ಶುಕ್ರವಾರ, ಮಾರ್ಚ್ 5, 2021
24 °C

ಹೆಣ್ಣು ಪ್ರತಿಮೆ

ಜ.ನಾ. ತೇಜಶ್ರೀ Updated:

ಅಕ್ಷರ ಗಾತ್ರ : | |

ಹೆಣ್ಣು ಪ್ರತಿಮೆ

ಬೆಟ್ಟದ ಅಂಗಾಲು ತೊಳೆಯಲೆಂಬಂತೆ

ಅದರ ಬುಡದಲ್ಲೊಂದು ಕೊಳ,

ನೀರ ಪ್ರತಿಬಿಂಬದಲ್ಲಿ ತನ್ನನ್ನೇ ತಾನು

ನೋಡಿಕೊಂಡು ಬೀಗುತ್ತ ಬೆಳೆದಿತ್ತು ಬೆಟ್ಟ.

 

ಅಲ್ಲೇ ಕೊಂಚ ಮುಂದೊಂದು ತಗ್ಗು

ಆ ತಗ್ಗಿನೊಳಗೊಂದು ಹೆಣ್ಣು ಪ್ರತಿಮೆ,

ಮಸೆದ ಮೂಗು, ಮುರಿದ ಗಲ್ಲ ಅದಕ್ಕೆ ಬಿರುಕು ತುಟಿ,

ಇಕ್ಕಳದಂತೆ ಹೊಸೆದ ಕಾಲುಗಳಲ್ಲಿ ಸವೆದ ಬೆರಳು

ಕಾಲದ ಏಟಿಗೆ ವಿಭ್ರಾಂತಿಗೊಳಗಾಗದ ಗಟ್ಟಿತುರುಬು ನೆತ್ತಿಮೇಲೆ,

ಕಲಶವಿಟ್ಟಂತೆ ವಿಮಗ್ನ ಅವಳ ಕಣ್ಣು.

 

ಮಳೆಬಿದ್ದ ಕೊಳದೊಳಗೆ ಮಳೆಹನಿಗಳ ತಟ್ಟಾಟ

ಹನಿಯು ಹನಿಯನ್ನೆ ಮುಟ್ಟಿ ಕೊಳದೊಳಗೆಲ್ಲ ಬಳೆಯ ಚಿತ್ರ

ಕಳಕಳದ ಹಕ್ಕಿಕೇಕೆ ತೊನೆಯುವ ಮರದ ಬಿಳಲು, ಪೊಟರೆಗಳಲ್ಲಿ;

ಕೊಲ್ಲಿನೋಟದ ಹೆಣ್ಣು ಪ್ರತಿಮೆ

ನೋಡುತ್ತ ತನ್ನನ್ನೇ ತಾನು ಕೊಳದ ನೀರಲ್ಲಿ

ತಳದ ಮೀನುಗಳಿಗೆ ಎಡ್ಡಂತಿದ್ದ ಪುಳಕ

ಆವೆಮಣ್ಣೊಳಗೆ ಅಡಗಿದ್ದ ಆಮೆಗಳೂ ಹೊರಗಿಣುಕಿ ಆಗ,

ಪಸೆಯಾರದ ಮಣ್ಣ ಮೇಲೆಲ್ಲ ಹೆಜ್ಜೆ ಗುರುತು.

ಏನು ಕಾತುರ ಏನಿಂಥ ಹಂಬಲ ಒದ್ದೆ ಮಣ್ಣಿಗೆ

ಮುಟ್ಟಿದ್ದ ಸೆಳೆಯುತ್ತ ಪುಸಕ್ಕನೆ ಆತು ತಬ್ಬುವ ಮಿದು!

 

ಮಣ್ಣಿನೆಳೆತಕ್ಕೆ ಬೀಳದೆ ಆಮೆಯೊಂದು

ಊರುತ್ತ ಮೆಲ್ಲಮೆಲ್ಲನೆ ಹೆಜ್ಜೆ ಮೇಲೆ ಹೆಜ್ಜೆ ಮೇಲೆ ಹೆಜ್ಜೆ

ಮುಟ್ಟಿತು ಪ್ರತಿಮೆಯ ಸವೆದ ಬೆರಳನ್ನು,

ತುದಿಗಾಲ ಬೆರಳಿಂದ ಶುರುವಿಕ್ಕಿದ ಅದರ ಹುಡುಕಾಟದಲ್ಲಿ

ಕಳೆದು ದಿನ ಮಾಸ ವರ್ಷವರ್ಷಂಗಳು, ಒಂದು ದಿನ

ಆಮೆ ಕುಳಿತಿತು ಪ್ರತಿಮೆಯ ನೆತ್ತಿಮೇಣ ಗಟ್ಟಿತುರುಬಿನೊಳಗೆ,

ಹಾವಸೆಗಟ್ಟಿದ ಹೆಣ್ಣುಪ್ರತಿಮೆಯೊಳಗೆ ಆಮೆಯೀಗ ಹಿಡಿಯಾಳು

ಕೇಂದ್ರ ಬಜೆಟ್ 2021 ಪೂರ್ಣ ಮಾಹಿತಿ ಇಲ್ಲಿದೆ

ತಾಜಾ ಸುದ್ದಿಗಳಿಗಾಗಿ ಪ್ರಜಾವಾಣಿ ಆ್ಯಪ್ ಡೌನ್‌ಲೋಡ್ ಮಾಡಿಕೊಳ್ಳಿ: ಆಂಡ್ರಾಯ್ಡ್ ಆ್ಯಪ್ | ಐಒಎಸ್ ಆ್ಯಪ್

ಪ್ರಜಾವಾಣಿ ಫೇಸ್‌ಬುಕ್ ಪುಟವನ್ನುಫಾಲೋ ಮಾಡಿ.