ಶೋರೂಂ ಮಾಲೀಕರಿಗೆ ಬಿಸಿ: ಜನರಿಗೆ ನಿರಾಸೆ

ಗುರುವಾರ , ಜೂನ್ 20, 2019
26 °C

ಶೋರೂಂ ಮಾಲೀಕರಿಗೆ ಬಿಸಿ: ಜನರಿಗೆ ನಿರಾಸೆ

Published:
Updated:

ಬೀದರ್: ಹಿಂಬದಿ ಸೀಟು ಅಳವಡಿಸಿದ 100 ಸಿಸಿಗಿಂತ ಕಡಿಮೆ ಎಂಜಿನ್ ಸಾಮರ್ಥ್ಯದ ಹೊಸ ದ್ವಿಚಕ್ರ ವಾಹನಗಳ ನೋಂದಣಿ ನಿಷೇಧದ ಬಿಸಿ ಜಿಲ್ಲೆಯ ದ್ವಿಚಕ್ರ ವಾಹನ ವಿತರಕರು ಹಾಗೂ ಮಾರಾಟಗಾರರಿಗೂ ತಟ್ಟಿದೆ. ಕೆಲ ಮಾಲೀಕರು ಗ್ರಾಹಕರಿಂದ ಪಡೆದಿದ್ದ ಮುಂಗಡ ಹಣ ಮರಳಿಸಿದ್ದಾರೆ. ಕೆಲ ಶೋರೂಂ ಮಾಲೀಕರು ವಾಹನಗಳನ್ನು ಮರಳಿ ಕಂಪೆನಿಗೆ ಕಳಿಸುವ ಸಿದ್ಧತೆಯಲ್ಲಿದ್ದಾರೆ.

ಬೀದರ್‌ ನಗರದಲ್ಲಿ 6 ದ್ವಿಚಕ್ರ ವಾಹನ ಶೋರೂಂಗಳು ಇವೆ. ಮಾರುಕಟ್ಟೆಯಲ್ಲಿ ಹೀರೊ ಕಂಪೆನಿಯ ವಾಹನಗಳಿಗೆ ಹೆಚ್ಚು ಬೇಡಿಕೆ ಇರುವ ಕಾರಣ ಕೈಲಾಸ್ ಹೀರೊ ಮೋಟರ್ಸ್ ಮಾಲೀಕರು ದೀಪಾವಳಿಗೆ 600 ದ್ವಿಚಕ್ರ ವಾಹನಗಳನ್ನು ತರಿಸಿದ್ದಾರೆ.

ವಂಶ ಟಿವಿಎಸ್‌ ಶೋರೂಂನಲ್ಲಿ 60 ಹಾಗೂ ಸಿಂಧೋಲ್ ಬಜಾಜ್‌ ಶೋರೂಂನಲ್ಲಿ 7 ದ್ವಿಚಕ್ರ ವಾಹನಗಳಿವೆ. ಇವರೆಲ್ಲರೂ ಈಗ 100 ಸಿಸಿಗಿಂತ ಕಡಿಮೆ ಎಂಜಿನ್ ಸಾಮರ್ಥ್ಯದ ದ್ವಿಚಕ್ರ ವಾಹನಗಳನ್ನು ನೆರೆಯ ರಾಜ್ಯದ ವಿತರಕರಿಗೆ ಕಳಿಸಿಕೊಡಲು ತಯಾರಿ ನಡೆಸಿದ್ದಾರೆ.

‘100 ಕ್ಕಿಂತ ಕಡಿಮೆ ಸಿಸಿ ಬೈಕ್‌ಗಳು ₹ 47,500 ರಿಂದ ₹ 52,000 ಬೆಲೆಯಲ್ಲಿ ಮಾರುಕಟ್ಟೆಯಲ್ಲಿ ಲಭ್ಯ ಇವೆ. 100 ಸಿಸಿ ಮೇಲ್ಪಟ್ಟ ವಾಹನಗಳನ್ನು ಖರೀದಿಸಲು ಗ್ರಾಹಕರು ಹೆಚ್ಚುವರಿಯಾಗಿ ₹10 ಸಾವಿರದಿಂದ ₹15 ಸಾವಿರ ಪಾವತಿಸಬೇಕು. ಹೀಗಾಗಿ ರೈತರು, ಸಣ್ಣ ವ್ಯಾಪಾರಿಗಳು ಹಾಗೂ ಮಧ್ಯಮ ವರ್ಗದವರಿಗೆ ತೊಂದರೆ ಆಗುತ್ತಿದೆ’ ಎಂದು ಹೀರೊ ಮೋಟರ್ಸ್‌ ಶೋರೂಂನ ರಾಜಕುಮಾರ ಬಿರಾದಾರ ಹೇಳುತ್ತಾರೆ.

‘ಈ ಬಾರಿಯ ದೀಪಾವಳಿಗೆ ಗ್ರಾಹಕರ ಹೆಚ್ಚು ಬೇಡಿಕೆ ಇದ್ದ ಕಾರಣ ಕಂಪೆನಿಯಿಂದ 600 ವಾಹನಗಳನ್ನು ತರಿಸಿದ್ದೇವೆ. ನೋಂದಣಿ ನಿಷೇಧದ ನಂತರ ವಹಿವಾಟು ನಿಂತಿದೆ.

ವಿತರಕರು ಹೈಕೋರ್ಟ್‌ ಮೊರೆ ಹೋಗಿದ್ದಾರೆ. ಸ್ವಲ್ಪ ಕಾದು ನೋಡುತ್ತೇವೆ ಇಲ್ಲವೇ ದ್ವಿಚಕ್ರ ವಾಹನಗಳನ್ನು ಕಂಪೆನಿಗೆ ಮರಳಿಸುತ್ತೇವೆ’ ಎನ್ನುತ್ತಾರೆ ಅವರು.

