನೇಶ್‌ ಮೇವಾನಿ) ಇದ್ದಾರೆ. ಪ್ರತಿ ಗುಜರಾತಿಯ ಹೃದಯದಲ್ಲಿಯೂ ಒಂದು ಧ್ವನಿ ಇದೆ. ಅದನ್ನು ದಮನ ಮಾಡುವುದು ಅಥವಾ ಖರೀದಿಸುವುದು ಸಾಧ್ಯವಿಲ್ಲ’ ಎಂದು ರಾಹುಲ್ ಅಭಿಪ್ರಾಯಪಟ್ಟರು.
#WATCH: Rahul Gandhi mocks PM on demonitisation announcement, says, 'PM said I don't like 500-1000 notes so I'm discontinuing them hahaha' pic.twitter.com/OYv4wparyO
— ANI (@ANI) October 23, 2017
ತಾಜಾ ಸುದ್ದಿಗಾಗಿ ಪ್ರಜಾವಾಣಿ ಟೆಲಿಗ್ರಾಂ ಚಾನೆಲ್ ಸೇರಿಕೊಳ್ಳಿ | ಪ್ರಜಾವಾಣಿ ಆ್ಯಪ್ ಇಲ್ಲಿದೆ: ಆಂಡ್ರಾಯ್ಡ್ | ಐಒಎಸ್ | ನಮ್ಮ ಫೇಸ್‌ಬುಕ್ ಪುಟ ಫಾಲೋ ಮಾಡಿ.