ಬೆಂಗಳೂರು: ಸರ್ಕಾರಿ ಸ್ವಾಮ್ಯದ ವಿಜಯ ಬ್ಯಾಂಕ್‌, ದ್ವಿತೀಯ ತ್ರೈಮಾಸಿಕದಲ್ಲಿ ₹ 185.46 ಕೋಟಿಗಳಷ್ಟು ನಿವ್ವಳ ಲಾಭ ಗಳಿಸಿದ್ದು, ಶೇ 20ರಷ್ಟು ಏರಿಕೆ ದಾಖಲಿಸಿದೆ.
2016–17ನೇ ಹಣಕಾಸು ವರ್ಷದ ಇದೇ ಅವಧಿಯಲ್ಲಿನ ನಿವ್ವಳ ಲಾಭವು ₹ 154.55 ಕೋಟಿಗಳಷ್ಟಿತ್ತು.
‘ಬ್ಯಾಂಕ್‌ನ ಒಟ್ಟು ವರಮಾನವು ವರ್ಷದ ಹಿಂದಿನ ₹ 3516 ಕೋಟಿಗಳಿಂದ ₹ 3,501 ಕೋಟಿಗಳಿಗೆ ಇಳಿದಿದೆ’ ಎಂದು ಬ್ಯಾಂಕ್‌ನ ವ್ಯವಸ್ಥಾಪಕ ನಿರ್ದೇಶಕ ಆರ್‌. ಎ. ಶಂಕರ ನಾರಾಯಣ ಅವರು ಗುರುವಾರ ಇಲ್ಲಿ ಸುದ್ದಿಗೋಷ್ಠಿಯಲ್ಲಿ ತಿಳಿಸಿದರು.
‘ಒಟ್ಟು ವೆಚ್ಚವು ವರ್ಷದ ಹಿಂದಿನ ₹ 2,945 ಕೋಟಿಗಳಿಂದ ₹ 2,767 ಕೋಟಿಗಳಿಗೆ ಇಳಿದಿದೆ. ಒಟ್ಟು ವಸೂಲಾಗದ ಸಾಲ (ಎನ್‌ಪಿಎ) ಶೇ 7.06ಕ್ಕೆ ಮತ್ತು ನಿವ್ವಳ ‘ಎನ್‌ಪಿಎ’ ಶೇ 5.1 ರಿಂದ ಶೇ 4.86ಗೆ ಇಳಿದಿದೆ’ ಎಂದರು.
ಮುಂಬೈ ಷೇರುಪೇಟೆಯಲ್ಲಿ ಬ್ಯಾಂಕ್‌ನ ಷೇರು ಗುರುವಾರದ ವಹಿವಾಟಿನಲ್ಲಿ ಶೇ 0.08ರಷ್ಟು ಕಡಿಮೆ ಬೆಲೆಗೆ (₹ 66) ವಹಿವಾಟು ನಡೆಸಿತು.
