‘ಮಜಾ’ ಮುಗೀತು ‘ಕಾಮಿಡಿ‘ ಶುರುವಾಯ್ತು

‘ಇದು ಇಡೀ ಕುಟುಂಬದವರು ಕುಳಿತು ನೋಡಬಹುದಾದ ತಿಳಿಹಾಸ್ಯದ ಕಾರ್ಯಕ್ರಮ’ ಎಂದು ವಾಹಿನಿ ಹೇಳಿಕೊಂಡಿದೆ. ಅಂದಹಾಗೆ ಈ ಕಾರ್ಯಕ್ರಮದ ಹೆಸರು ‘ಕಾಮಿಡಿ ಟಾಕೀಸ್‌’. ಪ್ರತಿ ಶನಿವಾರ ಮತ್ತು ಭಾನುವಾರ ರಾತ್ರಿ 8ಗಂಟೆಗೆ ಪ್ರಸಾರವಾಗಲಿದೆ.

‘ಕಾಮಿಡಿ ಟಾಕೀಸ್’ ಒಂದು ಹಾಸ್ಯ ಸ್ಫರ್ಧೆ. ಇದರಲ್ಲಿ ನಾಲ್ಕು ಜನರ ಒಟ್ಟು ಆರು ತಂಡಗಳಿವೆ. ಈ ತಂಡಗಳು ‘ಕಾಮಿಡಿ ಟಾಕೀಸ್‌’ನ ಮೆಗಾ ಬಹುಮಾನಕ್ಕಾಗಿ ಸ್ಪರ್ಧಿಸುತ್ತವೆ. ಈಗಾಗಲೇ, ‘ಮಜಾ ಟಾಕೀಸ್’ ಮೂಲಕ ಚಿರಪರಿಚಿತರಾಗಿರುವ ಸೃಜನ್ ಲೋಕೇಶ್ ಜೊತೆಗೆ ನಟಿ ರಚಿತಾ ರಾಮ್ ತೀರ್ಪುಗಾರರಾಗಿದ್ದಾರೆ.

ನಟರಾದ ಸಿದ್ಧಾರ್ಥ ಮತ್ತು ವಿಜಯ್ ಸೂರ್ಯ ಈ ಹಾಸ್ಯ ಕಾರ್ಯಕ್ರಮವನ್ನು ನಿರೂಪಿಸಲಿದ್ದಾರೆ.

‘ಹಾಸ್ಯ ಮನುಷ್ಯನ ಜೀವನದಲ್ಲಿ ಬಹಳ ಮುಖ್ಯವಾದ ಅಂಶ. ದೈನಂದಿನ ಜಂಜಾಟಗಳನ್ನು ಮರೆತು ಒಂದಷ್ಟು ಹೊತ್ತು ಟಿವಿ ಮುಂದೆ ಕುಳಿತು ನಗುವುದಕ್ಕಾಗಿ ಈ ಕಾರ್ಯಕ್ರಮ ರೂಪಿಸಲಾಗಿದೆ.

ಮನೆ ಮಂದಿಯೆಲ್ಲ ಒಟ್ಟಾಗಿ ಕುಳಿತು ನೋಡುವ ಕಾರ್ಯಕ್ರಮಗಳನ್ನೇ ಕಲರ್ಸ್ ಕನ್ನಡ ನೀಡುತ್ತಾ ಬಂದಿದೆ. ‘ಕಾಮಿಡಿ ಟಾಕೀಸ್’ ಕೂಡ ಈ ಅಂಶವನ್ನು ಗಮನದಲ್ಲಿ ಇರಿಸಿಕೊಂಡಿರುತ್ತದೆ’ ಎನ್ನುತ್ತಾರೆ ಕಲರ್ಸ್ ಕನ್ನಡದ ಬ್ಯುಸಿನೆಸ್ ಹೆಡ್ ಪರಮೇಶ್ವರ ಗುಂಡ್ಕಲ್.