ಶಿಗ್ಗಾವಿ: ಬೆಳೆ ಕಸಿದ ಸೆಪ್ಟೆಂಬರ್ ಮಳೆ

ಸೋಮವಾರ, ಜೂನ್ 17, 2019
25 °C

ಶಿಗ್ಗಾವಿ: ಬೆಳೆ ಕಸಿದ ಸೆಪ್ಟೆಂಬರ್ ಮಳೆ

Published:
Updated:
ಶಿಗ್ಗಾವಿ: ಬೆಳೆ ಕಸಿದ ಸೆಪ್ಟೆಂಬರ್ ಮಳೆ

ಶಿಗ್ಗಾವಿ: ಮುಂಗಾರು ಮಳೆಯ ಕೊರತೆಯ ನಡುವೆಯೂ ಬೆಳೆದಿದ್ದ ಭತ್ತ, ಹತ್ತಿ, ಶೇಂಗಾ, ಗೋವಿನಜೋಳ ಬೆಳೆಗಳು ಸೆಪ್ಟೆಂಬರ್–ಅಕ್ಟೋಬರ್‌ನಲ್ಲಿ ಸುರಿದ ಮಳೆಗೆ ಶೇ 80ರಷ್ಟು ಹಾನಿಗೊಂಡಿವೆ. ಇದರಿಂದ ತಾಲ್ಲೂಕಿನ ರೈತರು ಸಂಕಷ್ಟಕ್ಕೆ ಸಿಲುಕಿದ್ದಾರೆ.

‘ಮುಂಗಾರು ಬಿತ್ತನೆ ಸಂದರ್ಭದಲ್ಲಿ ವಾಡಿಕೆ ಪ್ರಕಾರ 53 ಮಿಲಿ ಮೀಟರ್ ಮಳೆ ಆಗಬೇಕಾಗಿತ್ತು. ಆದರೆ ಸುರಿದಿದ್ದು, ಬರೀ 8 ಮಿಲಿ ಮೀಟರ್ ಮಳೆ. ಸೆಪ್ಟಂಬರ್ ತಿಂಗಳಲ್ಲಿ 108 ಮಿಲಿ ಮೀಟರ್ ವಾಡಿಕೆ ಮಳೆ. ಆದರೆ, ಈ ಬಾರಿ 159 ಮಿಲಿ ಮೀಟರ್ ಮಳೆ ಬಿದ್ದಿದೆ’ ಎನ್ನುತ್ತಾರೆ ಕೃಷಿ ಇಲಾಖೆ ಅಧಿಕಾರಿಗಳು.

‘ಮುಂಗಾರು ಆರಂಭದಲ್ಲಿ ನಿರೀಕ್ಷಿತ ಮಳೆ ಸುರಿಯಲಿಲ್ಲ. ಅದಾಗ್ಯೂ, ರೈತರು ಕೊಳವೆ ಬಾವಿ ನೆಚ್ಚಿ ಬಿತ್ತನೆ ಮಾಡಿದ್ದರು. ಇನ್ನೇನು ಬೆಳೆ ಕಟಾವಿಗೆ ಬಂದಿದೆ ಎನ್ನುವಾಗ ಮಳೆ ದಿಢೀರ್ ಎಂದು ನಿರಂತರವಾಗಿ ಸುರಿಯಿತು. ಇದರಿಂದ ಕೈಗೆ ಬಂದ ತುತ್ತು ಬಾಯಿಗೆ ಬರದಂತಾಗಿದೆ’ ಎಂದು ಬಂಕಾಪುರ ರೈತ ಬಸವರಾಜ ವಳಗೇರಿ ಹೇಳಿದರು.

‘ಈ ಹಂತದಲ್ಲಿ ಸುರಿದ ಮಳೆಗೆ ಶೇಂಗಾ, ಗೋವಿನಜೋಳ ಹಾಗೂ ಸೋಯಾಬಿನ್‌ ಬೀಜ ಮೊಳಕೆ ಒಡೆದು ಹಾಳಾಗಿವೆ. ಅದರಂತೆ ಬೆಳೆದು ನಿಂತ ಹತ್ತಿಯು ಮಳೆ ನೀರಿನೊಂದಿಗೆ ಮಣ್ಣು ಪಾಲಾಗಿದೆ. ಒಟ್ಟಾರೇ, ಇಡೀ ಮುಂಗಾರು ಬೆಳೆಗಳು ರೈತರ ಕೈ ಸೇರದೇ ನಷ್ಟ ಉಂಟು ಮಾಡಿವೆ’ ಎಂದು ಅವರು ಅಳಲು ತೋಡಿಕೊಂಡರು.

ಶೇಕಡಾ 80ರಷ್ಟು ಬೆಳೆ ಹಾಕಿ: ಕಳೆದೆರಡು ತಿಂಗಳಲ್ಲಿ ಸುರಿದ ಮಳೆಗೆ ತಾಲ್ಲೂಕಿನಲ್ಲಿ ಶೇಕಡಾ 80ರಷ್ಟು ಬೆಳೆಗಳು ಹಾನಿಗೊಂಡಿವೆ.

ತಾಲ್ಲೂಕಿನಲ್ಲಿ 38,870 ಸಾವಿರ ಹೆಕ್ಟೇರ್ ಭೂಪ್ರದೇಶ ಸಾಗುವಳಿ ಕ್ಷೇತ್ರ ಇದ್ದು, ಅದರಲ್ಲಿ ಅಂದಾಜು 38,300 ಹೆಕ್ಟೇರ್‌ ಭೂಪ್ರದೇಶದಲ್ಲಿ ಬಿತ್ತನೆ ಮಾಡಲಾಗಿತ್ತು.

