ನವದೆಹಲಿ: ಆತಿಥೇಯ ಭಾರತ ತಂಡ ಐಎಸ್ಎಸ್ಎಫ್ ವಿಶ್ವಕಪ್ ಫೈನಲ್ ಪದಕಗಳ ಪಟ್ಟಿಯಲ್ಲಿ ಏಳನೇ ಸ್ಥಾನದಲ್ಲಿ ಕಾಣಿಸಿಕೊಂಡಿದೆ. ಚೀನಾವನ್ನು ಹಿಂದಿಕ್ಕಿದ ಇಟಲಿ ಮೊದಲ ಸ್ಥಾನದಲ್ಲಿದೆ.
ಟೂರ್ನಿಯಲ್ಲಿ ಭಾರತ ಒಂದು ಚಿನ್ನ, ಒಂದು ಬೆಳ್ಳಿ ಹಾಗೂ ಒಂದು ಕಂಚು ಸೇರಿದಂತೆ ಒಟ್ಟು ಮೂರು ಪದಕಗಳನ್ನು ಜಯಿಸಿದೆ. ಜಿತು ರಾಯ್ ಹಾಗೂ ಹೀನಾ ಸಿಧು 10ಮೀ ಏರ್ ಪಿಸ್ತೂಲ್ ಮಿಶ್ರ ತಂಡ ವಿಭಾಗದಲ್ಲಿ ಚಿನ್ನ ಗೆದ್ದುಕೊಟ್ಟಿದ್ದಾರೆ.
ಸಂಗಮ್ ದಹಿಯಾ ಪುರುಷರ ಡಬಲ್ ಟ್ರ್ಯಾಪ್ ವಿಭಾಗದಲ್ಲಿ ಬೆಳ್ಳಿ ಗೆದ್ದರೆ, ಅಮನ್ಪ್ರೀತ್ ಸಿಂಗ್ ಪುರುಷರ 50ಮೀ ಪಿಸ್ತೂಲು ವಿಭಾಗದಲ್ಲಿ ಕಂಚಿನ ಪದಕಕ್ಕೆ ಕೊರಳೊಡ್ಡಿದ್ದರು.
ವಾರ್ಷಿಕ ಐಎಸ್ಎಸ್ಎಫ್ ಶೂಟಿಂಗ್ನಲ್ಲಿ ಇದು ಭಾರತದ ಅತ್ಯುತ್ತಮ ಸಾಧನೆಯಾಗಿದೆ. ಹೋದ ವರ್ಷ ಪಿಸ್ತೂಲ್ ವಿಭಾಗದಲ್ಲಿ ಜಿತು ಚಿನ್ನ ಗೆದ್ದುಕೊಂಡಿದ್ದರು.
ಅಂತಿಮ ದಿನ ಭಾನುವಾರ ಪುರುಷರ ಟ್ರ್ಯಾಪ್ ವಿಭಾಗದಲ್ಲಿ ಸ್ಪೇನ್ನ ಅಲ್ಬರ್ಟೊ ಫರ್ನಾಂಡಿಸ್ ಚಿನ್ನಕ್ಕೆ ಗುರಿನೆಟ್ಟರು. ವಿಶ್ವಕಪ್ನಲ್ಲಿ ಅವರು ಆರು ಬಾರಿ ಚಿನ್ನ ಗೆದ್ದಿದ್ದಾರೆ. 50ರಲ್ಲಿ ಅವರು 48 ಪಾಯಿಂಟ್ಸ್ ಗಿಟ್ಟಿಸುವ ಮೂಲಕ ವಿಶ್ವ ದಾಖಲೆ ನಿರ್ಮಿಸಿದರು.