‘ಟಿವಿಎಸ್-ಸ್ಕೂಟಿ ಪೆಪ್‌ಪ್ಲಸ್, ಟಿವಿಎಸ್ ಸ್ಪೋರ್ಟ್, ಟಿವಿಎಸ್ ಎಕ್ಸ್‌ಎಲ್‌–100 ಸೇರಿ 60 ದ್ವಿಚಕ್ರ ವಾಹನಗಳು ನಮ್ಮ ಶೋರೂಂನಲ್ಲಿ ಇವೆ. ವಾಹನ ಖರೀದಿಗಾಗಿ ಮುಂಗಡ ಹಣ ನೀಡಿದ್ದ 30 ಗ್ರಾಹಕರಿಗೆ ಹಣ ಮರಳಿಸಿದ್ದೇವೆ’ಎಂದು ವಂಶ ಟಿವಿಎಸ್‌ ಶೋರೂಂ ಮಾಲೀಕ ಪ್ರಶಾಂತ ಗುತ್ತಿ ವಿವರಿಸುತ್ತಾರೆ.

ನೆರೆಯ ಮಹಾರಾಷ್ಟ್ರ ಹಾಗೂ ತೆಲಂಗಾಣದಲ್ಲಿ ನೋಂದಣಿ ಶುಲ್ಕ ಕಡಿಮೆ ಇರುವ ಕಾರಣ ಗಡಿಯಲ್ಲಿನ ಗ್ರಾಹಕರು ಜಿಲ್ಲೆಯಲ್ಲಿ ವಾಹನ ಖರೀದಿಸುವುದು ಕಡಿಮೆ. ನಿಷೇಧ ಆದೇಶ ಮಾರುಕಟ್ಟೆಯ ಮೇಲೆ ದುಷ್ಪರಿಣಾಮ ಬೀರಿದೆ’ ಎಂದು ಅವರು ಹೇಳುತ್ತಾರೆ.

‘ನಮ್ಮ ಶೋರೂಂನಲ್ಲಿರುವ ಬಜಾಜ್‌ ಸಿಟಿ 100 ಬೈಕ್‌ಗಳನ್ನು ಪಕ್ಕದ ತೆಲಂಗಾಣದಲ್ಲಿರುವ ವಿತರಕರಿಗೆ ಕಳಿಸಲಾಗುವುದು. ಜಿಎಸ್‌ಟಿ ಜಾರಿಯಲ್ಲಿರುವ ಕಾರಣ ವಾಹನ ಖರೀದಿ ದರದಲ್ಲಿ ವ್ಯತ್ಯಾಸ ಆಗುವುದಿಲ್ಲ. ಸಾಗಾಣಿಕೆ ವೆಚ್ಚವನ್ನು ಕಂಪೆನಿ ಭರಿಸಲಿದೆ. ಎರಡು ಆಸನ ಬೇಕಿದ್ದರೆ ಅಧಿಕ ಸಿಸಿಯ ದ್ವಿಚಕ್ರ ವಾಹನ ಖರೀದಿಸಲು ಗ್ರಾಹಕರು ಹೆಚ್ಚಿನ ಹಣ ಕೊಡಬೇಕು’ ಎಂದು ಸಿಂಧೋಲ್ ಬಜಾಜ್‌ ಶೋರೂಂ ಮಾಲೀಕ ಸುಮಿತ್ ಸಿಂಧೋಲ್‌ ಹೇಳುತ್ತಾರೆ.

ವಿರಾಟ್ ಕೊಹ್ಲಿ ನಾಯಕತ್ವದ ಭಾರತ ಕ್ರಿಕೆಟ್‌ ತಂಡ ಕಪ್ ಗೆಲ್ಲುತ್ತಾ? ಐಸಿಸಿ ವಿಶ್ವಕಪ್ 2019 ಯಾರು ಗೆಲ್ಲುತ್ತಾರೆ? ಕೋಟ್ಯಂತರ ಕ್ರಿಕೆಟ್ ಪ್ರೇಮಿಗಳ ನಿರೀಕ್ಷೆಗೆ ಉತ್ತರ ಸಿಗುವ ಕಾಲ ಬಂದಿದೆ. ವಿಶ್ವಕಪ್ ಕ್ರಿಕೆಟ್‌ನ ಸ್ಕೋರ್ ಅಪ್‌ಡೇಟ್ಸ್‌, ಮ್ಯಾಚ್‌ಗಳ ವರದಿ, ವಿಶ್ವಕಪ್ ಕ್ರಿಕೆಟ್ ಹೆಜ್ಜೆ ಗುರುತು, ಆಟಗಾರರ ಸಂದರ್ಶನ, ವೇಳಾಪಟ್ಟಿ ತಿಳಿದುಕೊಳ್ಳಲು www.prajavani.net ಜಾಲತಾಣಕ್ಕೆ ಭೇಟಿ ನೀಡಿ. ಕ್ರೀಡಾಪ್ರೇಮಿಗಳ ನೆಚ್ಚಿನ ಆಯ್ಕೆ ‘ಪ್ರಜಾವಾಣಿ’. ಇದು ಅತ್ಯಂತ ವಿಶ್ವಾಸಾರ್ಹ ಸುದ್ದಿ ಮಾಧ್ಯಮ.

ಬರಹ ಇಷ್ಟವಾಯಿತೆ?

  • 0

    Happy
  • 0

    Amused
  • 0

    Sad
  • 0

    Frustrated
  • 0

    Angry