ಪಠ್ಯದ ಹೊರೆ ಇಳಿಕೆ ಸ್ವಾಗತಾರ್ಹ ಚಿಂತನೆ

ಪಠ್ಯಕ್ರಮ ಬದಲಾವಣೆ ಎನ್ನುವುದು ನಮ್ಮಲ್ಲಿ ವಿದ್ಯಾರ್ಥಿಗಳ ಹಿತಾಸಕ್ತಿಗಿಂತಲೂ ಹೆಚ್ಚಾಗಿ ರಾಜಕೀಯ ಪಕ್ಷಗಳ ಅಭಿವ್ಯಕ್ತಿಗೆ ಸಂಬಂಧಿಸಿದ ಪ್ರಕ್ರಿಯೆ ಎನ್ನುವಂತಾಗಿದೆ. ಸರ್ಕಾರಗಳು ಬದಲಾದಂತೆ ಅವುಗಳ ಮೂಗಿನ ನೇರಕ್ಕೆ ತಕ್ಕಂತೆ ಪಠ್ಯಕ್ರಮಗಳನ್ನು ಬದಲಿಸುತ್ತವೆ. ಪಠ್ಯವನ್ನು ರೂಪಿ
ಸಲಿಕ್ಕೆ ವೈಜ್ಞಾನಿಕ ದೃಷ್ಟಿಕೋನ ಮಾನದಂಡವಾಗಬೇಕೇ ವಿನಾ ಪಕ್ಷಗಳ ಸಿದ್ಧಾಂತಗಳಲ್ಲ ಎನ್ನುವುದನ್ನು ರಾಜಕಾರಣಿಗಳು ಅರ್ಥ ಮಾಡಿಕೊಳ್ಳಬೇಕು. ರಾಜಕಾರಣದ ಮರ್ಜಿಗೆ ತಕ್ಕಂತೆ ಶಿಕ್ಷಣಕ್ರಮವನ್ನು ಹೇರಲಿಕ್ಕೆ ಮಕ್ಕಳು ಪ್ರಯೋಗಪಶುಗಳಲ್ಲ. ಕಲಿಕೆ ಎನ್ನುವುದು ಎಳೆಯರ ಪಾಲಿಗೆ ಉಲ್ಲಾಸದಾಯಕವಾದ ಹಾಗೂ ಮನೋವಿಕಾಸಕ್ಕೆ ಪೂರಕವಾದ ಅನುಭವವಾಗಬೇಕು. ಅದು, ಶಿಕ್ಷೆ ಅಥವಾ ಹೇರಿಕೆ ಅನ್ನಿಸಬಾರದು. ಶಿಕ್ಷಣದ ಮೂಲಕ ಮಾನವೀಯ ಸಂವೇದನೆಗಳುಳ್ಳ ತಲೆಮಾರನ್ನು ರೂಪಿಸುವುದು ನಮ್ಮ ಕಾಳಜಿಯಾಗಬೇಕೇ ವಿನಾ ಯಂತ್ರಮಾನವರ ಸೃಷ್ಟಿಯಲ್ಲ.

ಪುಸ್ತಕಗಳ ರಾಶಿಯನ್ನು ಬೆನ್ನ ಮೇಲೆ ಹೊತ್ತುಕೊಂಡು ಹೋಗುವ ಮಕ್ಕಳನ್ನು ನೋಡಿದರೆ, ಪೋಷಕರು ಮತ್ತು ವ್ಯವಸ್ಥೆಯ ಆಶೋತ್ತರಗಳನ್ನೆಲ್ಲ ಅವರ ಬೆನ್ನ ಮೇಲೆ ಹೇರಿರುವಂತೆ ಕಾಣಿಸುತ್ತದೆ. ಶಾಲಾಚೀಲದ ಭಾರವನ್ನು ಹೊರುವುದರಿಂದಾಗಿ ಬೆನ್ನುನೋವು, ಕತ್ತುನೋವು, ಉಸಿರಾಟದ ತೊಂದರೆಗಳಿಂದ ಬಳಲುವ ಮಕ್ಕಳ ಸಂಖ್ಯೆ ಹೆಚ್ಚಾಗಿದೆ. ಈ ಒತ್ತಡವು ಮಾನಸಿಕ ಆರೋಗ್ಯದ ಮೇಲೂ ಪರಿಣಾಮ ಬೀರುತ್ತದೆ. ಸ್ಪರ್ಧೆಯ ಹೆಸರಿನಲ್ಲಿ ಮಕ್ಕಳ ಬಾಲ್ಯವನ್ನು ಕಸಿದುಕೊಳ್ಳುವುದಕ್ಕೆ ಯಾವ ಸಮರ್ಥನೆಯೂ ಇಲ್ಲ. ಮಕ್ಕಳಿಗೆ ಬಾಲ್ಯವನ್ನು ಮರಳಿ ದೊರಕಿಸಿಕೊಡುವ ನಿಟ್ಟಿನಲ್ಲಿ ಪಠ್ಯದ ಹೊರೆಯನ್ನು ಕಡಿಮೆಗೊಳಿಸುವ ನಿರ್ಧಾರ ಒಳ್ಳೆಯದು. ಪಠ್ಯೇತರ ಚಟುವಟಿಕೆಗಳನ್ನು ಕೂಡ ಕಲಿಕೆಯ ಭಾಗವಾಗಿಯೇ ಗುರ್ತಿಸಬೇಕಾಗಿದೆ. ಪ್ರಸಕ್ತ ಬಜೆಟ್‍ ಅಧಿವೇಶನದ ಮುಂದುವರಿದ ಭಾಗದಲ್ಲಿ, ಶಿಕ್ಷಣ ವ್ಯವಸ್ಥೆ ಸುಧಾರಣೆಗೆ ಸಂಬಂಧಿಸಿದ ಮಸೂದೆ ಮಂಡನೆಯಾಗಲಿದೆ ಎಂದು ಸಚಿವರು ಹೇಳಿದ್ದಾರೆ. ಸುಧಾರಣೆಯ ಈ ಪ್ರಯತ್ನ ಮಕ್ಕಳಿಗೆ ಹೊರೆ ತಗ್ಗಿಸುವುದರ ಜೊತೆಗೆ, ಶಿಕ್ಷಕರ ಮೇಲಿನ ಪಠ್ಯೇತರ ಹೇರಿಕೆಯನ್ನೂ ತಪ್ಪಿಸಬೇಕಿದೆ.