ನಿರ್ಮಾಪಕಿ ಸುಮನ್, ಸಿನಿಮಾ ಅಮೆರಿಕನ್

ಸಿನಿಮಾ ನಿರ್ಮಾಣ ಸಂಸ್ಥೆಯ ಪೋಸ್ಟರ್‌ ಬಿಡುಗಡೆ ಮಾಡಿ, ಸಿನಿಮಾ ಬಗ್ಗೆ ಮಾಹಿತಿ ನೀಡಲು ಸುಮನ್ ಸುದ್ದಿಗೋಷ್ಠಿ ಕರೆದಿದ್ದರು. ಅವರ ಸಿನಿಮಾ ನಿರ್ಮಾಣ ಸಂಸ್ಥೆಯ ಲೋಗೊ, ಸುನೀಲ್ ಕುಮಾರ್ ದೇಸಾಯಿ ನಿರ್ದೇಶನದ 'ಬೆಳದಿಂಗಳ ಬಾಲೆ' ಸಿನಿಮಾವನ್ನು ನೆನಪಿಸುವಂತೆ ಇದೆ.

‘ನಮ್ಮ ಸಂಸ್ಥೆಯ ಮೊದಲ ಸಿನಿಮಾ ಹೆಸರು ‘ಬಬ್ರು’. ಅಮೆರಿಕದಲ್ಲಿ ಇರುವ ಕನ್ನಡಿಗರು ಈ ಸಿನಿಮಾ ತಂಡದ ಭಾಗ. ಉತ್ತಮ ಸಿನಿಮಾಗಳನ್ನು ನಿರ್ಮಾಣ ಮಾಡುವುದು ನಮ್ಮ ಸಂಸ್ಥೆಯ ಉದ್ದೇಶ' ಎಂದರು ಸುಮನ್. ಈ ಸಿನಿಮಾದಲ್ಲಿ ಒಂದು ಕಾರು ಪ್ರಮುಖ ಪಾತ್ರ ವಹಿಸಲಿದೆಯಂತೆ.

ಸಿನಿಮಾದ ನಿರ್ದೇಶನ ಸಾಫ್ಟ್‌ವೇರ್‌ ಎಂಜಿನಿಯರ್‌ ಆಗಿರುವ ಸುಜಯ್ ರಾಮಯ್ಯ ಅವರದ್ದು. ಸಿನಿಮಾದಲ್ಲಿ ಸಸ್ಪೆನ್ಸ್‌, ಥ್ರಿಲ್ಲರ್‌ ಅಂಶಗಳು ಇವೆ. ಸಿನಿಮಾ ವೀಕ್ಷಿಸುತ್ತಲೇ ಅಮೆರಿಕದ ಭೂಸೌಂದರ್ಯವನ್ನೂ ಸವಿಯಬಹುದು ಎಂಬುದು ಚಿತ್ರ ತಂಡದ ಅಂಬೋಣ.

ಅಮೆರಿಕದಲ್ಲಿ ಓದುತ್ತಿರುವ ಭಾರತೀಯ ವಿದ್ಯಾರ್ಥಿ ಅರ್ಜುನ್, ಮಾಯಾ ಎನ್ನುವವಳನ್ನು ಪ್ರೀತಿಸುತ್ತಿರುತ್ತಾನೆ. ಈ ನಡುವೆ, ಸನಾ ಎನ್ನುವ ಭಾರತೀಯ ಮಹಿಳೆಯು ಗಂಡನ ಕಿರುಕುಳದಿಂದ ಮುಕ್ತಿ ಪಡೆಯಲು ಬಯಸುತ್ತಿರುತ್ತಾಳೆ. ಅರ್ಜುನ್ ಮತ್ತು ಸನಾ ಒಂದು ಪ್ರಯಾಣದಲ್ಲಿ ಜೊತೆಯಾಗುತ್ತಾರೆ. ಅವರು ಪ್ರಯಾಣಕ್ಕೆ ಬಳಸಿಕೊಳ್ಳುವ ಕಾರು ಅಮೆರಿಕದ ಪೊಲೀಸರಿಗೂ, ಅಲ್ಲಿನ ದುಷ್ಕರ್ಮಿಗಳಿಗೂ ಬೇಕಾಗಿರುತ್ತದೆ. ಇದು ಈ ಸಿನಿಮಾ ಕಥೆಯ ತಿರುಳು ಎಂದು ಚಿತ್ರತಂಡ ಹೇಳಿದೆ.

ಪೂರ್ಣಚಂದ್ರ ತೇಜಸ್ವಿ ಸಂಗೀತ ಈ ಚಿತ್ರಕ್ಕಿದೆ. ಚಿತ್ರ ನಿರ್ಮಾಣದಲ್ಲಿ ಸುಮನ್ ಅವರ ಜೊತೆ ಯುಗ ಕ್ರಿಯೇಷನ್ಸ್‌ ಕೂಡ ಕೈಜೋಡಿಸಿದೆ.