ಮಂಗಳವಾರ, ಮಾರ್ಚ್ 2, 2021
28 °C

ಚೀನಾದಲ್ಲೀಗ ‘ನಮಸ್ತೆ ನಿರ್ಮಲಾ’

ಹರವು ಸ್ಫೂರ್ತಿ Updated:

ಅಕ್ಷರ ಗಾತ್ರ : | |

ಚೀನಾದಲ್ಲೀಗ ‘ನಮಸ್ತೆ ನಿರ್ಮಲಾ’

ಭಾರತ ಚೀನಾ ಗಡಿಯ ಸಿಕ್ಕಿಂನ ನಾಥು ಲಾ ಪ್ರದೇಶಕ್ಕೆ ರಕ್ಷಣಾ ಸಚಿವೆ ನಿರ್ಮಲಾ ಸೀತಾರಾಮನ್ ಭೇಟಿ ನೀಡಿದ್ದರು. ಭಾರತದ ಯೋಧರ ಯೋಗಕ್ಷೇಮ ವಿಚಾರಿಸಿ ಸುಮ್ಮನಾಗದೆ ಚೀನಿ ಯೋಧರ ಕಡೆಗೂ ಕೈಬೀಸಿ ಮಾತನಾಡಿಸಿ ನಮಸ್ಕಾರ ಹೇಳಿ ಬಂದರು. ಈ ವಿದ್ಯಮಾನವನ್ನು ಎರಡೂ ದೇಶದ ಸಾಮಾನ್ಯ ಜನತೆ ದೊಡ್ಡಮಟ್ಟದಲ್ಲಿ ಶ್ಲಾಘಿಸಿದರು.

ಗಡಿಯಲ್ಲಿ ಮುಖಬಿಗಿದುಕೊಂಡು ಎದುರುಬದುರು ಕಣ್ಣಲ್ಲಿ ಕಣ್ಣಿಟ್ಟು ನೋಡುತ್ತಾ ನಿಂತ ಯೋಧರ ಮಧ್ಯೆ ಹೂನಗು ಹರಿಸಿ ವಾತಾವರಣವನ್ನು ತಿಳಿಗೊಳಿಸಿ ಬಂದಿದ್ದರು ನಿರ್ಮಲಾ. ಇದು ಎರಡೂ ದೇಶಗಳಲ್ಲಿ ದೊಡ್ಡ ಸುದ್ದಿಯಾತು.

ಚೀನಾದ ಯೋಧರೂ ‘ನಮಸ್ತೆ’ಗೆ ಪ್ರತಿಯಾಗಿ ತಮ್ಮ ಭಾಷೆಯಲ್ಲಿ ‘ನೀ ಹೊ’ ಎಂದರು. ಚೀನಿ ಯೋಧರೊಂದಿಗೆ ಸಂವಹನ ಮಾಡಿದ ರೀತಿ, ಚೀನಿ ಯೋಧರಿಗೆ ‘ನಮಸ್ತೆ’ ಎಂಬ ಪದವನ್ನು ಕಲಿಸಿದ ರೀತಿ ಹೆಚ್ಚು ಚರ್ಚೆ ಆಯ್ತು. ನಿರ್ಮಲಾ ಅವರು ಚೀನಿ ಯೋಧರೊಂದಿಗೆ ಸಂವಹನ ನಡೆಸಿದ ವಿಡಿಯೊವನ್ನು @DefenceMinIndia ಟ್ವಿಟರ್ ಖಾತೆಯಲ್ಲಿ ಹಾಕಿದ ಕೆಲವೇ ಗಂಟೆಗಳಲ್ಲಿ ಸಾವಿರಾರು ಪ್ರತಿಕ್ರಿಯೆಗಳು ಬಂದವು.

ಈ ವಿಡಿಯೊ ಭಾರತದಲ್ಲಿ ಅಷ್ಟೇ ಅಲ್ಲ ಚೀನಾದ ಸಾಮಾಜಿಕ ಜಾಲತಾಣಗಳಲ್ಲಿಯೂ ವೈರಲ್ ಆಯ್ತು. ಚೀನಾ ಮಹಿಳೆಯರು ನಿರ್ಮಲಾ ಸೀತಾರಾಮನ್ ಅವರ ನಡೆ ಬಗ್ಗೆ ಖುಷಿ ಹಂಚಿಕೊಂಡರು.

‘ಭಾರತೀಯ ರಕ್ಷಣಾ ಮಂತ್ರಿ ನಿರ್ಮಲಾ ಸೀತಾರಾಮನ್ ಎಂಥ ಕೆಚ್ಚೆದೆಯ ಮಹಿಳೆ. ಬಿಗುವಿನ ವಾತಾವರಣವಿದ್ದ ಗಡಿಯಲ್ಲಿ ವ್ಯವಹರಿಸಿದರು’ ಎಂಬ ಧಾಟಿಯ ಟ್ವಿಟ್‌ಗಳು ‘ಸಿನಾ ವೀಬೊ’ನಲ್ಲಿ (ಚೀನಾದ ಮೈಕ್ರೊ ಬ್ಲಾಗಿಂಗ್ ಸಾಮಾಜಿಕ ಜಾಲತಾಣ) ತುಂಬಿಹೋದವು.

ನಿರ್ಮಲಾ ಸೀತಾರಾಮನ್ ಅವರ ‘ಸ್ನೇಹಪರ ನಡುವಳಿಕೆ’ಯಿಂದ ಗಡಿಯಲ್ಲಿ ಇದ್ದ ‘ಆಕ್ರಮಣಕಾರಿ’ ಮನೋಭಾವ ಕರಗಿದೆ’ ಎಂದು ದ ಗ್ಲೋಬಲ್‌ ಟೈಮ್ಸ್‌ ಸಂಪಾದಕೀಯ ಬರೆಯಿತು. ಈ ಸಾಲುಗಳು ಕೂಡ ವಿಡಿಯೊ ಜತೆ ಚೀನಾದ ಸಾಮಾಜಿಕ ಜಾಲತಾಣದಲ್ಲಿ ಹರಿದಾಡಿತು.

ನಿರ್ಮಲಾ ಸೀತಾರಾಮನ್ ಅವರ ನಡೆ ಚೀನಾ ಸಾಮಾಜಿಕ ಜಾಲತಾಣದ ಹೆಚ್ಚು ಚರ್ಚೆಯಾಗಿದೆ. ಚೀನಿ ಮಹಿಳೆಯರು ನಿರ್ಮಲಾರ ನಡೆಯನ್ನು ಧೈರ್ಯವಾಗಿ ಪ್ರಶಂಸಿಸಿದ್ದು ವಿಶೇಷ.

ಕೇಂದ್ರ ಬಜೆಟ್ 2021 ಪೂರ್ಣ ಮಾಹಿತಿ ಇಲ್ಲಿದೆ

ತಾಜಾ ಸುದ್ದಿಗಳಿಗಾಗಿ ಪ್ರಜಾವಾಣಿ ಆ್ಯಪ್ ಡೌನ್‌ಲೋಡ್ ಮಾಡಿಕೊಳ್ಳಿ: ಆಂಡ್ರಾಯ್ಡ್ ಆ್ಯಪ್ | ಐಒಎಸ್ ಆ್ಯಪ್

ಪ್ರಜಾವಾಣಿ ಫೇಸ್‌ಬುಕ್ ಪುಟವನ್ನುಫಾಲೋ ಮಾಡಿ.