ಕೊನೆಯ ದಿನವೂ ಜಮೀನು ವಶ

ಗುರುವಾರದ ಕಾರ್ಯಾಚರಣೆಯಲ್ಲಿ ಬೆಂಗಳೂರು ದಕ್ಷಿಣ ತಾಲ್ಲೂಕಿನ ಉತ್ತರಹಳ್ಳಿ ಹೋಬಳಿಯ ಮುನವರ್ತೆ ಕಾವಲ್‌ ಗ್ರಾಮದಲ್ಲಿ 85 ಎಕರೆ ಹಾಗೂ ಬೆಂಗಳೂರು ದಕ್ಷಿಣ ತಾಲ್ಲೂಕಿನ ಕೆಂಗೇರಿ ಹೋಬಳಿಯ ರಾಮೋಹಳ್ಳಿ ಗ್ರಾಮದಲ್ಲಿ 9 ಎಕರೆ ಜಮೀನನ್ನು ಜಿಲ್ಲಾಡಳಿತದ ವಶಕ್ಕೆ ಪಡೆಯಲಾಗಿದೆ. ಇದರ ಅಂದಾಜು ಮೌಲ್ಯ ₹ 480 ಕೋಟಿ ಎಂದು ವಿ.ಶಂಕರ್‌ ತಿಳಿಸಿದರು.

ಮುನವರ್ತೆ ಕಾವಲ್‌ ಗ್ರಾಮದ ಸರ್ವೇನಂಬ್ರ 18/18 ರಲ್ಲಿ 43 ಎಕರೆ 18 ಗುಂಟೆ ಜಮೀನು ಇದೆ. ಇದರಲ್ಲಿ 42 ಎಕರೆ 08 ಗುಂಟೆ ಜಮೀನನ್ನು ಕೆ.ಎಸ್‌.ಹುಚ್ಚವೀರಪ್ಪ ಎಂಬುವರು ಗಜೇಂದ್ರ ಸಿಂಗ್‌ ಅವರಿಂದ ₹ 14.77 ಕೋಟಿಗೆ 2012ರಲ್ಲಿ ಖರೀದಿಸಿದ್ದರು. ಸರ್ವೇ ನಂಬರ್‌ 18/19ರಲ್ಲಿ ಒಟ್ಟು 44 ಎಕರೆ 16 ಗುಂಟೆ ಜಮೀನು ಇದೆ. ಇದರಲ್ಲಿ 43 ಎಕರೆ ಜಮೀನನ್ನು ಬಿ.ಧರ್ಮಪ್ಪ ಎಂಬುವರು ಹಂಸದೇವಿ ಅವರಿಂದ ₹ 15.05 ಕೋಟಿಗೆ ಖರೀದಿಸಿದ್ದರು.

‘ಈ ಜಮೀನುಗಳ ಖಾತಾ ಮಾಡಿಸುವ ಸಂದರ್ಭದಲ್ಲಿ ಅವರಿಬ್ಬರೂ ಕೃಷಿ ಕುಟುಂಬಕ್ಕೆ ಸೇರಿದ ಕುರಿತು ಹಾಗೂ ಆದಾಯದ ಮೂಲಗಳ ಕುರಿತು ದಾಖಲೆಗಳನ್ನು ಹಾಜರುಪಡಿಸಿರಲಿಲ್ಲ. 2015ರಲ್ಲಿ ಈ ಕುರಿತು 1961ರ ಕರ್ನಾಟಕ ಭೂ ಸುಧಾರಣಾ ಕಾಯ್ದೆಯ ಕಲಂ 83ರ ಅಡಿ ಅವರಿಬ್ಬರ ವಿರುದ್ಧ ಪ್ರಕರಣಗಳನ್ನು ದಾಖಲಿಸಿಕೊಳ್ಳಲಾಗಿತ್ತು. ಇದರ ವಿಚಾರಣೆಗೂ ನಿರಂತರ ಗೈರಾಗಿದ್ದರು. ಬೆಂಗಳೂರು ದಕ್ಷಿಣ ಉಪವಿಭಾಗಾಧಿಕಾರಿಗಳ ನ್ಯಾಯಾಲಯವು ಇದೇ ಫೆಬ್ರುವರಿ 6ರಂದು ಈ ಆಸ್ತಿಗಳನ್ನು ಮುಟ್ಟುಗೋಲು ಹಾಕಿಕೊಳ್ಳುವಂತೆ ಆದೇಶ ಮಾಡಿತ್ತು’ ಎಂದು ಶಂಕರ್‌ ತಿಳಿಸಿದರು.

