ಯಾವುದೇ ವಿಷಯವಾದರೂ ಸರಿ, ‘ಪರಿಪೂರ್ಣತೆ’ ಸಾಧಿಸುವುದು ತಪಸ್ಸಿನಂತೆ. ಹಾಗೆಂದು ಅದರ ಹಿಂದೋಡುವ ಮಂದಿಯೇನು ಕಮ್ಮಿಯಿಲ್ಲ. ಇದಕ್ಕೆ ಪುಷ್ಟಿ ಕೊಡುವಂತೆ ಇತ್ತೀಚೆಗೆ ಅಧ್ಯಯನವೊಂದು ನಡೆದಿದೆ.
ಯುವಜನರಲ್ಲಿ ಪರಿಪೂರ್ಣತೆಯನ್ನು ಸಾಧಿಸುವ ಮನೋಭಾವವು 30% ಹೆಚ್ಚಿರುವುದಾಗಿ ಈ ಅಧ್ಯಯನ ತಿಳಿಸಿದೆ. ‘ಸೈಕಲಾಜಿಕಲ್ ಬುಲೆಟಿನ್‌’ನಲ್ಲಿ ಪ್ರಕಟಗೊಂಡ ಈ ಅಧ್ಯಯನದ ಪ್ರಕಾರ, ಹಲವು ಆಯಾಮಗಳಲ್ಲಿ ಯುವಜನರು ಪರಿಪೂರ್ಣತೆ ಸಾಧಿಸಲು ಹಂಬಲಿಸುತ್ತಿದ್ದಾರೆ.
ತಮ್ಮ ದೇಹದ ಬಗ್ಗೆ, ಮನಸ್ಸಿನ ಬಗ್ಗೆ, ಹಾಗೆಯೇ ಭವಿಷ್ಯದ ಆಯಾಮಗಳಲ್ಲಿ ಸದಾ ಪರ್ಫೆಕ್ಟ್ ಆಗುವುದರ ಬಗ್ಗೆಯೇ ತುಡಿಯುತ್ತಿದ್ದಾರೆ. ಕಳೆದ ಮೂರು ದಶಕಗಳಿಗೆ ಹೋಲಿಸಿದರೆ ಈ ಪರಿಪೂರ್ಣತೆಯ ಪರಿಕಲ್ಪನೆ ಈಗಿನವರಲ್ಲಿ ಹೆಚ್ಚಿದೆ ಎಂದು ತಿಳಿಸಿದೆ ಈ ಸಂಶೋಧನೆ.
ಇನ್ನೊಬ್ಬರೊಂದಿಗೆ ಹೋಲಿಸಿಕೊಳ್ಳುವ, ತಮ್ಮನ್ನು ಅವರಿಗಿಂತ ಒಂದು ಪಟ್ಟು ಮೇಲಾಗಿಯೇ ಕಾಣುವ ಮನಸ್ಥಿತಿ ಬೆಳೆದಿದ್ದು, ಇದೇ ಪರ್ಫೆಕ್ಷನಿಸಂನೆಡೆಗೆ ಅವರನ್ನು ದೂಡುತ್ತಿದೆ ಎಂದೂ ವಿವರಿಸಲಾಗಿದೆ. ಹೆಚ್ಚು ಹಣ ಸಂಪಾದಿಸುವ, ಹಾಗೆಯೇ ಐಷಾರಾಮಿ ಜೀವನ ಪಡೆಯುವತ್ತಲೇ ಯುವಜನತೆಯ ಚಿತ್ತ ನೆಟ್ಟಿದೆ ಎಂದೂ ತಿಳಿಸಿದೆ.
