ಶುಕ್ರವಾರ, ಫೆಬ್ರವರಿ 26, 2021
31 °C

ವಿದ್ಯಾರ್ಥಿ ಹಾಸ್ಟೆಲ್‌ ಮೇಲೆ ಉಗ್ರರ ದಾಳಿ

ಪಿಟಿಐ Updated:

ಅಕ್ಷರ ಗಾತ್ರ : | |

ವಿದ್ಯಾರ್ಥಿ ಹಾಸ್ಟೆಲ್‌ ಮೇಲೆ ಉಗ್ರರ ದಾಳಿ

ಪೆಷಾವರ: ತಾಲಿಬಾನ್ ಉಗ್ರರು ಇಲ್ಲಿನ ಕೃಷಿ ತರಬೇತಿ ಸಂಸ್ಥೆಯ ವಿದ್ಯಾರ್ಥಿ ನಿಲಯದ ಮೇಲೆ ಶುಕ್ರವಾರ ಗುಂಡಿನ ದಾಳಿ ನಡೆಸಿದ್ದು, ವಿದ್ಯಾರ್ಥಿಗಳು ಸೇರಿದಂತೆ 12 ಜನ ಮೃತಪಟ್ಟಿದ್ದಾರೆ. ಪತ್ರಕರ್ತರು, ಪೊಲೀಸರನ್ನೂ ಒಳಗೊಂಡು 32 ಜನ ಗಾಯಗೊಂಡಿದ್ದಾರೆ. ಬಳಿಕ ಭದ್ರತಾ ಪಡೆ ಎಲ್ಲ ಉಗ್ರರನ್ನೂ ಕೊಂದು ಹಾಕಿದೆ.

ಆಟೊರಿಕ್ಷಾದಲ್ಲಿ ಬಂದ, ಬುರ್ಖಾ ತೊಟ್ಟ ಐವರು ಉಗ್ರರು ವಿಶ್ವವಿದ್ಯಾಲಯ ರಸ್ತೆಯಲ್ಲಿರುವ ವಿದ್ಯಾರ್ಥಿ ನಿಲಯದ ಮೇಲೆ ಸ್ವಯಂಚಾಲಿತ ಶಸ್ತ್ರಾಸ್ತ್ರಗಳ ಮೂಲಕ ಮನಬಂದಂತೆ ಆಕ್ರಮಣ ಮಾಡಿ ತೀವ್ರ ಆತಂಕ ಸೃಷ್ಟಿಸಿದರು. ಈದ್‌ ಮಿಲಾದ್‌ ಪ್ರಯುಕ್ತ ಸಂಸ್ಥೆಗೆ ರಜೆ ಘೋಷಿಸಲಾಗಿತ್ತಾದರೂ ಸುಮಾರು 100 ವಿದ್ಯಾರ್ಥಿಗಳು ಹಾಸ್ಟೆಲ್‌ನಲ್ಲಿ ಇದ್ದರು.

ತೆಹ್ರಿಕ್-ಎ-ತಾಲಿಬಾನ್ ಸಂಘಟನೆಯು ದಾಳಿಯ ಹೊಣೆ ಹೊತ್ತಿದೆ. ಉಗ್ರರು ಮತ್ತು ಭದ್ರತಾ ಪಡೆ ನಡುವೆ ಒಂದು ಗಂಟೆ ಕಾಲ ಗುಂಡಿನ ಕಾಳಗ ನಡೆಯಿತು. ಈ ಸಂದರ್ಭದಲ್ಲಿ, ಸಂಸ್ಥೆಯ ಆವರಣದೊಳಗೆ ಆಗಾಗ್ಗೆ ಗುಂಡಿನ ದಾಳಿ ಮತ್ತು ಸ್ಫೋಟದ ಸದ್ದು ಕೇಳಿಬರುತ್ತಿತ್ತು. ಉಗ್ರರಿಂದ ಆತ್ಮಹತ್ಯಾ ಕವಚ, ಗನ್ನುಗಳು, ಪಿಸ್ತೂಲುಗಳು, ಎ.ಕೆ 47 ಬಂದೂಕು, ಸ್ಫೋಟಕಗಳನ್ನು ವಶಪಡಿಸಿಕೊಳ್ಳಲಾಗಿದೆ.

‘ಪೊಲೀಸರು ಮತ್ತು ಸೇನೆ ಸಕಾಲದಲ್ಲಿ ಕ್ರಮ ಕೈಗೊಂಡಿದ್ದು ಸಾವಿನ ಸಂಖ್ಯೆಯನ್ನು ತಗ್ಗಿಸಿತು’ ಎಂದು ಖಿಬರ್‌– ಪಖ್ತುಂಖ್ವಾ ಪ್ರದೇಶದ ಪೊಲೀಸ್‌ ಮಹಾನಿರ್ದೇಶಕ ಸಲಾವುದ್ದೀನ್‌ ಮೆಹಸೂದ್‌ ಹೇಳಿದ್ದಾರೆ.

ಕೇಂದ್ರ ಬಜೆಟ್ 2021 ಪೂರ್ಣ ಮಾಹಿತಿ ಇಲ್ಲಿದೆ

ತಾಜಾ ಸುದ್ದಿಗಳಿಗಾಗಿ ಪ್ರಜಾವಾಣಿ ಆ್ಯಪ್ ಡೌನ್‌ಲೋಡ್ ಮಾಡಿಕೊಳ್ಳಿ: ಆಂಡ್ರಾಯ್ಡ್ ಆ್ಯಪ್ | ಐಒಎಸ್ ಆ್ಯಪ್

ಪ್ರಜಾವಾಣಿ ಫೇಸ್‌ಬುಕ್ ಪುಟವನ್ನುಫಾಲೋ ಮಾಡಿ.