ಶ್ರೀಗಳಿಂದ ಚುನಾವಣೆ ಸಿದ್ಧತೆ

ಬುಧವಾರ, ಜೂನ್ 26, 2019
26 °C

ಶ್ರೀಗಳಿಂದ ಚುನಾವಣೆ ಸಿದ್ಧತೆ

Published:
Updated:

ಬಾಗಲಕೋಟೆ: ‘ಕಾಂಗ್ರೆಸ್‌ನವರು ಕರೆದು ಟಿಕೆಟ್ ಕೊಟ್ಟರೂ ಆ ಪಕ್ಷದಿಂದ ಸ್ಪರ್ಧಿಸುವುದಿಲ್ಲ. ರಾಜ್ಯದಲ್ಲಿ ಮಠಾಧೀಶರಿಗೂ ಬಿಜೆಪಿಗೂ ಅವಿನಾಭಾವ ಸಂಬಂಧವಿದೆ. ಹಾಗಾಗಿ ಬೀಳಗಿ ಕ್ಷೇತ್ರದಿಂದ ಬಿ-ಫಾರಂ ಕೇಳುತ್ತಿರುವೆ’ ಎಂದು ಹೇಳುತ್ತಾ ತಾಲ್ಲೂಕಿನ ರಾಮಾರೂಢ ಮಠದ ಪರಮರಾಮಾರೂಢ ಶ್ರೀಗಳು ಹಳ್ಳಿ ಹಳ್ಳಿ ಸುತ್ತುತ್ತಿದ್ದಾರೆ. ಇದು ಬಿಜೆಪಿ ಮುಖಂಡರ ನಿದ್ದೆಗೆಡಿಸಿದೆ.

‘ಬಿ– ಫಾರಂ ಹಂಚಿಕೆಯ ಕೊನೆ ಕ್ಷಣದವರೆಗೂ ಬಿಜೆಪಿ ಟಿಕೆಟ್‌ಗಾಗಿ ಪ್ರಯತ್ನಿಸುವೆ. ಟಿಕೆಟ್‌ ಸಿಗದಿದ್ದರೆ ಪಕ್ಷೇತರನಾಗಿಯೇ ಸ್ಪರ್ಧಿಸುವೆ’ ಎನ್ನುವ ಶ್ರೀಗಳು, ಆಗಸ್ಟ್ 24ರಿಂದ ಕ್ಷೇತ್ರದಲ್ಲಿ ಪ್ರಚಾರ ಆರಂಭಿಸಿದ್ದಾರೆ. ‘ಈಗಾಗಲೇ 120 ಹಳ್ಳಿಗಳಿಗೆ ಹೋಗಿ ಬಂದಿರುವೆ. ಎರಡನೇ ಹಂತದಲ್ಲಿ ಮನೆ ಮನೆ ಪ್ರಚಾರ ಆರಂಭಿಸುವೆ’ ಎನ್ನುತ್ತಾರೆ.

ಅಮಿತ್‌ಶಾ ಮೇಲೆ ಭರವಸೆ: ‘ಬೀಳಗಿಯಲ್ಲಿ ಮಾಜಿ ಸಚಿವ ಮುರುಗೇಶ ನಿರಾಣಿ ಅವರೇ ಪಕ್ಷದ ಅಭ್ಯರ್ಥಿ’ ಎಂದು ಇತ್ತೀಚೆಗೆ ಜಿಲ್ಲೆಗೆ ಬಂದಿದ್ದ ಬಿಜೆಪಿ ರಾಜ್ಯ ಘಟಕದ ಅಧ್ಯಕ್ಷ ಬಿ.ಎಸ್‌.ಯಡಿಯೂರಪ್ಪ ಹೇಳಿದ್ದಾರೆ. ಬದಲಿಗೆ, ಯಾವುದೇ ಮಠಾಧೀಶರಿಗೂ ಟಿಕೆಟ್ ನೀಡುವುದಿಲ್ಲ ಎಂದೂ ಸ್ಪಷ್ಟಪಡಿಸಿದ್ದಾರೆ. ಆದರೂ ಸ್ವಾಮೀಜಿ ಬಿಜೆಪಿ ರಾಷ್ಟ್ರೀಯ ಅಧ್ಯಕ್ಷ ಅಮಿತ್ ಶಾ ಅವರತ್ತ ಕೈ ತೋರುತ್ತಾರೆ.

‘ಅಷ್ಟಕ್ಕೂ ಟಿಕೆಟ್ ಕೊಡುವ ಅಧಿಕಾರವನ್ನು ಯಡಿಯೂರಪ್ಪ ಅವರಿಗೆ ಹೈಕಮಾಂಡ್‌ ಕೊಟ್ಟಿಲ್ಲ. ಪಕ್ಷ ಸಂಘಟಿಸಿ ಕಾರ್ಯಕರ್ತರನ್ನು ಚುನಾವಣೆಗೆ ಸಿದ್ಧಗೊಳಿಸುವುದಷ್ಟೇ ಅವರ ಜವಾಬ್ದಾರಿ. ರಾಜ್ಯದಲ್ಲಿ 15 ಮಂದಿ ಸನ್ಯಾಸಿಗಳಿಗೆ ಟಿಕೆಟ್ ನೀಡುವುದಾಗಿ ಶಾ ಈ ಹಿಂದೆ ಹೇಳಿಕೆ ನೀಡಿದ್ದಾರೆ. ಅವರ ಮಾತಿನ ಮೇಲೆ ಭರವಸೆ ಇಟ್ಟಿರುವೆ. ಖಂಡಿತವಾಗಿಯೂ ನನಗೇ ಟಿಕೆಟ್‌ ಸಿಗಲಿದೆ’ ಎನ್ನುತ್ತಾರೆ.

