ದೂರುವುದನ್ನು ನಿಲ್ಲಿಸಬೇಕು

ಹೀಗೊಂದು ಕಥೆಯಿದೆ. ಸ್ಪೇಯ್ನ್ ದೇಶದ ಧಾರ್ಮಿಕ ಮಠವೊಂದಕ್ಕೆ ಯುವಕನೊಬ್ಬ ತರಬೇತಿಗಾಗಿ ಸೇರ್ಪಡೆಗೊಂಡ. ಆ ಗುರುಮಠದಲ್ಲಿ ಮಾತಾಡುವುದು ನಿಷಿದ್ಧ. ಸಂಪೂರ್ಣ ಮೌನದಿಂದ ಜೀವಿಸಬೇಕಿತ್ತು. ಮಾತಾಡಲು ಅವಕಾಶ ಎರಡು ವರ್ಷಗಳಿಗೊಮ್ಮೆ ಸಿಗುತ್ತಿತ್ತು, ಅದೂ ಕೇವಲ ಎರಡು ಪದಗಳು.

ಉಸಿರು ಕಟ್ಟಿ ಜೀವಿಸಿದ ಯುವಕ ಎರಡು ವರ್ಷಗಳ ನಂತರ ಎರಡು ಪದಗಳನ್ನು ಆಡಲು ಸಿಕ್ಕಿದ ಅವಕಾಶದಲ್ಲಿ, ಊಟ ಚೆನ್ನಾಗಿಲ್ಲ ಎಂದ. ಮತ್ತೆರಡು ವರ್ಷಗಳು ಕಳೆದಾಗ ಮತ್ತೆ ಸಿಕ್ಕಿದ ಅವಕಾಶದಲ್ಲಿ, ಹಾಸಿಗೆ ಒರಟಾಗಿದೆ ಎಂದ.

ಇನ್ನೂ ಎರಡು ವರ್ಷಗಳ ತರುವಾಯ ಸಿಕ್ಕಿದ ಅವಕಾಶದಲ್ಲಿ, ನಾನಿನ್ನು ಹೊರಡುತ್ತೇನೆ ಎಂದು ಧಾರ್ಮಿಕ ಮಠವನ್ನು ಬಿಟ್ಟು ಮನೆಗೆ ಹೊರಟ. ಇದನ್ನು ಕೇಳಿದ ಧಾರ್ಮಿಕ ಮಠದ ಮುಖ್ಯಸ್ಥರು ಯುವಕನಿಗೆ ಹೇಳಿದರು, ಇದು ನನಗೆ ಒಂದಿಷ್ಟೂ ಹೊಸತಲ್ಲ, ನೀನು ಈ ಧಾರ್ಮಿಕ ಮಠಕ್ಕೆ ಕಾಲಿಟ್ಟ ದಿನದಿಂದ ಮಾಡಿದ್ದು ಒಂದೇ, ದೂರುವುದು.

ಸಂತ ಪೌಲರು ಫಿಲಿಪ್ಪಿಯರಿಗೆ ಬರೆದ ಪತ್ರದಲ್ಲಿ, ನೀವು ಮಾಡುವ ಎಲ್ಲಾ ಕಾರ್ಯಗಳನ್ನು ಗೊಣಗುಟ್ಟದೆ, ವಿವಾದವಿಲ್ಲದೆ, ಏಕ ಮನಸ್ಸಿನಿಂದ ಮಾಡಿ. ಆಗ ನಕ್ಷತ್ರಗಳು ಆಕಾಶವನ್ನು ಬೆಳಗಿಸುವಂತೆ ಪ್ರಪಂಚದಲ್ಲಿ ನೀವು ಕಂಗೊಳಿಸುವಿರಿ ಎಂದು ಹೇಳುತ್ತಾರೆ.

ಯೇಸುಸ್ವಾಮಿ ಹೇಳಿದ ಚಿನ್ನದ ನಾಣ್ಯಗಳ ಸಾಮತಿಯಲ್ಲಿ ತಮ್ಮ ಒಡೆಯನಿಂದ ಐದು ಹಾಗೂ ಎರಡು ತಲೆಂತುಗಳನ್ನು ಪಡೆದ ಸೇವಕರು ಶ್ರಮಪಟ್ಟು ವ್ಯಾಪಾರ ಮಾಡಿ ಆ ನಾಣ್ಯಗಳನ್ನುಗಳನ್ನು ದ್ವಿಗುಣಗೊಳಿಸಿದರು. ಆದರೆ ಒಂದು ನಾಣ್ಯವನ್ನು ಪಡೆದ ಸೇವಕ ಶ್ರಮಪಡದೆ, ತನಗೆ ಒಂದೇ ತಲೆಂತು ಸಿಕ್ಕಿದೆ ಎಂದು ಗೊಣಗುಡುತ್ತಾ ಹೋಗಿ ಆ ನಾಣ್ಯವನ್ನು ಭೂಮಿಯಲ್ಲಿ ಹೂತಿಟ್ಟ.

ತನ್ನ ಪಾಲಿಗೆ ಸಿಕ್ಕಿದ ಒಂದು ನಾಣ್ಯವನ್ನು ವೃದ್ಧಿಗೊಳಿಸಲು ಅಶಕ್ತನಾದ ಆ ಸೇವಕನನ್ನು ಒಡೆಯನು, ಸೋಮಾರಿ ದುಷ್ಟ ಸೇವಕನೆಂದು ಜರಿದು, ಆ ನಾಣ್ಯವನ್ನು ಅವನಿಂದ ಕಿತ್ತುಕೊಂಡು ಆ ಸೇವಕನ್ನು ಶಿಕ್ಷೆಗೆ ಒಳಪಡಿಸುತ್ತಾನೆ.

ಭಗವಂತ ಪ್ರತಿಯೊಬ್ಬರಿಗೂ ಅನೇಕ ವರಗಳನ್ನು ನೀಡಿರುವನು. ಕಾಲನ್ನು ಕಳೆದುಕೊಂಡು ಒಂದೇ ಕಾಲಿನಲ್ಲಿ ನಡೆಯುವವನನ್ನು ಕಂಡಾಗ ನಮ್ಮ ಎರಡು ಬಲಶಾಲಿ ಆರೋಗ್ಯಕರ ಕಾಲುಗಳು ಎಷ್ಟೊಂದು ದೊಡ್ಡದಾದ ದೇವರ ವರ ಎಂಬ ಅರಿವು ನಮಗಾಗುತ್ತದೆ.

ಇದೇ ರೀತಿ, ನಮ್ಮ ಜೀವ, ಜೀವನ ಹಾಗೂ ಅದರಲ್ಲಿರೋ ನೂರಾರು, ಸಾವಿರಾರು ಒಳ್ಳೆಯ ವಿಷಯಗಳ ಬಗ್ಗೆ ಸಂತಸಪಟ್ಟು ದೇವರನ್ನು ಸ್ತುತಿಸದೆ, ಸಣ್ಣ ಪುಟ್ಟ ಅನಾನುಕೂಲತೆಗಳಿಗಾಗಿ ಗೊಣಗುಡುವುದು, ದೂರುವುದು ಸಲ್ಲದು.