‘ಈ ಪೈಕಿ 8,790 ಹೆಕ್ಟೇರ್‌ನಲ್ಲಿ ಹತ್ತಿ ಬಿತ್ತನೆ ಆಗಿತ್ತು. ಅದರಲ್ಲಿ ಮಳೆ ಅಬ್ಬರಕ್ಕೆ 7,280 ಹೆಕ್ಟೇರ್‌ನಷ್ಟು ಪ್ರದೇಶದ ಬೆಳೆ ನಾಶಗೊಂಡಿದೆ. ಈ ಬಾರಿ 5,575 ಹೆಕ್ಟೇರ್‌ ಪ್ರದೇಶದಲ್ಲಿ ಶೇಂಗಾ ಬಿತ್ತನೆ ಆಗಿತ್ತು.

ಅದರಲ್ಲಿ 4,100 ಹೆಕ್ಟೇರ್‌ನಷ್ಟು ಶೇಂಗಾ ವರುಣನ ಅಬ್ಬರಕ್ಕೆ ಹಾನಿಗೊಂಡಿದೆ. ಇನ್ನು, ಭತ್ತ ಬಿತ್ತನೆ ಮಾಡಿದ್ದ 8,300 ಹೆಕ್ಟೇರ್‌ ಪೈಕಿ, 6,700 ಹೆಕ್ಟರ್‌ ಪ್ರದೇಶದಲ್ಲಿನ ಬೆಳೆ ಬಹುತೇಕ ಹಾನಿಗೆ ಈಡಾಗಿದೆ. ಅಂದಾಜು 10,700 ಸಾವಿರ ಹೆಕ್ಟೇರ್‌ ಭೂಮಿಯಲ್ಲಿ ಬಿತ್ತಿದ್ದ ಗೋವಿನ ಜೋಳವೂ ಸಾಕಷ್ಟು ಹಾನಿಗೊಂಡಿದೆ.

ತಾಲ್ಲೂಕಿನಲ್ಲಿ ಬಿತ್ತನೆಯಾಗಿದ್ದ ಅಂದಾಜು 3,750 ಹೆಕ್ಟೇರ್‌ ಸೋಯಾಬಿನ್‌ ಪೈಕಿ, 3,200 ಹೆಕ್ಟೇರ್‌ನಷ್ಟು ಬೆಳೆ ನಾಶವಾಗಿದೆ’ ಎಂದು ಕೃಷಿ ಇಲಾಖೆ ಅಧಿಕಾರಿಗಳು ಹೇಳಿದ್ದಾರೆ. ‘ಈ ವರ್ಷ ಯಾವುದೇ ಬೆಳೆಯೂ ಸಮರ್ಪಕವಾಗಿ ಕೈ ಸೇರಿಲ್ಲ. ಮಳೆಯನ್ನೇ ನಂಬಿ ಬದುಕುವ ರೈತರ ಬದುಕು ಅತಂತ್ರದಲ್ಲಿ ಸಿಲುಕಿನ ನರಳುವಂತಾಗಿದೆ’ ಎಂದು ಹುಲಗೂರಿನ ರೈತ ಸಿದ್ದನಗೌಡ ಮರಿಗೌಡ್ರ ತಿಳಿಸಿದ್ದಾರೆ.

 

ವಿರಾಟ್ ಕೊಹ್ಲಿ ನಾಯಕತ್ವದ ಭಾರತ ಕ್ರಿಕೆಟ್‌ ತಂಡ ಕಪ್ ಗೆಲ್ಲುತ್ತಾ? ಐಸಿಸಿ ವಿಶ್ವಕಪ್ 2019 ಯಾರು ಗೆಲ್ಲುತ್ತಾರೆ? ಕೋಟ್ಯಂತರ ಕ್ರಿಕೆಟ್ ಪ್ರೇಮಿಗಳ ನಿರೀಕ್ಷೆಗೆ ಉತ್ತರ ಸಿಗುವ ಕಾಲ ಬಂದಿದೆ. ವಿಶ್ವಕಪ್ ಕ್ರಿಕೆಟ್‌ನ ಸ್ಕೋರ್ ಅಪ್‌ಡೇಟ್ಸ್‌, ಮ್ಯಾಚ್‌ಗಳ ವರದಿ, ವಿಶ್ವಕಪ್ ಕ್ರಿಕೆಟ್ ಹೆಜ್ಜೆ ಗುರುತು, ಆಟಗಾರರ ಸಂದರ್ಶನ, ವೇಳಾಪಟ್ಟಿ ತಿಳಿದುಕೊಳ್ಳಲು www.prajavani.net ಜಾಲತಾಣಕ್ಕೆ ಭೇಟಿ ನೀಡಿ. ಕ್ರೀಡಾಪ್ರೇಮಿಗಳ ನೆಚ್ಚಿನ ಆಯ್ಕೆ ‘ಪ್ರಜಾವಾಣಿ’. ಇದು ಅತ್ಯಂತ ವಿಶ್ವಾಸಾರ್ಹ ಸುದ್ದಿ ಮಾಧ್ಯಮ.

ಬರಹ ಇಷ್ಟವಾಯಿತೆ?

  • 0

    Happy
  • 0

    Amused
  • 0

    Sad
  • 0

    Frustrated
  • 0

    Angry