ಇಟಲಿಯ ಹಾಲಿ ಚಾಂಪಿಯನ್ ಡೇನಿಯೆಲೆ ರೇಸ್ಕಾ 46 ಪಾಯಿಂಟ್ಸ್ಗಳಿಂದ ಬೆಳ್ಳಿ ಗೆದ್ದರು. ಈ ಪದಕದ ಬಲದಿಂದ ಇಟಲಿ ತಂಡ ಚೀನಾ ದೇಶವನ್ನು ಹಿಂದಿಕ್ಕಲು ಸಾಧ್ಯವಾಯಿತು. ಇಟಲಿ ಒಟ್ಟು ಎರಡು ಚಿನ್ನ, ಮೂರು ಬೆಳ್ಳಿ ಹಾಗೂ ಒಂದು ಕಂಚು ಗೆದ್ದಿದೆ. ಚೀನಾ ತಂಡ ಎರಡು ಚಿನ್ನ, ಎರಡು ಬೆಳ್ಳಿ, ನಾಲ್ಕು ಕಂಚು ಜಯಿಸಿದೆ.
50ಮೀ ರೈಫಲ್ ತ್ರಿ ಪೊಸಿಷನ್ ವಿಭಾಗದಲ್ಲಿ ಫ್ರಾನ್ಸ್ನ ಅಲೆಕ್ಸಸ್ ರಾಯ್ನಡು ಚಿನ್ನ ಜಯಿಸಿದರು. ಅವರು ಅಂತಿಮ ಸುತ್ತಿನಲ್ಲಿ 461.7 ಪಾಯಿಂಟ್ಸ್ ಗಳಿಸಿದರು. ಈ ವಿಭಾಗದ ಬೆಳ್ಳಿ ಪದಕವನ್ನು ಜೆಕ್ ಫಿಲಿಪ್ನ ನೆಪೆಚಲ್ 458.5 ಪಾಯಿಂಟ್ಸ್ಗಳಿಂದ ಗೆದ್ದರು.
449.1 ಪಾಯಿಂಟ್ಸ್ ಗಳಿಸಿದ್ದ 20 ವರ್ಷದ ಹಂಗೇರಿಯ ಶೂಟರ್ ಇಸ್ತಾವನ್ ಪೆನಿ ಕಂಚಿಗೆ ಕೊರಳೊಡ್ಡಿದರು. ಇಸ್ತಾವನ್ 10ಮೀ ಏರ್ ಪಿಸ್ತೂಲ್ ವಿಭಾಗದಲ್ಲಿ ಚಿನ್ನ ಗೆದ್ದಿದ್ದರು.
ಪುರುಷರ 25ಮೀ ರ್ಯಾಪಿಡ್ ಫೈರ್ ಪಿಸ್ತೂಲ್ ವಿಭಾಗದಲ್ಲಿ ಅಮೆರಿಕದ ಕೇತ್ ಸ್ಯಾಂಡರ್ಸನ್ ಚಿನ್ನ ಗೆದ್ದರೆ, ಫ್ರೆಂಚ್ನ ಕ್ಲೆಮಂಟ್ ಬೆಳ್ಳಿ ಜಯಿಸಿದರು. ಕೇತ್ 40ರಲ್ಲಿ 31 ಗುರಿಗಳನ್ನು ಯಶಸ್ವಿಯಾಗಿ ಗೆದ್ದರು. ಕ್ಲೆಮಂಟ್ 25 ಪಾಯಿಂಟ್ಸ್ ಗಳಿಸಿದರೆ, ಕೊರಿಯಾದ ಜಾಂಗ್ ಹೊ 24 ಪಾಯಿಂಟ್ಸ್ಗಳಿಂದ ಕಂಚಿನ ಪದಕ ಜಯಿಸಿದರು.
ತಾಜಾ ಸುದ್ದಿಗಾಗಿ ಪ್ರಜಾವಾಣಿ ಟೆಲಿಗ್ರಾಂ ಚಾನೆಲ್ ಸೇರಿಕೊಳ್ಳಿ | ಪ್ರಜಾವಾಣಿ ಆ್ಯಪ್ ಇಲ್ಲಿದೆ: ಆಂಡ್ರಾಯ್ಡ್ | ಐಒಎಸ್ | ನಮ್ಮ ಫೇಸ್ಬುಕ್ ಪುಟ ಫಾಲೋ ಮಾಡಿ.