ಶುಕ್ರವಾರ, 29 ಮಾರ್ಚ್ 2024
×
ADVERTISEMENT
ಈ ಕ್ಷಣ :
ADVERTISEMENT
ADVERTISEMENT

ಒಂದೇ ಒಂದು ಮುತ್ತು ಕಾಯ್ದಿರಿಸು

Last Updated 10 ಮಾರ್ಚ್ 2018, 19:30 IST
ಅಕ್ಷರ ಗಾತ್ರ

ಅರ್ಧ ಬತ್ತಿದ ನದಿಯ ನೀರು
ಅಲ್ಲಲ್ಲಿ ತುಂಡುತುಂಡಾದ ಮಳೆಹುಳುವಿನಂತೆ
ಹೊರಳಾಡುವುದು ಒಂದಾಗಿ ಹರಿಯಲಾಗದೆ ಅಭಿಸಾರಿಕೆಯ ತೆವಲಿನಲಿ,
ಒಂದೇ ಒಂದು ಮುತ್ತು ಕಾಯ್ದಿರಿಸು
ಕಡಲತಡಿಗೂ ಆಲಿಂಗನಕೂ ಸಮತ್ವದ ನೆರಳಿದೆ

ಅರ್ಧಚಂದ್ರನ ಖಡ್ಗ ಭೂಮಿಗುದುರದೆ
ತುಂಡಾಗದೆ ಉಳಿದ ಗುಲಾಬಿಯ ನೆತ್ತಿಯ ಮುತ್ತು
ಚಿಲ್ಲೆನ್ನದ ವಿರಹ
ಮೊಲೆಯ ತುಂಬಿನ ಗಡಸು ಆವೇಶ,
ಬಳಕ ಕಣ್ಣಪಟ್ಟಿಯಲಿ ಸೂಸಿ ತೂರಿದ ಕೊರಡು ಟೊಂಗೆಯ ಹಸಿರು,
ಅಷ್ಟಷ್ಟೇ ಉಸಿರಿನ ತುಣುಕುಗಳ
ಗೋಡೆಗಂಟಿಸಿ ಬಂದಿರುವೆ,
ಒಂದೇ ಒಂದು ಮುತ್ತು ಕಾಯ್ದಿರಿಸು
ಅನಾಥ ಚಿತ್ರವೊಂದಕ್ಕೆ ಜೀವ ತುಂಬುವುದಿದೆ

ಹೂವ ಒಡಲಾಳಕೆಲ್ಲಿಯ ಕೈಕಾಲು
ಒಂದು ಕೆಂದುಟಿ,
ಕುರುಡುಬಿದ್ದ ಕಣ್ಣು,
ಸುವಾಸನೆಭರಿತ ಒಂಟಿ ಹೃದಯ
ಒಂದೇ ಒಂದು ಮುತ್ತು ಕಾಯ್ದಿರಿಸು
ಪಕಳೆಗಳೂ ಅಂಬೆಗಾಲಿಡುವಂತೆ.

ಅಲೆಗಳಲೆ ಮುದ್ದಿಸುವ ಗಾಳಿ
ಸಿಡಿಲೇಳುವ ಮೋಡಗಳ ರೌದ್ರ ಸದೃಶ ಕೇಳಿ
ವಿದಳನವೋ ಸಮ್ಮಿಲನವೋ
ಪ್ರಶ್ನಿಸುವ ಕತ್ತಲು ಅಲ್ಲೇ ಧಾನಸ್ಥ
ಬೆಳಕು ಸರಿಯುವ ತನಕ
ಒಂದೇ ಒಂದು ಮುತ್ತು ಕಾಯ್ದಿರಿಸು
ಬೆಳಕು ಕತ್ತಲೆಗಳ ಮೀರಿದೊಂದು ಕಾಲವನು
ಕಟ್ಟಿ ಹಾಕುವುದಿದೆ.

ತಾಜಾ ಸುದ್ದಿಗಾಗಿ ಪ್ರಜಾವಾಣಿ ಟೆಲಿಗ್ರಾಂ ಚಾನೆಲ್ ಸೇರಿಕೊಳ್ಳಿ | ಪ್ರಜಾವಾಣಿ ಆ್ಯಪ್ ಇಲ್ಲಿದೆ: ಆಂಡ್ರಾಯ್ಡ್ | ಐಒಎಸ್ | ನಮ್ಮ ಫೇಸ್‌ಬುಕ್ ಪುಟ ಫಾಲೋ ಮಾಡಿ.

ADVERTISEMENT
ADVERTISEMENT
ADVERTISEMENT
ADVERTISEMENT
ADVERTISEMENT