‘ಶೇ 35 ರಷ್ಟು ಫಿಟ್ಮೆಂಟ್ ಶಿಫಾರಸು’ (ಪ್ರ.ವಾ., ಜ. 26) ಎಂಬ ವರದಿಯಲ್ಲಿ, ಇನ್ನು ಕೆಲವೇ ದಿನಗಳಲ್ಲಿ ಸರ್ಕಾರಕ್ಕೆ ಸಲ್ಲಿಸಲಾಗುವ ಆರನೇ ವೇತನ ಆಯೋಗದ ವರದಿಯಲ್ಲಿನ ಮುಖ್ಯ ಮಾಹಿತಿಯೊಂದನ್ನು ಕೋಷ್ಟಕದೊಂದಿಗೆ ಕೊಡಲಾಗಿದೆ. ಈ ಕೋಷ್ಟಕದಲ್ಲಿ ನಮ್ಮ ರಾಜ್ಯದ ಸರ್ಕಾರಿ ನೌಕರರು ಪಡೆಯುತ್ತಿರುವ ಕನಿಷ್ಠ ಮೂಲ ವೇತನ ಮತ್ತು ನಮ್ಮ ಸರ್ಕಾರ ಬಜೆಟ್ನಲ್ಲಿ ವೇತನಗಳಿಗಾಗಿ ಮೀಸಲಾಗಿಟ್ಟಿರುವ ಹಣದ ಶೇಕಡಾವಾರು ಪ್ರಮಾಣವನ್ನು ನಮ್ಮ ನೆರೆಯ ನಾಲ್ಕು ರಾಜ್ಯಗಳೊಂದಿಗೆ ಅಂಕಿ ಸಂಖ್ಯೆಗಳೊಂದಿಗೆ ಹೋಲಿಸಲಾಗಿದೆ. ಈ ಹೋಲಿಕೆಯಿಂದ ತಿಳಿದು ಬರುವ ಸಂಗತಿ ಎಂದರೆ ನಮ್ಮಲ್ಲಿ ಈ ಸಿಬ್ಬಂದಿಯ ಮೂಲ ವೇತನ ಮತ್ತು ಅವರ ವೇತನಕ್ಕಾಗಿ ಆಗುತ್ತಿರುವ ವೆಚ್ಚಗಳೆರಡೂ ಕನಿಷ್ಠ ಪ್ರಮಾಣದಲ್ಲಿವೆ.