ವಿಫಲ ಯತ್ನ: ಆದಿಚುಂಚನಗಿರಿ ಮಠಕ್ಕೆ ಇತ್ತೀಚೆಗೆ ಅಮಿತ್‌ ಶಾ ಬಂದಾಗ ಅವರನ್ನು ಭೇಟಿಯಾಗಲು ಶ್ರೀಗಳು ತೆರಳಿದ್ದರು. ಆದರೆ ಆಗ ಅವಕಾಶ ಸಿಕ್ಕಿರಲಿಲ್ಲ. ಯಡಿಯೂರಪ್ಪ ಅವರನ್ನು ಭೇಟಿಯಾಗಿ ಕೋರಿಕೆ ಸಲ್ಲಿಸಿದ್ದಾರೆ. ‘ಶೀಘ್ರ ದೆಹಲಿಗೆ ತೆರಳುವೆ. ನಾನೂ ಟಿಕೆಟ್ ಆಕಾಂಕ್ಷಿ ಎಂಬುದನ್ನು ಅಮಿತ್‌ಶಾ ಅವರಿಗೂ ಮನದಟ್ಟು ಮಾಡುವೆ’ ಎಂದು ಹೇಳುತ್ತಾರೆ.

‘ಈ ಹಿಂದೆ ಚಿತ್ರದುರ್ಗ ಬಳಿ ಪರಮರಾಮಾರೂಢ ಶ್ರೀಗಳ ಕಾರು ಅಪಘಾತಕ್ಕೀಡಾಗಿತ್ತು. ಆ ಪ್ರಕರಣದಲ್ಲಿ ತೊಂದರೆಗೀಡಾದವರಿಗೆ ಶ್ರೀಗಳು ₹80 ಲಕ್ಷ ಪರಿಹಾರ ನೀಡಬೇಕಿದೆ. ಆ ಹಣ ಸಂಗ್ರಹಿಸುವ ಸಲುವಾಗಿ ಶ್ರೀಗಳು ಚುನಾವಣೆಗೆ ಸ್ಪರ್ಧಿಸಲು ಮುಂದಾಗಿದ್ದಾರೆ’ ಎಂದು ಅವರ ವಿರೋಧಿಗಳು ಆರೋಪಿಸುತ್ತಾರೆ. ಅದರೆ ಇದನ್ನು ತಳ್ಳಿಹಾಕುವ ಶ್ರೀಗಳು, ‘ಅದು ರಾಜಕೀಯಕ್ಕೆ ಸಂಬಂಧವಿಲ್ಲದ ವ್ಯವಹಾರ. ಅಷ್ಟಕ್ಕೂ ಆ ಪ್ರಕರಣಕ್ಕೆ ಧಾರವಾಡ ಹೈಕೋರ್ಟ್‌ನಲ್ಲಿ ತಡೆಯಾಜ್ಞೆ ಸಿಕ್ಕಿದೆ. ಇದೆಲ್ಲಾ ಹಣದ ಮೇಲೆ ರಾಜಕೀಯ ಮಾಡಲು ಹೊರಟಿರುವವರ ಅಪಪ್ರಚಾರ’ ಎನ್ನುತ್ತಾರೆ.

ವಿರಾಟ್ ಕೊಹ್ಲಿ ನಾಯಕತ್ವದ ಭಾರತ ಕ್ರಿಕೆಟ್‌ ತಂಡ ಕಪ್ ಗೆಲ್ಲುತ್ತಾ? ಐಸಿಸಿ ವಿಶ್ವಕಪ್ 2019 ಯಾರು ಗೆಲ್ಲುತ್ತಾರೆ? ಕೋಟ್ಯಂತರ ಕ್ರಿಕೆಟ್ ಪ್ರೇಮಿಗಳ ನಿರೀಕ್ಷೆಗೆ ಉತ್ತರ ಸಿಗುವ ಕಾಲ ಬಂದಿದೆ. ವಿಶ್ವಕಪ್ ಕ್ರಿಕೆಟ್‌ನ ಸ್ಕೋರ್ ಅಪ್‌ಡೇಟ್ಸ್‌, ಮ್ಯಾಚ್‌ಗಳ ವರದಿ, ವಿಶ್ವಕಪ್ ಕ್ರಿಕೆಟ್ ಹೆಜ್ಜೆ ಗುರುತು, ಆಟಗಾರರ ಸಂದರ್ಶನ, ವೇಳಾಪಟ್ಟಿ ತಿಳಿದುಕೊಳ್ಳಲು www.prajavani.net ಜಾಲತಾಣಕ್ಕೆ ಭೇಟಿ ನೀಡಿ. ಕ್ರೀಡಾಪ್ರೇಮಿಗಳ ನೆಚ್ಚಿನ ಆಯ್ಕೆ ‘ಪ್ರಜಾವಾಣಿ’. ಇದು ಅತ್ಯಂತ ವಿಶ್ವಾಸಾರ್ಹ ಸುದ್ದಿ ಮಾಧ್ಯಮ.

ಬರಹ ಇಷ್ಟವಾಯಿತೆ?

  • 0

    Happy
  • 0

    Amused
  • 0

    Sad
  • 0

    Frustrated
  • 0

    Angry