‘ಇಲ್ಲಿ ಪ್ರತಿ ಎಕರೆಗೆ ₹ 5 ಕೋಟಿ ಮೌಲ್ಯ ಇದೆ. ಮುಟ್ಟುಗೋಲು ಹಾಕಿಕೊಂಡ ಜಮೀನಿನ ಆಸುಪಾಸಿನಲ್ಲಿದ್ದ  3 ಎಕರೆ ಖರಾಬು ಜಮೀನು ಕೂಡಾ ಒತ್ತುವರಿಯಾಗಿದ್ದು, ಅದನ್ನೂ ವಶಕ್ಕೆ ಪಡೆದಿದ್ದೇವೆ’ ಎಂದರು.

ರಾಮೋಹಳ್ಳಿ ಗ್ರಾಮದ ಸರ್ವೆ ನಂಬರ್‌ 90ರಲ್ಲಿ  9 ಎಕರೆ 28 ಗುಂಟೆ ಗೋಮಾಳ ಜಾಗವಿದೆ. ಸರ್ಕಾರಕ್ಕೆ ತಪ್ಪು ಮಾಹಿತಿ ನೀಡಿ ಈ ಜಾಗವನ್ನು ಬಗರ್‌ಹುಕುಂ ಯೋಜನೆಯಡಿ ಕೆಲವರು ಮಂಜೂರು ಮಾಡಿಸಿಕೊಂಡಿದ್ದರು. ಈ ಕುರಿತು ಜಿಲ್ಲಾಡಳಿತವು ಭೂಕಂದಾಯ ಕಾಯ್ದೆಯ ಕಲಂ 108 (ಕೆ) ಅಡಿ ಪ್ರಕರಣ ದಾಖಲಿಸಿಕೊಂಡಿತ್ತು.

ಎಚ್‌ ಮೈಲಾರಯ್ಯ ಅವರಿಗೆ ಮಂಜೂರಾಗಿದ್ದ 2ಎಕರೆ 20 ಗುಂಟೆ, ಕೃಷ್ಣಪ್ಪ ಅವರ 2 ಎಕರೆ, ಅನಿತಾ ಆರ್‌.ಪ್ರಭು ಅವರ 2 ಎಕರೆ, ಎ.ರಾಜೇಂದ್ರ ಕುಮಾರ್‌ ಅವರ 2 ಎಕರೆ 38 ಗುಂಟೆ ಜಮೀನುಗಳನ್ನು ಮತ್ತೆ ಸ್ವಾಧೀನಕ್ಕೆ ಪಡೆಯುವಂತೆ ಉಪವಿಭಾಗಾಧಿಕಾರಿಗಳ ನ್ಯಾಯಾಲಯವು ಇದೇ ಫೆಬ್ರುವರಿ 15ರಂದು ಆದೇಶ ಮಾಡಿತ್ತು. ಈ ಜಮೀನುಗಳನ್ನು ಜಿಲ್ಲಾಡಳಿತ ವಶಕ್ಕೆ ಪಡೆದಿದೆ.

‘ರಾಮೋಹಳ್ಳಿ ಗ್ರಾಮದಲ್ಲಿ ಒಟ್ಟು 50 ಕೋಟಿ ಮೌಲ್ಯದ ಜಮೀನು ವಶಕ್ಕೆ ಪಡೆಯಲಾಗಿದೆ. ಈ ಜಾಗಕ್ಕೆ ತಂತಿ ನಿರ್ಮಿಸಲು ಕ್ರಮವಹಿಸಲಾಗಿದೆ’ ಎಂದು ಜಿಲ್ಲಾಧಿಕಾರಿ ತಿಳಿಸಿದರು.

ಹೆಚ್ಚುವರಿ ಜಿಲ್ಲಾಧಿಕಾರಿ ಜಗದೀಶ್‌, ಉಪವಿಭಾಗಾಧಿಕಾರಿ ಬಿ.ಅರ್‌.ಹರೀಶ್‌ ನಾಯಕ್‌ ಕಾರ್ಯಾಚರಣೆಯಲ್ಲಿ ಭಾಗವಹಿಸಿದ್ದರು.