ಖಾದಿ ಮೋಡಿಗೆ ಮರುಳಾದ ಜನ

ಗದಗ, ಬೆಟಗೇರಿ, ಧರ್ಮಸ್ಥಳ ಸೇರಿ ಒಟ್ಟು 5 ಖಾದಿ ಮಾರಾಟ ಮಳಿಗೆಗಳು ಇಲ್ಲಿವೆ. ಕೈಮಗ್ಗ, ಚರಕದಿಂದ ನೂಲು ನೇಯ್ದು ಖಾದಿ ಉಡುಪು ತಯಾರಿಸುವ ಪ್ರಾತ್ಯಕ್ಷಿಕೆ ನೀಡುವ 3 ಮಳಿಗೆ ತೆರೆಯಲಾಗಿದೆ.

ಖಾದಿ ಮಳಿಗೆಯಲ್ಲಿ ಜಮಖಾನ ಕರವಸ್ತ್ರ, ಅಂಗಿ, ಜುಬ್ಬಾ, ತಲೆದಿಂಬಿನ ಹೊದಿಕೆ, ನೆಲಹಾಸು ಹೆಚ್ಚು ಮಾರಾಟವಾಗುತ್ತಿವೆ. ನಿತ್ಯ 15ರಿಂದ 20 ಸಾವಿರ ಜನರು ಭೇಟಿ ಕೊಡುತ್ತಾರೆ. ದಿನಕ್ಕೆ ಮಳಿಗೆಯೊಂದರಲ್ಲಿ ₹ 15 ರಿಂದ ₹ 25 ಸಾವಿರವರೆಗೆ ವ್ಯಾಪಾರವಾಗುತ್ತದೆ’ ಎಂದು ಖಾದಿ ಗ್ರಾಮೋದ್ಯೋಗ ಸಂಘದ ಮಾರಾಟ ಮಳಿಗೆಯ ಸಿಬ್ಬಂದಿ ನವೀನ ಯಚ್ಚಲಗಾರ ಹೇಳಿದರು.

‘ದಿನ ನಿತ್ಯದ ಬಳಕೆಗಾಗಿ ಖಾದಿ ಉಡುಪುಗಳನ್ನು ಧರಿಸುವ ಬಗ್ಗೆ ಜನರಲ್ಲಿ ಜಾಗೃತಿ ಮೂಡಿಸಬೇಕು. ನಕಲಿ ಖಾದಿ ಉಡುಪುಗಳಿಗೆ ಕಡಿವಾಣ ಹಾಕಬೇಕು. ವರ್ಷದಲ್ಲಿ ಒಮ್ಮೆಯಾದರೂ ಇಂತಹ ಮೇಳ ಆಯೋಜಿಸಬೇಕು’ ಎಂದು ಅವರು ಅಭಿಪ್ರಾಯಟ್ಟರು.

‘ಇಲ್ಲಿನ ಖಾದಿ ಮಳಿಗೆಯೊಂದರಲ್ಲಿ ಕೈಮಗ್ಗದಿಂದ ತಯಾರಿಸಿದ ಬೆಟಗೇರಿ ಸೀರೆಯನ್ನು ₹ 5,500 ನೀಡಿ ಖರೀದಿಸಿದ್ದೇನೆ’ ಎಂದು ನಗರದ ನಿವಾಸಿ ಲಕ್ಷ್ಮೀ ಎನ್. ತೇರದಾಳ ಹೇಳಿದರು.

ಸರಸ್ ಮೇಳ ಡಿ. 14ರವರೆಗೆ ನಡೆಯಲಿದೆ. ಒಟ್ಟು 200 ಮಳಿಗೆಗಳನ್ನು ತೆರೆಯಲಾಗಿದೆ. ಖಾದಿ ಮಾತ್ರವಲ್ಲ ಆಹಾರ ಉತ್ಪನ್ನಗಳು, ಕರಕುಶಲ ವಸ್ತುಗಳು, ಸಿರಿಧಾನ್ಯ ಹೀಗೆ ನೂರಾರು ವಸ್ತುಗಳ ಪ್ರದರ್ಶನ, ಮಾರಾಟ ನಡೆಯುತ್ತಿದೆ. ಸ್ವ–ಸಹಾಯ ಗುಂಪುಗಳು, ಸ್ತ್ರೀ ಶಕ್ತಿ ಸಂಘಗಳು ತಯಾರಿಸಿದ ವಸ್ತುಗಳಿಗೆ ವೇದಿಕೆ ಲಭಿಸಿದೆ. ಪುಸ್ತಕಗಳ ಪ್ರದರ್ಶನವೂ ನಡೆಯುತ್ತಿದೆ. ಚನ್ನಪಟ್ಟಣದ ಮರದ ಗೊಂಬೆಗಳ ಮಾರಾಟ ಮಳಿಗೆ ಪ್ರಮುಖ ಆಕರ್ಷಣೆ. ಕೇರಳ, ಆಂಧ್ರಪ್ರದೇಶ, ತೆಲಂಗಾಣ, ತಮಿಳುನಾಡಿನ ವ್ಯಾಪಾರಿಗಳು ಭಾಗವಹಿಸಿದ್ದಾರೆ.